ལྗོངས་ཏང་ཨུད་སྐབས་བདུན་པའི་ཨུ་ལྷན་ཚང་འཛོམས (རྒྱ་ཆེ )ཚོགས་འདུ་ཐེངས་བརྒྱད་པའི་ཐོག་ཏང་གི་འགོ་ཁྲིད་མཐའ་འཁྱོངས་ཀྱིས་ཏང་འཛུགས་སྐྱོང་ལ་ཤུགས་སྣོན་རྒྱག་པ་དང་དེ་ལེགས་སུ་གཏོང་རྒྱུ་ནི་རང་ལྗོངས་ཀྱི་ལས་དོན་ཁག་ཡག་པོ་བསྒྲུབ་པའི་རྩ་བའི་འགན་ལེན་ཡིན་པས་ང་ཚོས་ངེས་པར་དུ་ཞིབ་ཕྲའི་བླང་བྱ་གནད་འཁེལ་པོས་སྟངས་འཛིན་བྱེད་པ་དང་། བསམ་བློའི་ངོས་འཛིན་ཟབ་ཏུ་གཏོང་བ། འབྲེལ་ཡོད་ཀྱི་ཞིབ་ཕྲའི་སྲིད་ཇུས་འདོན་པ། དོན་འཁྱོལ་བྱ་ཐབས་ཁག་ཞིབ་ཚགས་བཟོ་བ། ལས་དོན་ཁག་ཏན་ཏིག་ངང་ཡག་པོ་བསྒྲུབ་པ་བཅས་བྱས་ཏེ་ཏང་འཛུགས་སྐྱོང་གི་ཚན་རིག་ཅན་གྱི་ཆུ་ཚད་མཐོ་རུ་གཙོ་གནད་དུ་གཏོང་དགོས་པའི་ནན་བཤད་བྱས་ཡོད།
བློ་མཐུན་ཞིས་ཅིན་ཕིང་གིས་བོད་ཞི་བས་བཅིངས་འགྲོལ་བཏང་ནས་ལོ་60འཁོར་བའི་རྟེན་འབྲེལ་མཛད་སྒོར་ཞུགས་རིང་གནང་བའི་གསུང་བཤད་གལ་ཆེན་རབ་དང་རིམ་པའི་ནང་ཏང་འཛུགས་སྐྱོང་བྱེད་པའི་ཚན་རིག་ཅན་གྱི་ཆུ་ཚད་ཕྱོགས་ཡོངས་ནས་མཐོ་རུ་བཏང་སྟེ་བོད་ཀྱི་མི་རིགས་ཁག་གི་མང་ཚོགས་ལ་མཐུན་སྒྲིལ་དང་སྣེ་ཁྲིད་ཀྱིས་མཆོང་སྐྱོང་ལྟ་བུའི་འཕེལ་རྒྱས་དང་ཡུན་རིང་བདེ་འཁོད་ལ་སྐུལ་འདེད་གཏོང་བའི་རྒྱང་སྐྱོད་ལམ་བུའི་ཁྲོད་འགོ་ཁྲིད་ཀྱི་སྲོག་ཤིང་ནུས་པ་དང་འཐབ་འཛིང་གི་མཁར་རྫོང་ནུས་པ་དེ་བས་ལེགས་པའི་སྒོ་ནས་འདོན་སྤེལ་བྱེད་དགོས་ལུགས་བསྟན་གནང་བ་དང་ལས་བྱེད་པའི་ལས་དོན་ཁྲོད་སྤྱོད་ཡོན་གཉིས་ལྡན་དང་ཀུན་སྤྱོད་སྔོན་ལ་འཇོག་པའི་མི་སྤྱོད་ཚད་གཞི་མཐའ་འཁྱོངས་བྱེད་དགོས་པའི་ནན་གསུངས་གནང་ཞིང་། ཀུན་སྤྱོད་དེ་དང་ཐོག་ཆབ་སྲིད་ཀྱི་ལངས་ཕྱོགས་ལ་བལྟ་དགོས་པ་དང་བོད་དུ་མེས་རྒྱལ་གཅིག་གྱུར་སྲུང་སྐྱོང་དང་མི་རིགས་ཁ་ཕྲལ་ལ་ངོ་རྒོལ་བྱེད་པའི་བསམ་བློའི་ངོས་འཛིན་དང་མཚོན་ཚུལ་ངོ་མར་བལྟ་དགོས། གསུང་བཤད་ནང་ད་དུང་འགོ་ཁྲིད་ཚན་ཁག་འཛུགས་སྐྱོང་དང་། ལས་བྱེད་པའི་དཔུང་ཁག་འཛུགས་སྐྱོང་། ཞིང་འབྲོག་ཁུལ་གྱི་གཞི་རིམ་ཏང་རྩ་འཛུགས་འཛུགས་སྐྱོང་། སྤྱོད་ཚུལ་འཛུགས་སྐྱོང་སོགས་ལ་ཤུགས་སྣོན་རྒྱག་པའི་ཐད་ཞིབ་ཕྲའི་བླང་བྱ་རབ་དང་རིམ་པ་བཏོན་ཡོད། དེ་དག་ཚང་མ་ལས་ཏང་འཛུགས་སྐྱོང་གི་རླབས་ཆེའི་འདུ་འགོད་གསར་པར་མུ་མཐུད་སྐུལ་འདེད་ཏན་ཏིག་གཏོང་བའི་ཐད་ང་ཚོར་ཞིབ་ཕྲའི་བླང་བྱ་བཏོན་ཡོད། བླང་བྱ་གལ་ཆེན་དེ་དག་ཕྱོགས་ཡོངས་ནས་དོན་འཁྱོལ་བྱས་ན་རང་ལྗོངས་ཀྱི་ཏང་འཛུགས་སྐྱོང་ལ་འཕྲད་པའི་གནད་དོན་ཐག་གཅོད་བྱ་རྒྱུར་སྐུལ་འདེད་གཏོང་བ་དང་ཏང་འཛུགས་སྐྱོང་བྱེད་པའི་ཚན་རིག་ཅན་གྱི་ཆུ་ཚད་མཐོ་རུ་གཏོང་ཐུབ་པ་མ་ཟད། མཆོང་སྐྱོང་ལྟ་བུའི་འཕེལ་རྒྱས་དང་ཡུན་རིང་བདེ་འཁོད་ལ་སྐུལ་འདེད་གཏོང་རྒྱུའི་ཐད་འགྱུར་མེད་སྟོབས་ལྡན་གྱི་ཆབ་སྲིད་ཀྱི་འགན་ལེན་བྱེད་ཐུབ།
ལོ་རྒྱུས་ཀྱི་ཆ་རྐྱེན་གསར་པའི་འོག་ཏང་འཛུགས་སྐྱོང་བྱེད་པའི་ཚན་རིག་ཅན་གྱི་ཆུ་ཚད་མཐོ་རུ་གཏོང་བར་ངེས་པར་དུ་རིགས་པའི་གཞུང་ལུགས་ཀྱིས་དྲག་ཆས་སྤྲོས་རྒྱུར་ཤུགས་སྣོན་རྒྱག་དགོས། དེའང་ཆེས་རྩ་བ་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་རིགས་པའི་གཞུང་ལུགས་ཀྱི་མ་ལག་ལ་བརྟེན་ནས་བསམ་བློར་དྲག་ཆས་སྤྲོས་རྒྱུ་མཐའ་འཁྱོངས་བྱེད་དགོས་པ་དང་འགག་རྩ་ནི་ཚན་རིག་དང་མཐུན་པའི་གོང་འཕེལ་ལྟ་བ་སློབ་སྦྱོང་དང་ལག་བསྟར་བྱེད་པ་དང་སྤྱི་ཁྱབ་ཧྲུའུ་ཅི་ཧུའུ་ཅིན་ཐའོ་ཡིས་གནང་བའི “བདུན་གཅིག ”གི་གསུང་བཤད་གལ་ཆེན་དང་བློ་མཐུན་ཞིས་ཅིན་ཕིང་གིས་བོད་ཞི་བས་བཅིངས་འགྲོལ་བཏང་ནས་ལོ་60འཁོར་བའི་རྟེན་འབྲེལ་མཛད་སྒོར་ཞུགས་རིང་གནང་བའི་གསུང་བཤད་གལ་ཆེན་རབ་དང་རིམ་པའི་དགོངས་དོན་སློབ་སྦྱོང་ནན་ཏན་བྱེད་པ་དང་གོ་བ་ཡག་པོ་བླངས་ཏེ་ཕུགས་བསམ་བརྟན་པོ་འཛུགས་པ་དང་། ཁ་ཕྱོགས་གསལ་པོ། དམིགས་ཚད་གསལ་པོ་བཟོ་བ་བཅས་ཀྱི་ཐོག་ནས་ཏང་དང་མི་དམངས་དང་བློ་སེམས་གཅིག་སྒྲིལ་ཡོང་རྒྱུ་མཐའ་འཁྱོངས་བྱེད་དགོས་པ་དང་། ངེས་པར་དུ་འགོ་ཁྲིད་ཚན་ཁག་དང་ལས་བྱེད་པའི་དཔུང་ཁག་འཛུགས་སྐྱོང་བྱ་རྒྱུར་ཤུགས་སྣོན་རྒྱག་དགོས། སྤྱོད་ཡོན་གཉིས་ལྡན་དང་ཀུན་སྤྱོད་སྔོན་ལ་འཇོག་པའི་མི་སྤྱོད་ཀྱི་ཚད་གཞི་མཐའ་འཁྱོངས་ཀྱིས་ལས་གནས་ཀྱི་འགན་འཁྲི་བསྒྲུབས་པ་དང་། ཁ་ཚ་དགོས་གཏུགས་དང་། དཀའ་ངལ་ཆེ་བ། ཉེན་ཁ་ཆེ་བ། ལྕི་བ་བཅས་ཀྱི་ལས་འགན་ལེགས་སྒྲུབ་བྱེད་པ། འགག་རྩའི་སྐབས་འཇོན་ཐང་འདོན་པ་སོགས་ཀྱི་ཐད་ནས་ལས་བྱེད་པའི་སྤྱོད་ཡོན་ལ་རྟོག་ཞིབ་བྱས་ཏེ་ཆབ་སྲིད་ཐད་བློས་འགེལ་ཆོག་པ་དང་། ལས་ཀའི་ཐད་འཇོན་ཐང་ཡོད་པ། མི་དམངས་མང་ཚོགས་ཀྱིས་ཡིད་ཆེས་བྱེད་ཆོག་པ་བཅས་ཀྱི་བྱང་ཚད་མཐོ་བའི་ལས་བྱེད་པའི་དཔུང་ཁག་འཛུགས་སྐྱོང་ཧུར་ཐག་བྱེད་དགོས་པ་དང་། ངེས་པར་དུ་ཏང་གི་གཞི་རིམ་འཛུགས་སྐྱོང་བྱ་རྒྱུར་ཤུགས་སྣོན་རྒྱག་དགོས། “བཟང་པོ་ལྔ ”ཡི་བླང་བྱ་གཞིར་བཟུང་ཞིང་འབྲོག་ཁུལ་གྱི་གཞི་རིམ་རྩ་འཛུགས་འཛུགས་སྐྱོང་ལ་ཕྱོགས་ཡོངས་ནས་ཤུགས་སྣོན་བརྒྱབ་སྟེ་ཀྲི་པུའུ་གཅིག་འཛུགས་སྐྱོང་ཡག་པོ་བྱེད་པ་དང་ཀྲི་པུའུ་ཧྲུའུ་ཅི་གཅིག་བཀོད་སྒྲིག་ཡག་པོ་བྱ་རྒྱུར་འབད་བརྩོན་བྱེད་དགོས། སྔོན་གཏོད་ལེགས་བརྩོན་གྱི་བྱེད་སྒོ་དང་གཞི་རིམ་འཛུགས་སྐྱོང་ལ་ཤུགས་སྣོན་རྒྱག་པའི་ལོའི་བྱེད་སྒོ་མུ་མཐུད་གཏིང་ཟབ་སྤེལ་ནས་ཚན་རིག་དང་མཐུན་པའི་འཕེལ་རྒྱས་གཏོང་རྒྱུ་སྔོན་ལ་ལག་བསྟར་བྱེད་པ་དང་སྤྱི་ཚོགས་མཐུན་སྦྱོར་གྱི་ལེགས་ཆ་བརྩོན་ལེན་བྱ་རྒྱུ་དེ་རྒྱུན་ལྡན་གྱི་བླང་བྱར་བརྩིས་ཏེ་གཞི་རིམ་ཏང་རྩ་འཛུགས་ཀྱི་འཐབ་ནུས་དང་། གསར་གཏོད་ཀྱི་ནུས་པ། གོང་བུ་སྒྲིལ་ཤུགས་བཅས་ཕྱོགས་ཡོངས་ནས་ཆེ་རུ་གཏོང་དགོས། ཏང་ཀྲི་པུས་ལྟེ་བ་བྱས་པའི་གཞི་རིམ་རྩ་འཛུགས་ཀྱི་ལེ་ལག་འཛུགས་སྐྲུན་ལ་ཤུགས་སྣོན་རྒྱག་པ་དང་ཏང་འཛུགས་སྐྱོང་གིས་མང་ཚོགས་ཀྱི་རྩ་འཛུགས་འཛུགས་སྐྱོང་ལ་སྐུལ་ཁྲིད་བྱས་ཏེ་ཆབ་སྲིད་ཀྱི་ལེགས་ཆ་དང་། རྩ་འཛུགས་ཀྱི་ལེགས་ཆ། ལས་ཀའི་ལེགས་ཆ་བཅས་ཆེན་པོ་ཞིག་ཆགས་པ་བྱེད་དགོས་པ་དང་། ངེས་པར་དུ་ལམ་ལུགས་འཛུགས་སྐྱོང་བྱ་རྒྱུར་ཤུགས་སྣོན་རྒྱག་དགོས། དམངས་གཙོ་གཅིག་སྡུད་ལམ་ལུགས་འཐུས་ཚང་དུ་གཏོང་རྒྱུ་གཙོ་གནད་དུ་བྱས་ཏེ་ལམ་ལུགས་བཟོ་རྒྱུར་ཤུགས་སྣོན་རྒྱག་པ་དང་། དམངས་གཙོའི་རྨང་གཞིའི་སྟེང་གི་གཅིག་སྡུད་དང་གཅིག་སྡུད་མཛུབ་ཁྲིད་འོག་གི་དམངས་གཙོ་ཟུང་འབྲེལ་བྱ་རྒྱུ་མཐའ་འཁྱོངས་བྱེད་པ། ཏང་ཡོན་གྱི་དམངས་གཙོའི་དབང་ཆ་དོན་འཁྱོལ་བྱ་རྒྱུ་རྩ་བར་བྱེད་པ། ཏང་ནང་གི་གཞི་རིམ་དམངས་གཙོ་འཛུགས་སྐྱོང་ལ་ཤུགས་སྣོན་རྒྱག་རྒྱུ་དེ་རྨང་གཞིར་བྱེད་པ་བཅས་ཀྱི་ཐོག་ནས་དམངས་གཙོ་གཅིག་སྡུད་ལམ་ལུགས་དེ་ཏང་ནང་གི་དམངས་གཙོ་འཛུགས་སྐྱོང་གི་བརྒྱུད་རིམ་ཧྲིལ་པོར་ཁྱབ་པ་བྱས་ནས་ཕྱར་བ་གྲུ་འདེགས་ཀྱིས་ཏང་འཛུགས་སྐྱོང་ལ་སྐུལ་འདེད་གཏོང་བ་དང་ཏང་གི་ལས་དོན་ཁག་ཡག་པོ་སྒྲུབ་པའི་མཉམ་ཤུགས་ཆེན་པོ་ཞིག་ཆགས་པ་བྱེད་དགོས་པ་དང་། ངེས་པར་དུ་རུལ་རྒོལ་གཙང་སྤེལ་འཛུགས་སྐྱོང་བྱ་རྒྱུར་ཤུགས་སྣོན་རྒྱག་དགོས། རྩ་ལག་མཉམ་བཅོས་དང་། ཕྱོགས་བསྡུས་བཅོས་སྐྱོང་། ཆད་གཅོད་དང་སྔོན་འགོག་མཉམ་སྤྱོད་བྱེད་པ། སྔོན་འགོག་ལ་སྣང་ཆེན་བྱེད་པ་བཅས་ཀྱི་བྱེད་ཕྱོགས་མཐའ་འཁྱོངས་ཀྱིས་ཏང་སྲོལ་སྲིད་གཙང་འཛུགས་སྐྱོང་གི་འགན་འཁྲིའི་ལམ་ལུགས་དོན་འཁྱོལ་གཏིང་ཟབ་བྱེད་པ་དང་། རུལ་རྒོལ་གཙང་སྤེལ་གྱི་དྲིལ་བསྒྲགས་སློབ་གསོ་གཏིང་ཟབ་སྤེལ་བ། རུལ་རྒོལ་གཙང་སྤེལ་གྱི་ཁྲིམས་སྲོལ་དང་ལམ་ལུགས་འཐུས་ཚང་དུ་གཏོང་བ། དབང་ཆ་སྤྱོད་རྒྱུར་ལྟ་སྐུལ་ཚོད་འཛིན་བྱེད་པའི་ལམ་སྲོལ་འཐུས་ཚང་དུ་གཏོང་བ། རུལ་རྒོལ་གཙང་སྤེལ་གྱི་སྒྲིག་གཞིའི་ལམ་སྲོལ་སྒྱུར་བཅོས་དང་གསར་གཏོད་བྱེད་པ། མང་ཚོགས་ཀྱི་ཁེ་ཕན་ལ་གནོད་པའི་ཚུལ་མིན་སྤྱོད་ཚུལ་དང་སྤྱི་ཚོགས་ཀྱི་སྤྱོད་ཚུལ་ངན་པ་ཡོ་བསྲང་བྱེད་པ། རུལ་སུངས་བར་ཉེས་ཆད་གཅོད་པ་དང་རུལ་སུངས་ཀྱི་སྣང་ཚུལ་བཅོས་སྐྱོང་བྱས་ཐོག་རུལ་སུངས་ལ་བཀག་འགོག་ནུས་ལྡན་བྱེད་པ་དང་བློ་ཐག་ཆོད་པོས་ཉེས་ཆད་གཅོད་པ་བཅས་བྱེད་དགོས།
ཏང་འཛུགས་སྐྱོང་བྱེད་པའི་ཚན་རིག་ཅན་གྱི་ཆུ་ཚད་མཐོ་རུ་གཏོང་རྒྱུ་དེ་མཐར་གཏུགས་ནས་བཤད་ན་མར་ཁེ་སི་རིང་ལུགས་ཀྱི་སྲིད་སྐྱོང་ཏང་འཛུགས་སྐྱོང་བྱེད་པའི་ཆོས་ཉིད་རང་རྟོགས་ངང་ཁོང་དུ་ཆུད་པ་དང་བེད་སྤྱོད་བྱ་རྒྱུ་དེ་ཡིན། མིག་སྔར་ལྗོངས་ཏང་ཨུད་སྐབས་བདུན་པའི་ཨུ་ལྷན་ཚང་འཛོམས (རྒྱ་ཆེ )ཚོགས་འདུ་ཐེངས་བརྒྱད་པའི་དགོངས་དོན་ལག་བསྟར་དོན་འཁྱོལ་བྱེད་པའི་བརྒྱུད་རིམ་ཁྲོད་གནས་ཚུལ་གསར་པ་དང་གནད་དོན་གསར་པར་བརྟག་དཔྱད་དང་ཞིབ་འཇུག་བྱ་རྒྱུར་ཤུགས་སྣོན་བརྒྱབ་སྟེ་མར་ཁེ་སི་རིང་ལུགས་ཀྱི་སྲིད་སྐྱོང་ཏང་འཛུགས་སྐྱོང་བྱེད་པའི་དོན་དངོས་དང་འཚམས་པའི་ཆོས་ཉིད་ལ་རྒྱུན་ཆད་མེད་པར་ངོས་འཛིན་བྱེད་ཟབ་ཏུ་གཏོང་བ་དང་སྦྲགས་དེར་བརྟེན་ནས་ཏང་འཛུགས་སྐྱོང་བྱེད་པའི་ལག་ལེན་དངོས་ཀྱི་གསར་གཏོད་དང་། རིགས་པའི་གཞུང་ལུགས་གསར་གཏོད། ལམ་ལུགས་གསར་གཏོད། བྱ་ཐབས་གསར་གཏོད་བཅས་བྱ་རྒྱུར་མཛུབ་ཁྲིད་བྱས་ཏེ་ཏང་འཛུགས་སྐྱོང་བྱེད་པའི་ཚན་རིག་ཅན་གྱི་ཆུ་ཚད་རྒྱུན་ཆད་མེད་པར་མཐོ་རུ་གཏོང་དགོས།