དུས་རབས་གཅིག་ཙམ་གྱི་གོང་དུ་ལྕགས་ཕག་ལོའི་གསར་བརྗེ་བྱས་རྗེས་ཀྱི་ཀྲུང་གོ་འདི་ཉིད་འོད་ཟེར་དང་མུན་ནག་གི་འབྲེལ་མཚམས་སུ་གནས་ཡོད།
ཤིང་རུལ་རྩྭ་སྐམ་གཏོང་བའི་གསར་བརྗེས་ལོ་ངོ་སྟོང་ཕྲག་དབང་སྒྱུར་བྱེད་མཁན་རྒྱལ་པོའི་སྲིད་དབང་སྒེར་འཛིན་ལམ་ལུགས་མགོ་རྟིང་བསློགས་ནས་ཀྲུང་གོའི་ཡར་ཐོན་རླབས་རྒྱུན་གྱི་སྒོ་མོ་ཕྱེད། འོན་ཀྱང་དམངས་གཙོ་སྤྱི་མཐུན་གྱི་འདུ་ཤེས་རྨོངས་གཉིད་ལས་བསད་ཀྱང་བཀས་བཀོད་རྒྱུད་འཛིན་གྱི་རྩ་བ་ད་དུང་རྩ་བཀོག་གཏོང་ཐུབ་མེད་པ་དང་། ཨེ་ཤེ་ཡའི་སྤྱི་མཐུན་རྒྱལ་ཁབ་བཙུགས་ཟིན་ཡང “ཆབ་སྲིད་བཟང་བའི་འཛུགས་སྐྱོང ”གི་འདུན་པ་སྒྲུབ་ཐུབ་མེད། ལྕགས་ཕག་ལོའི་གསར་བརྗེའི་སྔོན་བྱོན་པ་ཚོས “བརྗིད་ཆེའི་བྱ་གཞག་སྒྲུབ་ཆེད་སྲོག་བློས་གཏོང་ཕོད་པའི ”སྙིང་སྟོབས་བཅངས་པ་དང “ཀྲུང་ཧྭ་དར་རྒྱས་དང་དཀའ་ངལ་ལ་མ་འཛེམས་པར་རྗེས་བསྙེགས་བྱེད་པའི ”བློ་སྟོབས་བཙུགས་ཏེ་ཡོན་ཧྲེ་ཁེས་རྒྱལ་སྲིད་གཡོ་འཕྲོག་དང་། དམག་ཤེད་ཅན་གྱི་བཅད་བཟུང་། དམག་འཁྲུག་ཟིང་ཆ། མི་དམངས་ཀྱི་འཚོ་བ་ཉམ་ཐག་བཅས་ཀྱི་མདུན་དུ “གསར་བརྗེར་གྲུབ་འབྲས་ཐོབ་མེད་པས་བློ་མཐུན་ཚོས་འབད་འཐབ་བྱེད ”ཅེས་པའི་འབོད་ཚིག་འདོན་རྒྱུ་ལས་མི་འདས།
སུ་ཞིག་གིས་ལྕགས་ཕག་ལོའི་མི་རབས་ཚོས་བཏོད་པའི་རླབས་ཆེན་བྱ་གཞག་གི་རྒྱུན་མཐུད་ནས་དམངས་ཚོགས་དུང་ཕྱུར་མང་པོ་རྨོངས་གཉིད་བསད་ནས་སྤྱི་ཚོགས་འཕེལ་རྒྱས་ལ་སྐུལ་འདེད་གཏོང་ངམ། སུ་ཞིག་གིས་ཀྲུང་ཧྭ་མི་རིགས་ཀྱི་སྣེ་ཁྲིད་དེ་མི་རིགས་རང་བཙན་དང་། མི་དམངས་བཅིངས་འགྲོལ། རྒྱལ་ཁབ་སྟོབས་འབྱོར། མི་དམངས་བདེ་སྐྱིད་བཅས་ཀྱི་ལོ་རྒྱུས་ལས་འགན་ལེགས་སྒྲུབ་བྱེད་དམ། གང་འདྲ་བྱས་ཏེ་ཀྱག་ཀྱོག་གི་འགྲོ་ལམ་ཐོག་བསྐྱོད་པའི་ཀྲུང་གོ་འདི་ཉིད་མི་རིགས་བསྐྱར་དར་བསུ་བའི་འོད་ཟེར་ལྡན་པའི་མདུན་ལམ་གྱི་ཕྱོགས་སུ་སྣེ་ཁྲིད་བྱེད་དམ།
ལྕགས་ཕག་ལོའི་གསར་བརྗེ་དང་དེའི་རླབས་ཆེན་གྱི་གྲུབ་འབྲས་དང་ཡིད་སྐྱོ་བའི་ཕམ་ཉེས་ཀྱིས་སྐྱེ་བོ་ཀུན་ལ་གལ་ཏེ་ཁ་གསལ་ལ་ཚན་རིག་དང་མཐུན་པའི་གསར་བརྗེའི་རྩ་འཛིན་ཞིག་མ་བཏོན་ཚེ་རིམ་གྲས་ཁག་གི་མི་རིགས་ཧྲིལ་པོའི་སྟོབས་ཤུགས་ལ་མཐུན་སྒྲིལ་བྱེད་མི་ཐུབ་པ་དང་། དེང་རབས་ཅན་གྱི་རྒྱལ་ཁབ་ཀྱི་ཕུགས་བསམ་གྱིས་འདེགས་སྐྱོར་བྱས་པའི་ལམ་ལུགས་སྒྲོམ་གཞི་འཛུགས་མི་ཐུབ་པ་མ་ཟད། སྡུག་བསྔལ་གྱི་རྒྱ་མཚོར་ལྷུངས་པའི་མི་དམངས་རྣམས་དེ་བས་སྐྱོབ་མི་ཐུབ་ལ་སྤྱི་ཚོགས་ཡར་སློང་མི་ཐུབ་པ་གསལ་སྟོན་བྱས་ཡོད། ཀྲུང་གོ་ཪྙིང་པའི་ཕྱེད་མི་སེར་སྤེལ་ཡུལ་དང་ཕྱེད་ཙམ་བཀས་བཀོད་རྒྱུད་འཛིན་གྱི་སྤྱི་ཚོགས་ངོ་བོར་རྦད་དེ་འགྱུར་ལྡོག་གཏོང་བ་དང་། ཀྲུང་གོ་མི་དམངས་ཀྱི་ཡ་ང་བའི་རྣམ་པར་རྦད་དེ་འགྱུར་ལྡོག་གཏོང་བ། རྒྱལ་ཁབ་འབུར་ཐོན་དང་མི་རིགས་བསྐྱར་དར་མངོན་འགྱུར་བཅས་ཀྱི་ཐད་ངེས་པར་དུ་སྟོབས་དང་ལྡན་པའི་འགོ་ཁྲིད་སྲོག་ཤིང་ཞིག་ཡོད་དགོས།
ཀྲུང་གོ་གུང་ཁྲན་ཏང་དབུ་བཪྙེས་པ་དེ་ནི་ཉེ་རབས་དང་དེང་རབས་ཀྲུང་གོའི་ལོ་རྒྱུས་འཕེལ་རྒྱས་ཀྱི་ལྡོག་མེད་ཀྱི་ཐོན་དངོས་ཤིག་དང་རྒྱལ་ཁབ་སྐྱོབ་གནས་ཀྱི་འཐབ་རྩོད་ནང་ཀྲུང་གོ་མི་དམངས་ཀྱིས་དཔའ་ངར་ཞུམ་མེད་ངང་འཚོལ་ཞིབ་བྱས་པ་ལས་བྱུང་བའི་ལྡོག་མེད་ཀྱི་ཐོན་དངོས་ཤིག་ཡིན། ལྕགས་ཕག་ལོའི་གསར་བརྗེ་འགོ་འཛུགས་སར་བྱས་ཏེ་སྐུ་ཞབས་སུན་ཀྲུང་ཧྲན་སོགས་ལྕགས་ཕག་ལོའི་མི་རབས་ཀྱིས་བཏོད་པའི་རླབས་ཆེན་བྱ་གཞག་རྒྱུན་འཛིན་བྱས་ཏེ་སྤྱི་ཚོགས་ཀྱི་རྨང་གཞི་རྒྱ་ཁྱབ་དང་། རྩ་འཛུགས་ཀྱི་སྒྲིག་ཁྲིམས་ནན་པ། བསམ་བློ་ཚད་མཐོའི་གཅིག་གྱུར། སྤྱི་ཚོགས་སྐུལ་སློང་གི་ནུས་པ་ཆེ་བ་བཅས་ཀྱི་འབྱོར་མེད་གྲལ་རིམ་གྱི་སྲིད་ཏང་དེས་ཚན་རིག་དང་མཐུན་པའི་མར་ཁེ་སི་རིང་ལུགས་ཀྱི་རིགས་པའི་གཞུང་ལུགས་ཀྱི་ཐོག་ནས་ཀྲུང་གོའི་གནད་དོན་ལ་ལྟ་ཞིབ་དང་དབྱེ་ཞིབ་བྱས་པ་དང་། བཙན་རྒྱལ་རིང་ལུགས་དང་བཀས་བཀོད་རྒྱུད་འཛིན་ལ་ངོ་རྒོལ་བྱེད་པའི་རྩ་འཛིན་ཁ་གསལ་གྱི་ཐོག་ནས་མི་དམངས་དུང་ཕྱུར་མང་པོའི་སྟོབས་ཤུགས་གོང་བུ་གཅིག་ཏུ་འགྲིལ་བ་དང་མི་རིགས་བསྐྱར་དར་གྱི་འོས་འགན་ཐོག་ནས་སྤྱི་ཚོགས་འཕེལ་རྒྱས་ཀྱི་གོམ་སྟབས་ལ་སྐུལ་འདེད་བཏང་ཡོད། ལོ་དགུ་བཅུའི་གསར་བརྗེ་དང་། འཛུགས་སྐྲུན། སྒྱུར་བཅོས་བཅས་ཀྱི་འོད་སྟོང་འབར་བའི་ལོ་རྒྱུས་བརྒྱུད “ཀྲུང་གོའི་མི་དམངས་ཀྱི་སྲོག་ཤིང་ཀ་རྟེན ”ནས “ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་བྱ་གཞག་གི་འགོ་ཁྲིད་སྲོག་ཤིང ”བར་ཀྲུང་གོ་གུང་ཁྲན་ཏང་འདི་ཉིད་ཀྲུང་གོའི་སྤྱི་ཚོགས་འཕོ་འགྱུར་ལ་འགོ་ཁྲིད་བྱེད་མཁན་གྱི་སྔོན་ཐོན་སྟོབས་ཤུགས་སུ་གྱུར་ནས་ཀྲུང་ཧྭ་མི་རིགས་འཕེལ་རྒྱས་དང་ཡར་ཐོན་ཡོང་བའི་ཐད་དུས་རབས་གསར་པ་ཞིག་བཏོད་ཡོད། སྐར་ལྔའི་དར་དམར་གནམ་བདེ་སྒོ་མོའི་ཐང་ཆེན་དུ་ཐེངས་དང་པོ་བསྒྲེངས་ནས “ཀྲུང་གོའི་མི་དམངས་དུས་འདི་ནས་བཟུང་ཡར་ལངས་པ་རེད ”ཅེས་མངོན་གསལ་དུ་བཤད་པ་དེས་འཛམ་གླིང་ལ་གཡོ་འགུལ་ཐེབས་པ་དང་ལྕགས་ཕག་ལོའི་གསར་བརྗེའི་སྔོན་བྱོན་པའི “རྒྱལ་འཛུགས་ཀྱི་ཕུགས་བསམ ”མངོན་འགྱུར་བྱུང་བ་དང་། ཨའོ་རྩལ་འགྲན་ཚོགས་དང་འཛམ་གླིང་དངོས་མང་སྟོན་ཚོགས་བསྟུད་མར་འཚོགས་ནས་ཀྲུང་གོ་འདི་ཉིད་འཛམ་གླིང་ཐོག་གི་དཔལ་འབྱོར་ཚན་པ་ཆེ་གྲས་གཉིས་པར་གྱུར་པ་དང་སྤྱོད་བཟང་འདུན་ཆེའི་མི་སྣ་གྲངས་ལས་འདས་པའི “རྒྱལ་ཁབ་སྟོབས་ཆེར་འགྱུར་བ་བྱེད་པའི་ཕུགས་བསམ ”ཡང་ཉིན་རེ་བཞིན་གསལ་པོ་ཆགས་ཡོད་པ་རེད། ལོ་90ཡི་རིང་ང་ཚོའི་ཏང་གིས་ཀྲུང་གོའི་མི་དམངས་ལ་མཐུན་སྒྲིལ་དང་སྣེ་ཁྲིད་ཀྱིས་མིའི་རིགས་ཀྱི་ལོ་རྒྱུས་ཐོག་གི་མཛེས་སྡུག་ལྡན་པའི་ལོ་རྒྱུས་སྙན་ངག་བརྩམས་པ་དེ་ཐོག་ནས་ཀྲུང་གོ་གུང་ཁྲན་ཏང་ནི་ཀྲུང་གོའི་དེང་རབས་ཅན་གྱི་བྱ་གཞག་ལ་ཆེས་ནུས་ལྡན་གྱི་སྐུལ་འདེད་གཏོང་མཁན་དང་། ཆེས་བློས་འཁེལ་བའི་སྒྲིག་འཛུགས་བྱེད་མཁན། ཆེས་འགྱུར་མེད་སྟོབས་ལྡན་གྱི་འགོ་ཁྲིད་པ་བཅས་ཡིན་པ་རྩོད་ཐབས་བྲལ་བའི་སྒོ་ནས་ར་སྤྲོད་བྱུང་ཡོད། ཉེ་རབས་ཀྲུང་གོའི་རྒྱལ་ཁབ་སྐྱོབ་གནས་ཐུབ་པ་དང་ཀྲུང་ཧྭ་དར་རྒྱས་བཏང་བའི་ཉམས་མྱོང་དང་བསླབ་བྱ་ཚང་མ་ཕྱོགས་སྡོམ་གཏིང་ཟབ་བྱེད་པ་དང་། དེང་རབས་ཀྲུང་གོ་འཕེལ་རྒྱས་སྟོབས་ཆེར་གྱུར་པ་དང་སྒོ་ཀུན་ནས་ཡར་རྒྱས་བྱུང་བའི་འོད་སྟོང་འཕྲོ་བའི་ལོ་རྒྱུས་ལམ་བུ་ཕྱོགས་སྡོམ་གཏིང་ཟབ་བྱེད་པ། ཀྲུང་ཧྭ་མི་རིགས་བཪྙས་བཅོས་མྱོང་བའི་གནས་ལས་བྲལ་ཏེ་དར་རྒྱས་ཀྱི་ཕྱོགས་སུ་བསྐྱོད་པའི་འགྱུར་ལྡོག་ཧ་ཅང་ཆེན་པོ་ཕྱོགས་སྡོམ་གཏིང་ཟབ་བྱེད་པ་བཅས་བྱས་ཚེ་ང་ཚོར་ལོ་རྒྱུས་ཀྱི་སྡོམ་ཚིག་འདི་འདྲ་ཞིག་ཐོབ་པ་སྟེ། ཀྲུང་གོ་གུང་ཁྲན་ཏང་གི་འགོ་ཁྲིད་ཁོ་ནའི་འོག་གཞི་ནས་མི་རིགས་རང་བཙན་དང་མི་དམངས་ལ་བཅིངས་འགྲོལ་ཐོབ་ཐུབ་པ་དང་གཞི་ནས་རྒྱལ་ཁབ་སྟོབས་འབྱོར་ལྡན་པ་དང་མི་དམངས་ལ་བདེ་སྐྱིད་ཡོང་ཐུབ་པ་དེ་རེད།
ལྕགས་ཕག་ལོའི་གསར་བརྗེའི་རྗེས་ཀྱི་ལོ་བརྒྱ་ཡི་རིང་རླབས་ཆེན་མེས་རྒྱལ་གྱིས་ཟིལ་རླབས་དགུང་འཕྱུར་གྱི་ལོ་རྒྱུས་ལམ་བུ་བརྒྱུད་པ་དང་། རླབས་ཆེན་གྱི་མི་རིགས་ཀྱིས་གནམ་ས་གཡོ་བའི་འབད་འཐབ་བྱས་པ། རླབས་ཆེན་གྱི་མི་དམངས་ཀྱིས་ལོ་རྒྱུས་དེབ་ཐེར་ནང་མཛེས་སྡུག་རྣམ་པར་བཀྲ་བའི་བརྗིད་ཆེའི་བྱ་གཞག་བཏོད་པ་བཅས་རེད། དེང་རབས་ཅན་ནི་རང་ཤུགས་སུ་བྱུང་བའི་ལོ་རྒྱུས་ཀྱི་འཕེལ་རིམ་ཞིག་མིན་པར་འདུ་ཤེས་དང་། འཆར་གཞི། གོ་རིམ་བཅས་ལྡན་པའི་སྒོ་ནས་ཁྲིད་སྟོན་བྱས་ན་གཞི་ནས་ལེགས་གྲུབ་ཡོང་ཐུབ་པ་ཞིག་ཡིན་པ་ལོ་བརྒྱའི་རིང་གི་ཉམས་མྱོང་གི་ཐོག་ནས་ར་སྤྲོད་ཐུབ་ཡོད། རྗེས་སུ་འཕེལ་རྒྱས་བྱུང་བའི་དེང་རབས་ཅན་གྱི་རྒྱལ་ཁབ་ནང་འགོ་ཁྲིད་ཀྱི་སྲོག་ཤིང་ཆེན་པོ་ཞིག་ནི་བརྟན་ལྷིང་དང་འཕེལ་རྒྱས་ལ་གལ་འགངས་ཤིན་ཏུ་ཆེན་པོ་ལྡན་ཡོད། ལོ་རྒྱུས་ཀྱི་འགོ་འཛུགས་ས་གསར་པའི་ཐོག་ལངས་ནས་ཀྲུང་ཧྭ་མི་རིགས་ཀྱི་རླབས་ཆེན་བསྐྱར་དར་ཡོང་བ་བྱེད་པའི་ལོ་རྒྱུས་ཀྱི་ལས་འགན་མདུན་དུ་མུ་མཐུད་བློ་བརྟན་འགྱུར་མེད་ངང་ཀྲུང་གོ་གུང་ཁྲན་ཏང་གི་འགོ་ཁྲིད་མཐའ་འཁྱོངས་བྱེད་པ་དང་། ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་འགྲོ་ལམ་ཐོག་བསྐྱོད་རྒྱུ་མཐའ་འཁྱོངས་བྱེད་པ། མུ་མཐུད་བསམ་བློར་བཅིངས་འགྲོལ་གཏོང་བ། སྒྱུར་བཅོས་སྒོ་དབྱེ་མཐའ་འཁྱོངས་བྱེད་པ། ཚན་རིག་དང་མཐུན་པའི་གོང་འཕེལ་ལ་སྐུལ་འདེད་གཏོང་བ། སྤྱི་ཚོགས་མཐུན་སྦྱོར་ལ་སྐུལ་འདེད་གཏོང་བ་བཅས་བྱས་ཚེ་གཞི་ནས་རླབས་ཆེན་གྱི་རྒྱང་སྐྱོད་ལམ་བུ་གསར་པའི་ཐོག་རྒྱུན་ཆད་མེད་པར་འོད་སྟོང་གསར་པ་གཏོད་ཐུབ།