གསར་འགོད་པར་ཀྲུང་གོ་མི་དམངས་དངུལ་ཁང་ལྷ་ས་ལྟེ་བའི་ཉིང་ལག་དངུལ་ཁང་ནས་ཤེས་རྟོགས་བྱུང་གསལ།　རང་ལྗོངས་ཀྱི་དངུལ་རྩའི་སྒྲིག་གཞི་ཁག་གི་མི་དམངས་ཤོག་སྒོར་གྱི་དངུལ་བུན་དང་བཅོལ་དངུལ་གྱི་རྩིས་གཞིའི་སྐྱེད་ཀ་དེ་ཚེས་１１ཉིན་ནས་དུས་གཅིག་ཏུ་ཆག་པ་དེའི་ནང་དུས་ཡུན་ལོ་གཅིག་གི་དངུལ་བུན་སྐྱེད་ཀ་དེ་དེ་སྔའི་３．３７％ནས་３．１２％བར་ཆག་སྟེ་ཆག་ཚད་བརྒྱ་ཆའི་གྲངས་０．２５ཟིན་པ་དང་།　དུས་ཡུན་ལོ་གཅིག་གི་བཅོལ་དངུལ་སྐྱེད་ཀ་དེ་དེ་སྔའི་２．５％ནས་２．２５％བར་ཆག་སྟེ་ཆག་ཚད་བརྒྱ་ཆའི་གྲངས་０．２５ཟིན་པ་རེད།　དུས་སྒོ་ངེས་མེད་ཀྱི་དངུལ་བཅོལ་སྐྱེད་ཀར་འགྱུར་ལྡོག་མེད་ཅིང་།　རང་ལྗོངས་་ཁོངས་གཏོགས་ཁུལ་གྱི་མི་སྒེར་གྱི་སྡོད་ཁང་སྤྱི་གསོག་མ་དངུལ་གྱི་དངུལ་བུན་དང་བཅོལ་དངུལ་གྱི་སྐྱེད་ཀའང་དུས་གཅིག་ཏུ་ཆག་པ་དེའི་ནང་ལོ་དེ་གར་བཅོལ་བའི་མི་སྒེར་གྱི་སྡོད་ཁང་སྤྱི་གསོག་མ་དངུལ་གྱི་བཅོལ་དངུལ་སྐྱེད་ཀ་０．３５％རྒྱུན་འཁྱོངས་བྱས་པ་དང་།　ལོ་གོང་མ་ནས་རྩིས་་སྒྱུར་བྱས་པའི་མི་སྒེར་གྱི་སྡོད་ཁང་སྤྱི་གསོག་མ་དངུལ་གྱི་བཅོལ་དངུལ་སྐྱེད་ཀ་དེ་ད་ལྟ་ལག་བསྟར་བྱེད་བཞིན་པའི་２．１％ནས་１．８５％བར་ཆག་པ་རེད།　དུས་ཡུན་ལོ་ལྔ་མན་ཆད（ལོ་ལྔ་ཚུད་པ）ཀྱི་དངུལ་བུན་སྐྱེད་ཀ་དེ་ད་ལྟ་ལག་བསྟར་བྱེད་བཞིན་པའི་２．５１％ནས་２．２６％བར་ཆག་པ་དང་།　དུས་ཡུན་ལོ་ལྔ་ཡན་གྱི་སྐྱེད་ཀ་དེ་ད་ལྟ་ལག་བསྟར་བྱེད་པའི་２．８３％ནས་２．５８％བར་ཆག་པ་བཅས་རེད།