སྔོན་གཏོད་ལེགས་བརྩོན་གྱི་བྱེད་སྒོ་སྤེལ་ཚུན་ལྷ་རི་རྫོང་གིས་ཀྲུང་དབྱང་དང་རང་སྐྱོང་ལྗོངས་ཏང་ཨུད་ཀྱི་བླང་བྱ་གཞིར་བཟུང་ས་གནས་དེ་གའི་དོན་དངོས་དང་ཟུང་འབྲེལ་གྱིས་དོན་དངོས་དང་འཚམས་པའི་དཔྱད་བསྡུར་གདེང་འཇོག་ལམ་སྲོལ་འཚོལ་ཞིབ་ཧུར་ཐག་བྱས་པས “ཏང་ཡོན་རང་ཉིད་ཀྱིས་དཔྱད་དཔོག་བྱེད་པ་དང་། ཀྲི་པུའུ་དབར་གདེང་འཇོག་བྱེད་པ། འགོ་ཁྲིད་ཀྱིས་དཔྱད་བརྗོད་བྱེད་པ། རྫོང་ཨུད་ཀྱིས་དཔྱད་བསྡུར་བྱེད་པ། མང་ཚོགས་ཀྱིས་ཚད་ལེན་དཔྱད་བསྡུར་བྱེད་པ ”བཅས་ནང་དོན་གཙོ་བོར་བྱས་པའི་གདེང་འཇོག་མ་ལག་ཅིག་རིམ་བཞིན་ཆགས་ནས་གྲུབ་འབྲས་ཡག་པོ་ཐོབ་ཡོད། ཉེ་ཆར་བློ་མཐུན་ལི་ཡོན་ཁྲའོ་ཡིས་བྱེད་སྟངས་དེར་མཆན་འགོད་མཛུབ་སྟོན་གལ་ཆེན་གནང་བ་དང་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་བློ་མཐུན་ཁྲེན་ཆོན་གོས་མཆན་འགོད་མཛུབ་སྟོན་གྱི་དགོངས་དོན་སློབ་སྦྱོང་བྱ་རྒྱུ་དེ་གོ་སྐབས་སུ་བརྩིས་ནས་སྔོན་གཏོད་ལེགས་བརྩོན་གྱི་བྱེད་སྒོར་སྔར་བས་ངོས་འཛིན་གཏིང་ཟབ་བྱེད་པ་དང་། སྔོན་གཏོད་ལེགས་བརྩོན་གྱི་བྱེད་སྒོ་དེ་སྔར་བས་མི་སེམས་ལ་ཟུག་པ་བྱེད་པ། ལས་དོན་ཁག་ལ་རྣམ་པ་གསར་པ་ཞིག་སྔར་བས་གཏོད་པ་བཅས་བྱེད་དགོས་པའི་བླང་བྱ་བཏོན་གནང་བ་རེད།
ལྷ་རི་རྫོང་གིས་སྔོན་གཏོད་ལེགས་བརྩོན་གྱི་བྱེད་སྒོ་སྤེལ་རིང་བཏོད་པའི “ལྔ་བསྡུར་བྱེད་ཐབས ”ནི་བྱེད་སྒོར་འགན་ལེན་བྱེད་པའི་ཏན་ཏིག་ནུས་ལྡན་གྱི་གསར་གཏོད་བྱེད་ཐབས་ཤིག་རེད། སྔོན་གཏོད་ལེགས་བརྩོན་གྱི་བྱེད་སྒོའི་ཁྲོད་ཏང་ཡོན་ནི་གྲུབ་ཆ་གཙོ་བོ་དང་། ཀྲི་པུའུ་ནི་སྲོག་ཤིང་། འགོ་ཁྲིད་ནི་འགན་གཙོ་བོ་འཁུར་མཁན། ཏང་ཨུད་ནི་འགག་རྩ། མང་ཚོགས་ཀྱི་གདེང་འཇོག་ནི་ཚད་གཞི་བཅས་ཡིན་པས་ངེས་པར་དུ་ཕྱོགས་ཁག་གི་མཐུན་རྐྱེན་སྐུལ་སློང་གང་ལེགས་བྱས་ནས་སྔོན་གཏོད་ལེགས་བརྩོན་གྱི་བྱེད་སྒོའི་ནང་ཞུགས་དགོས། ལྷ་རི་རྫོང་གི “ལྔ་བསྡུར་བྱེད་ཐབས ”ཀྱི་ཉམས་མྱོང་དེས་སྔོན་གཏོད་ལེགས་བརྩོན་གྱི་བྱེད་སྒོར་ཏན་ཏིག་ནུས་ལྡན་གྱི་ཕན་འབྲས་ཐོབ་རྒྱུར་འགན་ལེན་བྱེད་པའི་གནད་འགག་ལ་དམ་འཛིན་བྱས་ཡོད་པས་སློབ་སྦྱོང་ནན་ཏན་དང་གཞི་རིམ་དུ་སྔར་བས་ཁྱབ་གདལ་གཏོང་རིན་ཡོད་པ་ཞིག་རེད།
“ལྔ་བསྡུར་བྱེད་ཐབས ”ཀྱི་ཉམས་མྱོང་སློབ་སྦྱོང་བྱ་རྒྱུ་ནི་སྔོན་གཏོད་ལེགས་བརྩོན་གྱི་བྱེད་སྒོའི་ཁྲོད་ཀྱི་ཏང་ཡོན་གྱི་ནུས་པ་གཙོ་བོ་འགན་ལེན་བྱ་རྒྱུ་དེ་ཡིན། སྔོན་གཏོད་ལེགས་བརྩོན་གྱི་བྱེད་སྒོའི་དམིགས་ཚད་གལ་ཆེན་གྱི་གྲས་ཤིག་ནི་ཏང་ཡོན་མི་རེ་ངོ་རེས་གདོང་ལེན་དཔེ་བཟང་གི་ནུས་པ་འདོན་སྤེལ་ཧུར་ཐག་བྱས་ནས་ཕུལ་བྱུང་གུང་ཁྲན་ཏང་ཡོན་ཞིག་བརྩོན་ལེན་བྱ་རྒྱུ་དེ་ཡིན། ཏང་ཡོན་གཞན་དབང་གིས་ཞུགས་པ་དང “འུར་ལངས ”ཀྱི་ཐབས་ཤེས་སྤྱད་དེ་བྱེད་སྒོ་གཏན་ནས་སྤེལ་མི་རུང་། ཏང་ཡོན་རང་ཉིད་ཀྱིས་དཔྱད་དཔོག་བྱེད་པར་ཏང་ཡོན་མི་རེ་ངོ་རེས་རང་འཁྲིའི་ལས་གནས་ལ་གཞི་ཚུགས་པ་དང་། འཁོད་བབ་ལྟར་གྲལ་དུ་བཞུགས་པ། རང་ངོས་ཀྱི་མངོན་ཚུལ་ལ་གདེང་འཇོག་བྱེད་པ། ཞན་ཆར་ཞིབ་བཤེར་བྱེད་པ། ལེགས་བཅོས་བྱ་ཐབས་འདོན་པ། འབད་འཐབ་ཀྱི་ཁ་ཕྱོགས་གསལ་པོར་འདོན་པ་བཅས་བྱས་ཏེ་ཏང་ཡོན་དཔུང་ཁག་གི “ཕྲ་ཕུང ”ཚང་མའི་གསོན་ཤུགས་འཕེལ་བ་དང་སྔོན་གཏོད་ལེགས་བརྩོན་བྱ་རྒྱུར་རྨང་གཞི་བརྟན་པོ་ཞིག་འདིང་དགོས།
“ལྔ་བསྡུར་བྱེད་ཐབས ”ཀྱི་ཉམས་མྱོང་སློབ་སྦྱོང་བྱ་རྒྱུ་ནི་་སྔོན་གཏོད་ལེགས་བརྩོན་གྱི་བྱེད་སྒོའི་ཁྲོད་ཀྱི་ཏང་གི་གཞི་རིམ་རྩ་འཛུགས་ཀྱི་ནུས་པ་གཙོ་བོ་འགན་ལེན་བྱ་རྒྱུ་དེ་ཡིན། སྒོ་རྒྱག་དཔྱད་དཔོག་གིས་སྔོན་ཐོན་གཏོད་པ་དང་དུས་རྟག་ཏུ་བྱས་རྗེས་དང་བཟང་ཆ་ཁོ་ན་བརྗོད་ཚེ་གནད་ལ་འཁེལ་མི་ཐུབ། སྒོ་དབྱེ་དཔྱད་དཔོག་གིས་སྔོན་ཐོན་གཏོད་ཚེ་ཞན་ཆ་གཞི་ནས་ཤེས་སླ་བ་དང་གཞན་གྱི་ཉམས་མྱོང་ཡག་པོ་དང་བྱེད་ཐབས་ཡག་པོ་སློབ་སྦྱོང་བྱེད་ཐུབ། ཀྲི་པུའུ་དབར་གདེང་འཇོག་བྱེད་པར་ཕན་ཚུན་སློབ་སྦྱོང་དང་། ཕན་ཚུན་སྤེལ་རེས། ཐུན་མོང་ཐོག་མཐོར་གཏོང་བཅས་བྱ་རྒྱུར་སྐུལ་འདེད་གཏོང་དགོས་པ་མ་ཟད་བསྡུར་སྦྱོང་སྐྱོད་བརྒལ་བཅས་ཀྱི་རྣམ་པ་ཞིག་བཏོད་ནས་སྔོན་གཏོད་ལེགས་བརྩོན་གྱི་བྱེད་སྒོ་རྒྱུན་ཆད་མེད་པར་གཏིང་ཟབ་སྤེལ་རྒྱུར་སྐུལ་འདེད་ཀྱང་གཏོང་དགོས།
“ལྔ་བསྡུར་བྱེད་ཐབས ”ཀྱི་ཉམས་མྱོང་སློབ་སྦྱོང་བྱ་རྒྱུ་ནི་སྔོན་གཏོད་ལེགས་བརྩོན་གྱི་བྱེད་སྒོའི་ཁྲོད་ཀྱི་ཏང་ཡོན་འགོ་ཁྲིད་ལས་བྱེད་པའི་མཛུབ་ཁྲིད་ཀྱི་ནུས་པ་དང་ཞུགས་ཚད་འགན་ལེན་བྱ་རྒྱུ་དེ་ཡིན། འགོ་ཁྲིད་ལས་བྱེད་པ་ལས་སྒོའི་ལས་ཀ་བྲེལ་བ་ཆེ་བས་གཞི་རིམ་དུ་སྤེལ་བའི་སྔོན་གཏོད་ལེགས་བརྩོན་གྱི་བྱེད་སྒོའི་ཁྲོད་རྟག་ཏུ་སྤྱིར་བཏང་གི་འབོད་སྐུལ་ཞིག་ལ་མགོ་འཁོར་ནས་དངོས་སུ་ཞུགས་དཀའ་བ་ཞིག་ཡོད། འགོ་ཁྲིད་ཀྱིས་དཔྱད་བརྗོད་བྱེད་པར་འགོ་ཁྲིད་ལས་བྱེད་པས་བརྟག་ཞིབ་ནན་ཏན་དང་གནད་དོན་ལ་བསམ་གཞིག་བྱས་ཏེ་གནད་དོན་དེ་གནད་ལ་འཁེལ་བ་ཞིག་བལྟ་ཐུབ་པ་དང་། གནད་འགག་གླེང་ཐུབ་པ། དབྱེ་ཞིབ་དེ་བས་མཐར་ཕྱིན་པ་ཞིག་ཐུབ་པ་བཅས་ཀྱི་བླང་བྱ་འདོན་དགོས། དེས་གཞི་རིམ་ཏང་རྩ་འཛུགས་དང་ཏང་ཡོན་ཚོས་ལས་འགན་སྒྲུབ་པ་དང་ཁ་དན་ཚིག་གནས་བྱ་ཚུལ་ལ་ལྟ་སྐུལ་ཞིབ་བཤེར་བྱེད་ཤུགས་ཆེ་རུ་གཏོང་ཐུབ་པ་དང་ཆབས་ཅིག་འགོ་ཁྲིད་ལས་བྱེད་པས་དེ་བས་གཏིང་ཟབ་ངང་སྔོན་གཏོད་ལེགས་བརྩོན་གྱི་བྱེད་སྒོའི་ནང་ཞུགས་རྒྱུ་དང་མཛུབ་ཁྲིད་བྱ་རྒྱུར་སྐུལ་མ་ཡང་གཏོང་ཐུབ།
“ལྔ་བསྡུར་བྱེད་ཐབས ”ཀྱི་ཉམས་མྱོང་སློབ་སྦྱོང་བྱ་རྒྱུ་ནི་སྔོན་གཏོད་ལེགས་བརྩོན་གྱི་བྱེད་སྒོའི་ལམ་ལུགས་ཅན་དང་ཚད་ལྡན་ཅན་འགན་ལེན་བྱ་རྒྱུ་དེ་ཡིན། ལྷ་རི་རྫོང་གིས་སྔོན་གཏོད་ལེགས་བརྩོན་གྱི་བྱེད་སྒོའི་དཔྱད་བསྡུར་བྱ་ཐབས་བཟོས་པ་དང་ལས་ཀའི་ལས་འགན་གྲངས་ཚད་ཅན་དང་ཞིབ་ཕྲ་ཅན་བརྒྱུད་དུས་ཚོད་ངེས་གཏན་ངང་དཔྱད་བསྡུར་བྱས་པ་མ་ཟད་དཔྱད་བསྡུར་གྱི་གྲུབ་འབྲས་དེ་ལོ་མཇུག་གི་དཔྱད་ཞིབ་དང་། སྔོན་འདེམས་དང་ལེགས་འདེམས་སོགས་དང་ཟུང་འབྲེལ་བྱས་ནས་སྔོན་གཏོད་ལེགས་བརྩོན་གྱི་བྱེད་སྒོ་དེ “བྱས་རྗེས་རྫུས་མ ”དང “རླུང་འཚུབ་ཐེངས་གཅིག ”གི་གནད་དོན་ཞིག་ཏུ་འགྱུར་རྒྱུ་སྔོན་འགོག་བྱས་པ་དང་། རྫོང་ཨུད་ཀྱིས་དཔྱད་བསྡུར་བྱས་པ་དེས་སྔོན་གཏོད་ལེགས་བརྩོན་གྱི་བྱེད་སྒོ་དེ་ཏང་འཛུགས་སྐྱོང་བྱེད་པའི་རྒྱུན་གཏན་གྱི་ལས་དོན་གལ་ཆེན་ཞིག་ཏུ་དངོས་འབྲེལ་གྱུར་ཡོད་པ་རེད།
“ལྔ་བསྡུར་བྱེད་ཐབས ”ཀྱི་ཉམས་མྱོང་སློབ་སྦྱོང་བྱ་རྒྱུ་ནི་སྔོན་གཏོད་ལེགས་བརྩོན་གྱི་བྱེད་སྒོའི “མང་ཚོགས་ཀྱི་ཚད་གཞི ”ཞིག་ཏུ་འགན་ལེན་བྱ་རྒྱུ་དེ་ཡིན། སྔོན་ཐོན་དང་ཕུལ་བྱུང་ཡིན་མིན་ཐད་མང་ཚོགས་ནི་ཤན་འབྱེད་བྱེད་མཁན་ཡག་ཤོས་ཤིག་རེད། མང་ཚོགས་ཀྱི་དགོས་མཁོ་ནི་སྔོན་གཏོད་ལེགས་བརྩོན་གྱི་བླང་བྱ་ཡིན་པ་དང་མང་ཚོགས་ཀྱི་གནད་དོན་དངོས་ཐག་གཅོད་བྱ་རྒྱུ་ནི་སྔོན་གཏོད་ལེགས་བརྩོན་གྱི་གཙོ་གནད་ཡིན། དེར་བརྟེན་མང་ཚོགས་ཀྱིས་ཚད་ལེན་དཔྱད་བསྡུར་བྱེད་པར་གདེང་འཇོག་བྱེད་དབང་མང་ཚོགས་ལ་སྤྲད་དེ་སྔོན་གཏོད་ལེགས་བརྩོན་གྱི་བྱེད་སྒོའི་དམིགས་ཚད་མི་འཛོལ་བའི་འགན་ལེན་ཐུབ་པ་དང་ཆབས་ཅིག་སྔོན་གཏོད་ལེགས་བརྩོན་གྱི་བྱེད་སྒོར་རྒྱབ་སྐྱོར་དང་དེའི་ནང་ཞུགས་པའི་མང་ཚོགས་ཀྱི་སྤྲོ་སེམས་འཕེལ་བ་བྱས་ནས་སྔོན་གཏོད་ལེགས་བརྩོན་གྱི་ཚ་རླབས་ཤིག་འཕྱུར་རྒྱུར་སྐུལ་འདེད་གཏོང་དགོས།
ལྷ་རི་རྫོང་གི “ལྔ་བསྡུར་བྱེད་ཐབས ”ནི་སྔོན་གཏོད་ལེགས་བརྩོན་གྱི་བྱེད་སྒོའི་ཁྲོད་རང་ངོས་ཀྱི་དོན་དངོས་དང་བྱེད་སྒོའི་བླང་བྱ་དང་ཟུང་འབྲེལ་བྱས་པ་དང་སྔོན་ཆད་ཀྱི་ཏང་འཛུགས་སྐྱོང་གི་ཉམས་མྱོང་ཡག་པོ་དང་བྱེད་སྟངས་ཡག་པོ་སྤྱད་པའི་རྨང་གཞིའི་ཐོག་ལག་ལེན་ཧུར་ཐག་དང་བློ་ཁོག་ཆེན་པོས་འཚོལ་ཞིབ་བྱས་པའི་གྲུབ་འབྲས་ཤིག་རེད། མིག་སྔར་ལྗོངས་ཏང་ཨུད་ཀྱིས་ལྗོངས་ཡོངས་སུ་སྔོན་གཏོད་ལེགས་བརྩོན་གྱིས་གཞི་རིམ་སྟོབས་ཆེར་གཏོང་བ་དང་དམངས་འཚོར་ཕན་པ་འདོགས་པའི་བྱེད་སྒོ་གཏིང་ཟབ་སྤེལ་རྒྱུ་ཞིབ་འཇུག་དང་བཀོད་སྒྲིག་བྱས་ནས་ལྗོངས་ཡོངས་ཀྱི་འཕེལ་རྒྱས་དང་། བརྟན་ལྷིང་། གཞི་རིམ་གྱི་ཏང་འཛུགས་སྐྱོང་བཅས་འབྲེལ་ཡོད་ལས་ཀའི་ལས་འགན་གསར་པ་དང་། དམིགས་ཚད་གསར་པ། བླང་བྱ་གསར་པ་བཅས་བཏོན་ཡོད། དེར་བརྟེན་ལྗོངས་ཡོངས་ཀྱི་རིམ་ཁག་ཏང་རྩ་འཛུགས་དང་རྒྱ་ཆེའི་ཏང་ཡོན་ཚོས་ལས་ཀའི་དོན་དངོས་དང་ཟུང་འབྲེལ་གྱིས་ཀྲུང་དབྱང་གི་འགོ་ཁྲིད་བློ་མཐུན་གྱི་མཆན་འགོད་མཛུབ་སྟོན་གྱི་དགོངས་པ་སློང་སྦྱོང་གཏིང་ཟབ་དང་། ཧྲུའུ་ཅི་ཁྲེན་ཆོན་གོའི་གསུང་བཤད་ཀྱི་དགོངས་དོན་དང་བླང་བྱ་སློབ་སྦྱོང་གཏིང་ཟབ། ལྷ་རིའི “ལྔ་བསྡུར་བྱེད་ཐབས ”ཀྱི་ཉམས་མྱོང་སློབ་སྦྱོང་གཏིང་ཟབ་བཅས་བྱས་ནས་ལྗོངས་ཡོངས་ཀྱི་ཞབས་ཞུའི་ཚན་པ་དང་། ཞབས་ཞུའི་ལས་རིགས། སྲང་ལམ་སྡེ་ཁུལ། ལས་ཁུངས། ཁེ་ལས་བྱ་གཞག་ཚན་པ། སྤྱི་དབང་མིན་པའི་ལམ་ལུགས་ཀྱི་དཔལ་འབྱོར་རྩ་འཛུགས། སྤྱི་ཚོགས་ཀྱི་རྩ་འཛུགས་གསར་པ་སོགས་ཀྱི་ཁྱབ་ཁོངས་སུ་ལྷ་རི་རྫོང་གི “ལྔ་བསྡུར་བྱེད་ཐབས ”དེ་རྒྱ་ཆེར་བཏང་སྟེ་བྱེད་སྒོའི་རྣམ་པ་དང་གཞི་རྟེན་རྒྱུན་ཆད་མེད་པར་གསར་གཏོད་བྱེད་པ་དང་སྔོན་གཏོད་ལེགས་བརྩོན་གྱིས་གཞི་རིམ་སྟོབས་ཆེར་གཏོང་བ་དང་དམངས་འཚོར་ཕན་པ་འདོགས་པའི་བྱེད་སྒོ་ཏན་ཏིག་ངང་སྤེལ་ནས་བོད་ཀྱི་མཆོང་སྐྱོད་ལྟ་བུའི་འཕེལ་རྒྱས་དང་ཡུན་རིང་བདེ་འཁོད་ཀྱི་ཕུགས་ཕན་ལམ་སྲོལ་འཛུགས་དགོས།