མཐུན་སྦྱོར་དང་བརྟན་ལྷིང་ནི་སྒྱུར་བཅོས་དང་འཕེལ་རྒྱས་ཀྱི་སྔོན་འགྲོའི་ཆ་རྐྱེན་གལ་ཆེན་ཞིག་ཡིན་ལ་དཔལ་འབྱོར་མགྱོགས་མྱུར་འཕེལ་རྒྱས་གཏོང་བའི་རྩ་བའི་གནས་ས་ཞིག་ཀྱང་ཡིན། འདི་ལོའི་ལོ་སྟོད་དུ་རང་ལྗོངས་སུ་མི་རྣམས་དགའ་འོས་པའི་དཔལ་འབྱོར་འཕར་བའི་རྣམ་པ་མངོན་པ་དང་དཔལ་འབྱོར་ལེགས་ལ་མྱུར་བའི་སྒོ་ནས་འཕེལ་རྒྱས་འགྲོ་བའི་རྣམ་པ་རྒྱུན་འཁྱོངས་བྱུང་བ་དེ་དག་ཚང་མ་ནི་ལྗོངས་ཡོངས་ཀྱི་གོང་འོག་ཚང་མས་མཐུན་སྒྲིལ་རྡོག་རྩ་གཅིག་སྒྲིལ་ངང་ཐུན་མོང་ཐོག་འབད་བརྩོན་བྱས་པ་དང་རང་སྐྱོང་ལྗོངས་ཏང་ཨུད་དང་སྲིད་གཞུང་གིས་བློ་བརྟན་འགྱུར་མེད་ངང་སྤྱི་ཚོགས་མཐུན་སྦྱོར་དང་བརྟན་ལྷིང་སྲུང་སྐྱོང་བྱས་ཏེ་འཕེལ་རྒྱས་ཀྱི་ཁོར་ཡུག་བཟང་པོ་རྒྱུན་ཆད་མེད་པར་གཏོད་པ་ལས་བྱུང་བ་ཞིག་ཡིན།
ལོ་སྟོད་ཀྱི་དཔལ་འབྱོར་འཕེལ་རྒྱས་ཀྱི་གྲུབ་འབྲས་མི་རྣམས་དགའ་འོས་པ་ཞིག་ཡོད་པས་ང་ཚོས་ལོ་སྨད་དང་དེ་བཞིན་འབྱུང་འགྱུར་གྱི་ལས་དོན་ཡག་པོ་སྒྲུབ་ཆེད་རྨང་གཞི་བཟང་པོ་ཞིག་བཏིང་ཡོད་མོད། འོན་ཀྱང་མིག་སྔར་དཔལ་འབྱོར་མྱུར་ལ་སྐྱོན་བྲལ་ངང་འཕེལ་རྒྱས་འགྲོ་རྒྱུར་ཤུགས་རྐྱེན་བཟོ་བའི་གཏན་འཁེལ་མེད་པའི་རྒྱུ་རྐྱེན་མང་པོ་ཞིག་སྔར་བཞིན་གནས་པ་དང་ལྷག་པར་དུ་བརྟན་ལྷིང་སྲུང་སྐྱོང་གི་དུས་བབ་སྔར་བཞིན་ཛ་དྲག་པོ་ཡོད་པ་ང་ཚོས་ངེས་པར་དུ་རིག་པ་དྭངས་གསལ་གྱི་སྒོ་ནས་ངོས་འཛིན་ཐུབ་པ་བྱེད་དགོས། ཏཱ་ལའི་རུ་ཚོགས་དང་ནུབ་ཕྱོགས་དགྲ་ཡའི་ཕྱོགས་གཏོགས་ཀྱིས་བོད་འཕེལ་རྒྱས་ཀྱི་དུས་བབ་བཟང་པོ་མཐོང་འདོད་མི་བྱེད་པར་ཁ་ཕྲལ་དང་གཏོར་བཤིག་གི་བྱེད་སྤྱོད་མུ་མཐུད་ངན་སྐུལ་བྱས་ཏེ་རང་ལྗོངས་ཀྱི་དཔལ་འབྱོར་འཕེལ་རྒྱས་ཀྱི་སྒྲིག་ལམ་བཟང་པོར་འགལ་རྐྱེན་བཟོ་གི་ཡོད། དེར་བརྟེན་ང་ཚོས་བདེ་སྡོད་ཉེན་བསམ་དང་། ཚད་མཐོའི་མཐོང་ཆེན། ཕྱར་བ་གྲུ་འདེགས་བཅས་བྱས་ནས་ལྗོངས་ཡོངས་ཀྱི་མཐུན་སྒྲིལ་བརྟན་ལྷིང་གི་དུས་བབ་སྲུང་སྐྱོང་མཐའ་གཅིག་ཏུ་བྱས་ཏེ་དཔལ་འབྱོར་འཕེལ་རྒྱས་དང་དར་རྒྱས་ཡོང་རྒྱུ་འགན་ལེན་བྱེད་དགོས། མིག་སྔར་ལྗོངས་ཡོངས་ཀྱི་གོང་འོག་ཚང་མས་སྤྱི་ཁྱབ་ཧྲུའུ་ཅི་ཧུའུ་ཅིན་ཐའོ་ཡི “བདུན་གཅིག ”གསུང་བཤད་གལ་ཆེན་གྱི་དགོངས་དོན་སློབ་སྦྱོང་གཏིང་ཟབ་བྱ་རྒྱུ་སྤྱི་འདོམས་སུ་བྱེད་པ་དང་ཀྲུའུ་ཞི་གཞོན་པ་ཞིས་ཅིན་ཕིང་བོད་ཞི་བས་བཅིངས་འགྲོལ་བཏང་ནས་ལོ་60འཁོར་བའི་རྟེན་འབྲེལ་མཛད་སྒོར་ཞུགས་སྐབས་གནང་བའི་གསུང་བཤད་གལ་ཆེན་རབ་དང་རིམ་པའི་དགོངས་དོན་སློབ་སྦྱོང་དང་ལག་བསྟར་ནན་ཏན་བྱས་ཏེ་ཀྲུང་དབྱང་གིས “ལོ་ལྔ་ཚན་བཅུ་གཉིས་པའི ”འཆར་འགོད་ཁྱོན་ཡོངས་ནས་ལག་བསྟར་བྱེད་པ་དང་། ནུབ་རྒྱུད་ཐོན་འབྱེད་ཆེ་མོའི་འཐབ་ཇུས་ལག་བསྟར་གཏིང་ཟབ་བྱེད་པ། བོད་ཀྱི་འཕེལ་རྒྱས་ལ་རོགས་སྐྱོར་བྱེད་ཤུགས་ཆེ་རུ་གཏོང་བ་སོགས་རྩ་ཆེའི་གོ་སྐབས་དམ་འཛིན་ནན་པོ་བྱེད་པ་དང་། སྒྱུར་འཕེལ་བརྟན་གསུམ་གྱི་འབྲེལ་བ་ནན་ཏན་ངང་ཐག་གཅོད་ཡག་པོ་བྱེད་པ། སྤྱི་ཚོགས་མཐུན་སྦྱོར་དང་བརྟན་ལྷིང་ཡོང་རྒྱུར་སྐུལ་འདེད་ཏན་ཏིག་གཏོང་བ་བཅས་བྱས་ཏེ “ལོ་ལྔ་ཚན་བཅུ་གཉིས་པའི ”ལས་འགོ་ཡག་པོ་ཞིག་འཛུགས་རྒྱུའི་འགན་ལེན་བྱེད་དགོས།
སྤྱི་ཚོགས་མཐུན་སྦྱོར་དང་བརྟན་ལྷིང་ཡོང་རྒྱུར་སྐུལ་འདེད་ཏན་ཏིག་གཏོང་བར་བརྟན་ལྷིང་སྲུང་སྐྱོང་ལས་དོན་སྐོར་གྱི་ཀྲུང་དབྱང་དང་རང་སྐྱོང་ལྗོངས་ཀྱི་བཀོད་སྒྲིག་རབ་དང་རིམ་པའི་དགོངས་དོན་ལག་བསྟར་དོན་འཁྱོལ་ནན་ཏན་བྱས་ཏེ་ཁ་ཕྲལ་ལ་ངོ་རྒོལ་བྱེད་པའི་འཐབ་རྩོད་ལ་འཕྲད་པའི་ཛ་དྲག་གི་དུས་བབ་ལ་ངོས་འཛིན་གང་ལེགས་བྱེད་པ་དང་། ཁ་ཕྲལ་ལ་ངོ་རྒོལ་བྱེད་པའི་བསམ་བློའི་སློབ་གསོ་རྒྱ་ཁྱབ་ངང་སྤེལ་བ། ཏཱ་ལ་དང་ཏཱ་ལའི་རུ་ཚོགས་ཀྱི་ངོ་བོར་ངོས་འཛིན་གཏིང་ཟབ་བྱེད་པ་བཅས་བྱས་ཏེ་མི་རིགས་ཁག་གི་ལས་བྱེད་པ་དང་མང་ཚོགས་ཚོས་ཏཱ་ལ་དང་ཏཱ་ལའི་རུ་ཚོགས་ཀྱི་ཆབ་སྲིད་ཐོག་གི་ལོག་སྤྱོད་རང་བཞིན་དང་། ཆོས་ལུགས་ཐོག་གི་གཡོ་རྫུས་རང་བཞིན། བྱ་ཐབས་ཐོག་གི་མགོ་སྐོར་རང་བཞིན་བཅས་གསལ་རྟོགས་ཏན་ཏིག་ཐུབ་པ་བྱས་ནས་ཁ་ཕྲལ་ལ་ངོ་རྒོལ་བྱེད་པའི་འཐབ་རྩོད་ཀྱི་བློ་བརྟན་འགྱུར་མེད་ཀྱི་རང་བཞིན་དང་། རང་རྟོགས་རང་བཞིན། རང་འགུལ་རང་བཞིན་བཅས་སྔར་བས་ཆེ་རུ་གཏོང་དགོས། བོད་ཞི་བས་བཅིངས་འགྲོལ་བཏང་ནས་ལོ་60འཁོར་བའི་རྟེན་འབྲེལ་ཆེ་མོའི་བརྟན་ལྷིང་སྲུང་སྐྱོང་གི་གྲུབ་འབྲས་སྲ་བརྟན་དུ་གཏོང་བ་དང་། ཇུས་གཞི་སྔར་བས་ཞིབ་ཚགས་སུ་གཏོང་བ། བྱེད་ཐབས་ལ་ཤུགས་སྣོན་རྒྱག་པ། འགན་འཁྲི་དོན་འཁྱོལ་བྱེད་པ། ཁ་ཕྲལ་པ་དང་དགྲ་ཡའི་ཕྱོགས་གཏོགས་ཀྱི་གནས་ཚུལ་ཁོང་དུ་ནན་པོ་ཆུད་པ་བྱེད་པ། ཁ་ཕྲལ་དང་གཏོར་བཤིག་གི་བྱེད་སྤྱོད་སྣ་ཚོགས་ལ་རྡུང་རྡེག་ཚ་ནན་གཏོང་བ་བཅས་བྱས་ཏེ་མཐུན་སྦྱོར་བརྟན་ལྷིང་གི་དུས་བབ་བཟང་པོ་སྲུང་སྐྱོང་མཐའ་གཅིག་ཏུ་བྱེད་དགོས།
སྤྱི་ཚོགས་མཐུན་སྦྱོར་དང་བརྟན་ལྷིང་ཡོང་རྒྱུར་སྐུལ་འདེད་ཏན་ཏིག་གཏོང་བར་མི་རིགས་མཐུན་སྒྲིལ་གྱི་སློབ་གསོ་མུ་མཐུད་སྤེལ་བ་དང་། “ཁ་འབྲལ་ཐབས་མེད་པ་གསུམ ”གྱི་བསམ་བློ་བརྟན་པོ་འཛུགས་པ། མི་རིགས་མཐུན་སྒྲིལ་དང་། སྤེལ་རེས། མཉམ་འདྲེས་བཅས་ལ་སྐུལ་འདེད་ཧུར་ཐག་གཏོང་བ་བཅས་བྱས་ཏེ་མི་རིགས་ཁག་གི་ལས་བྱེད་པ་དང་མང་ཚོགས་ཚོར་ཀྲུང་ཧྭ་མི་རིགས་ཀྱི་སྣ་མང་གཞི་གཅིག་ཅན་གྱི་ཆགས་སྟངས་ལ་གནད་ལ་འཁེལ་བའི་སྒོ་ནས་ངོས་འཛིན་བྱ་རྒྱུར་ཁྲིད་སྟོན་བྱེད་དགོས། སྤྱི་ཚོགས་བདེ་འཇགས་ཐད་ཀྱི་མངོན་གསལ་དོད་པའི་གནད་དོན་དང་གཙོ་གནད་ས་ཁུལ་གཅིག་སྡུད་བཅོས་སྒྲིག་གཏིང་ཟབ་བྱེད་པ་དང་ཡིག་བསྐུར་ངོ་བཅར་ལས་དོན་སྤེལ་ཤུགས་སྔར་བས་ཆེ་རུ་གཏོང་བའི་ཁར་སྤྱི་ཚོགས་ཀྱི་གནས་ཚུལ་དང་དམངས་ཀྱི་འདོད་བློ་དུས་ཐོག་ཏུ་ཁོང་དུ་ཆུད་པ་བྱེད་པ་དང་། སྤྱི་ཚོགས་ཐོག་གི་མང་ཚོགས་ཀྱི་གླེང་ཕྱོགས་ལ་དུས་ཐོག་ཏུ་ཁྲིད་སྟོན་བྱེད་པ། མི་མངོན་པའི་རྐྱེན་ངན་གྱི་མངོན་ཚུལ་ཐོན་མ་ཐག་དུས་ཐོག་ཏུ་མེད་པ་བཟོ་བ་བཅས་བྱས་ཏེ་ཏཱ་ལའི་རུ་ཚོགས་དང་དགྲ་ཡའི་ཕྱོགས་གཏོགས་གཞན་དག་གིས་ཐེ་ཇུས་དང་བེད་སྤྱོད་བྱ་རྒྱུར་དོགས་ཟོན་ནན་པོ་བྱེད་དགོས། སྤྱི་ཚོགས་དོ་དམ་སྒྲིག་སྲོལ་འཐུས་ཚང་དང་གསར་གཏོད་བྱེད་པ་དང་ཕྱོགས་མིར་ཞབས་ཞུ་དང་དོ་དམ་བྱ་རྒྱུར་ཤུགས་སྣོན་བརྒྱབ་སྟེ་དོ་དམ་གོ་རིམ་ལྡན་པ་དང་། ཞབས་ཞུ་འཐུས་ཚང་། ཤེས་དཔལ་འཆམ་མཐུན་བཅས་ཀྱི་གྲོང་ཁྱེར་དང་གྲོང་གསེབ་ཀྱི་སྡེ་ཁུལ་གསར་པ་ཞིག་བསྐྲུན་དགོས།
སྤྱི་ཚོགས་མཐུན་སྦྱོར་དང་བརྟན་ལྷིང་ཡོང་རྒྱུར་སྐུལ་འདེད་ཏན་ཏིག་གཏོང་བར་བདེ་འཇགས་ཐོན་སྐྱེད་ལས་དོན་ལ་ཚད་མཐོའི་མཐོང་ཆེན་བྱས་ཏེ་གཞུང་ལམ་འགྲིམ་འགྲུལ་དང་། དམངས་སྤྱོད་མཁའ་འགྲུལ་དང་ལྕགས་ལམ། བཟོ་སྐྲུན་ཨར་ལས། གཏེར་རིའི་ཐོན་སྐྱེད། མེ་ཟོན་མེ་གསོད་སོགས་ལས་རིགས་ཁྱབ་ཁོངས་ཀྱི་བདེ་འཇགས་ཐོན་སྐྱེད་ལ་གཙོ་གནད་ཐོག་དམ་འཛིན་ཡག་པོ་བྱེད་དགོས། ལྷག་པར་དུ་ཡུལ་སྐོར་སྤྲོ་འཆམ་བྱེད་མཁན་མང་བའི་དུས་འཆར་བ་དང་གཞུང་ལམ་འགྲིམ་འགྲུལ་གྱི་བདེ་འཇགས་ལས་འཛོལ་ཐོན་མང་བས་འབྲེལ་ཡོད་སྡེ་ཚན་དང་ས་ཁུལ་གྱིས་ངེས་པར་དུ་འགན་འཁྲི་དོན་འཁྱོལ་ཏན་ཏིག་བྱེད་པ་དང་། བྱེད་ཐབས་ལ་ཤུགས་སྣོན་རྒྱག་པ། སྔོན་འགོག་ནུས་ལྡན་བྱེད་པ་བཅས་བྱས་ཏེ་འགྲིམ་འགྲུལ་ལས་འཛོལ་དང་ལྷག་པར་དུ་ལས་འཛོལ་ཚབས་ཆེན་ཐོན་རྒྱུ་སྔོན་འགོག་ནན་པོ་བྱེད་དགོས།
སྤྱི་ཚོགས་མཐུན་སྦྱོར་དང་བརྟན་ལྷིང་ཡོང་རྒྱུར་སྐུལ་འདེད་ཏན་ཏིག་གཏོང་བར་ཏང་སྲོལ་སྲིད་གཙང་འཛུགས་སྐྱོང་ལ་རྒྱུན་ཆད་མེད་པར་ཤུགས་སྣོན་རྒྱག་པ་དང་། རུལ་རྒོལ་གཙང་སྤེལ་དང་ལྟ་སྐུལ་ཞིབ་བཤེར་བྱ་ཤུགས་ཆེ་རུ་གཏོང་བ། ས་ཞིང་བོགས་མར་གཏོང་རྒྱུར་ཆོག་མཆན་སྤྲོད་པ་དང་། ལས་གྲྭའི་འོས་འགུགས་འོས་དཔོད། སྲིད་གཞུང་གི་ཉོ་སྒྲུབ། གཏེར་ཐོན་ཐོན་ཁུངས་གསར་སྤེལ་སོགས་ཁྱབ་ཁོངས་སུ་རུལ་རྒོལ་གཙང་སྤེལ་བྱེད་ཤུགས་ཆེ་རུ་གཏོང་བ་བཅས་བྱས་ཏེ་ལས་ཀའི་བྱེད་ཐབས་ཁག་ནུས་ལྡན་ངང་དོན་འཁྱོལ་ཐུབ་རྒྱུ་འགན་ལེན་བྱེད་དགོས།