ལོ་གསར་པ་ཤར་མ་ཐག་ལྗོངས་ཡོངས་ཀྱི་མི་རིགས་ཁག་གི་མི་དམངས་ཀྱིས་མགོ་བོ་དགྱེ་ཞིང་གོམ་སྟབས་ཆེན་པོས “ལོ་ལྔ་ཚན་བཅུ་གཉིས་པའི ”འཐབ་ལམ་གསར་པའི་ཐོག་བསྐྱོད་པའི་དུས་སྐབས་གལ་ཆེན་དེར་ལྗོངས་ཡོངས་ཀྱི་རིག་གནས་འཕེལ་རྒྱས་ཚོགས་ཆེན་གཟབ་རྒྱས་ངང་འཚོགས་ནས་རིག་གནས་འཛུགས་སྐྱོང་སྐོར་གྱི་ཀྲུང་དབྱང་གི་གལ་ཆེའི་བཀོད་སྒྲིག་རབ་དང་རིམ་པ་དང་ཀྲུང་དབྱང་གི་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་ལྔ་པ་དང་དེ་བཞིན་ལྗོངས་ཏང་ཨུད་སྐབས་བདུན་པའི་ཨུ་ལྷན་ཚང་འཛོམས་གྲོས་ཚོགས་ཐེངས་བདུན་པའི་དགོངས་དོན་ལག་བསྟར་གཏིང་ཟབ་བྱས་པ་དང་། རང་ལྗོངས་ཀྱི་རིག་གནས་ལས་དོན་ལ་ཕྱོགས་སྡོམ་ནན་ཏན་བྱས་ཏེ་རིག་གནས་འཛུགས་སྐྱོང་གི་དུས་བབ་ལ་དབྱེ་ཞིབ་གཏིང་ཟབ་བྱས་པ། རིག་གནས་འཕེལ་རྒྱས་ཆེན་པོ་དང་དར་རྒྱས་ཆེན་པོ་ཡོང་རྒྱུར་སྐུལ་འདེད་གཏོང་རྒྱུའི་སྐོར་གྱི་རང་སྐྱོང་ལྗོངས་ཏང་ཨུད་དང་སྲིད་གཞུང་གི་གཏན་འབེབས་དོན་འཁྱོལ་བྱས་པ། རིག་གནས་འཕེལ་རྒྱས་ལས་དོན་ལ་ཆེད་དོན་ཞིབ་འཇུག་དང་བཀོད་སྒྲིག་བྱས་པ་དེས་རང་ལྗོངས་སུ་རིག་གནས་ལ་བརྟེན་ནས་ལྗོངས་དར་རྒྱས་ཡོང་བ་བྱེད་པ་དང་། རིག་གནས་ལ་བརྟེན་ནས་ལྗོངས་སྟོབས་ཆེ་ཡོང་བ་བྱེད་པ། རིག་གནས་ལ་བརྟེན་ནས་ལྗོངས་ཕྱུག་པོ་ཡོང་བ་བྱེད་པ། རིག་གནས་ལ་བརྟེན་ནས་ལྗོངས་བརྟན་ལྷིང་ཡོང་བ་བྱེད་པ་བཅས་ཀྱི་འཐབ་ཇུས་ལག་བསྟར་ཤུགས་ཆེན་བྱ་རྒྱུ་དང་། སྤྱི་ཚོགས་རིང་ལུགས་རིག་གནས་འཕེལ་རྒྱས་ཆེན་པོ་དང་དར་རྒྱས་ཆེན་པོ་ཡོང་རྒྱུར་ཁྱོན་ཡོངས་ནས་སྐུལ་འདེད་གཏོང་རྒྱུ། མཆོང་སྐྱོད་ལྟ་བུའི་འཕེལ་རྒྱས་དང་ཡུན་རིང་བདེ་འཁོད་ལ་སྐུལ་འདེད་གཏོང་རྒྱུ་བཅས་ལ་གལ་ཆེ་ལ་གཏིང་ཟབ་པའི་ཤུགས་རྐྱེན་ཐེབས་ངེས་ཡིན་པ་རེད།

    ཏང་དང་སྲིད་གཞུང་གིས་རིག་གནས་འཛུགས་སྐྱོང་ལ་སྔར་ནས་ཚད་མཐོའི་མཐོང་ཆེན་གནང་བ་དང་སྔོན་ཐོན་རིག་གནས་ཀྱིས་མདུན་སྐྱོད་ཀྱི་ཁ་ཕྱོགས་སྣེ་ཁྲིད་བྱེད་པ་དང་། འབད་འཐབ་ཀྱི་སྟོབས་ཤུགས་གཅིག་ཏུ་སྡུད་པ། བྱ་གཞག་འཕེལ་རྒྱས་ལ་སྐུལ་འདེད་གཏོང་བ་བཅས་ཐོག་མཐའ་བར་གསུམ་དུ་གནང་གི་ཡོད། ང་ཚོའི་ཏང་གིས་འགོ་ཁྲིད་པའི་བོད་ཀྱི་གསར་བརྗེ་དང་། འཛུགས་སྐྲུན། སྒྱུར་བཅོས་སྒོ་དབྱེ་བཅས་ཀྱི་ཟིལ་རླབས་དགུང་འཕྱུར་གྱི་ལོ་རྒྱུས་ནི་སྤྱི་ཚོགས་ལམ་ལུགས་ཀྱི་མཆོང་སྐྱོད་ལྟ་བུའི་ལོ་རྒྱུས་ཤིག་དང་། དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་མཆོང་སྐྱོད་ལྟ་བུའི་ལོ་རྒྱུས་ཤིག་ཡིན་ལ་རིག་གནས་དར་རྒྱས་གོང་འཕེལ་གྱི་མཆོང་སྐྱོད་ལྟ་བུའི་ལོ་རྒྱུས་ཤིག་ཀྱང་ཡིན། ཏང་གི་ཚོགས་ཆེན་བཅུ་དྲུག་པ་ཚོགས་ཚུན་དང་ལྷག་པར་དུ་ཉེ་བའི་ལོ་ཤས་རིང་རང་སྐྱོང་ལྗོངས་ཏང་ཨུད་དང་སྲིད་གཞུང་གི་ཡང་དག་འགོ་ཁྲིད་འོག་རང་ལྗོངས་ཀྱིས་དར་ཆ་མཐོན་པོར་བསྒྲེངས་བ་དང་། སྤྱི་ཡོངས་ལ་དམིགས་པ། མི་དམངས་ལ་ཞབས་འདེགས་ཞུ་བ། སྒྱུར་བཅོས་གསར་གཏོད་བཅས་བྱས་པ་དང་། བསམ་བློའི་གླེང་ཕྱོགས་གཙོ་བོ་མགོ་འཕང་མཐོ་ལ་ཡར་ཐོན་ཆེ་བ་དང་། མང་ཚོགས་ཀྱི་རིག་གནས་འཚོ་བ་ཕུན་སུམ་ཚོགས་ལ་ངོ་མཚར་ཆེ་བ། མི་རིགས་ཀྱི་ཕུལ་བྱུང་རིག་གནས་དར་སྤེལ་དང་འཕེལ་རྒྱས་ཕྱིན་པ། ཁྱད་ལྡན་རིག་གནས་སྤེལ་རེས་བྱ་རྒྱུར་སྔར་བྱུང་མྱོང་མེད་པའི་དར་འཕེལ་ཕྱིན་པ། རིག་གནས་བདེ་འཇགས་སྲུང་སྐྱོང་ནུས་ལྡན་བྱུང་ཞིང་། རིག་གནས་ལས་དོན་གྱིས་མཆོང་སྐྱོད་ལྟ་བུའི་འཕེལ་རྒྱས་དང་ཡུན་རིང་བདེ་འཁོད་ལ་སྐུལ་འདེད་གཏོང་ཆེད་ནུས་ལྡན་གྱི་བསམ་བློའི་འགན་ལེན་དང་། གླེང་ཕྱོགས་ཀྱི་རྒྱབ་སྐྱོར། རིག་གནས་ཀྱི་ཆ་རྐྱེན། བསམ་བློའི་སྒུལ་ཤུགས་བཅས་ནུས་ལྡན་ཞིག་མཁོ་འདོན་བྱས་ཡོད་པ་རེད།

    དེང་སྐབས་ཀྱི་འཛམ་གླིང་ལ་ཁ་ཕྱོགས་ཚེ་རྒྱལ་ཁབ་གཅིག་དང་ས་ཁུལ་གཅིག་གི་སྟོབས་འབྱོར་མཚོན་བྱེད་དེ་ཆབ་སྲིད་དང་། ཚན་རིག རིག་གནས། རྒྱལ་དམངས་ཀྱི་བྱང་ཚད་བཅས་ཚུད་པའི་ཕྱོགས་བསྡུས་རྒྱལ་སྟོབས་ཐད་ནས་མཚོན་གྱི་ཡོད། རང་ལྗོངས་ཀྱི་ངོས་ནས་བརྗོད་ན། རིག་གནས་བྱ་གཞག་འཕེལ་རྒྱས་དང་དར་རྒྱས་གཏོང་རྒྱུ་ནི་ཉིན་བཞིན་ཆེ་རུ་འགྲོ་བའི་མི་དམངས་མང་ཚོགས་ཀྱི་བསམ་པའི་རིག་གནས་ཀྱི་དགོས་མཁོ་སྐོང་བ་ཞིག་ཡིན་ལ་སྤྱི་ཚོགས་རིང་ལུགས་ཀྱི་སྲོག་ཤིང་དུ་གྱུར་པའི་རིན་ཐང་མ་ལག་འཛུགས་སྐྱོང་དང་། མི་རིགས་ཀྱི་གོང་བུ་སྒྲིལ་ཤུགས་དང་ལྟེ་བར་ཕྱོགས་ཤུགས་ཆེན་པོ་གཏོད་པ། ཡུན་རིང་བདེ་འཁོད་འགན་ལེན་བཅས་བྱེད་པའི་འགན་སྲུང་ཞིག་ཀྱང་ཡིན། དེང་སྐབས་ང་ཚོས་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་བྱ་གཞག་གི་སྤྱིའི་བཀོད་སྒྲིག་གི་འཐབ་ཇུས་ཀྱི་མཐོ་ཚད་དང་། ཚན་རིག་དང་མཐུན་པའི་འཕེལ་རྒྱས་དང་། མཆོང་སྐྱོང་ལྟ་བུའི་འཕེལ་རྒྱས། ཡུན་རིང་བདེ་འཁོད་བཅས་ལ་སྐུལ་འདེད་གཏོང་བའི་ལས་དོན་གྱི་བརྗོད་བྱ་གཙོ་བོ། མི་རིགས་མཐུན་སྒྲིལ་སྲ་བརྟན་དུ་གཏོང་བ་དང་སྤྱི་ཚོགས་མཐུན་སྦྱོར་བརྟན་ལྷིང་ལ་སྐུལ་འདེད་གཏོང་བའི་གལ་ཆེའི་དམིགས་ཚད་བཅས་ཀྱི་ཐོག་ནས་སྤྱི་ཚོགས་རིང་ལུགས་ཀྱི་སྔོན་ཐོན་རིག་གནས་ཀྱི་མདུན་སྐྱོད་ཁ་ཕྱོགས་མཐའ་འཁྱོངས་བྱས་ཏེ་རང་ལྗོངས་ཀྱི་རིག་གནས་འཕེལ་རྒྱས་ཆེན་པོ་དང་དར་རྒྱས་ཆེན་པོ་ཡོང་རྒྱུར་ནུས་ཤུགས་ཡོད་རྒུས་སྐུལ་འདེད་གཏོང་དགོས།

    རང་ལྗོངས་ཀྱི་རིག་གནས་འཕེལ་རྒྱས་ཆེན་པོ་དང་དར་རྒྱས་ཆེན་པོ་ཡོང་རྒྱུར་སྐུལ་འདེད་གཏོང་བར་ངེས་པར་དུ་སྤྱི་ཚོགས་རིང་ལུགས་ཀྱི་སྔོན་ཐོན་རིག་གནས་ཀྱི་མདུན་སྐྱོད་ཁ་ཕྱོགས་སྟངས་འཛིན་ནན་པོ་བྱས་ནས་མར་ཁེ་སི་རིང་ལུགས་ཀྲུང་གོ་ཅན་གྱི་གྲུབ་འབྲས་གསར་ཤོས་ལ་བརྟེན་ནས་རིག་གནས་འཛུགས་སྐྱོང་བྱེད་རྒྱུར་མཛུབ་ཁྲིད་ཀྱིས་འདུ་ཤེས་འཛིན་སྟངས་ཀྱི་ཁྱབ་ཁོངས་ནང་གི་མར་ཁེ་སི་རིང་ལུགས་ཀྱི་མཛུབ་ཁྲིད་གནས་བབ་རྒྱུན་ཆད་མེད་པར་སྲ་བརྟན་དུ་གཏོང་རྒྱུ་མཐའ་འཁྱོངས་བྱེད་རྒྱུ་དེ་ནི་རིག་གནས་འཛུགས་སྐྱོང་གི་ཆབ་སྲིད་ཁ་ཕྱོགས་ཡིན་པས་དུས་གང་འདྲ་ཞིག་དང་གནས་ཚུལ་གང་འདྲ་ཞིག་གི་འོག་ཏུའང་ཕྱོགས་འཛོལ་སྤུ་ཙམ་ཡང་མི་ཡོང་བ་བྱེད་དགོས་པ་དང་། བོད་ཀྱི་ལས་དོན་གྱི་ཁྱོན་ཡོངས་ལ་དམ་པོར་གཞིགས་ནས་སྤྱི་ཚོགས་རིང་ལུགས་ཀྱི་སྲོག་ཤིང་དུ་གྱུར་པའི་རིན་ཐང་མ་ལག་འཛུགས་སྐྱོང་ལ་སྐུལ་འདེད་ཏན་ཏིག་བཏང་སྟེ་སྤྱི་ཚོགས་ལ་ཁྲིད་སྟོན་བྱེད་པ་དང་། མི་དམངས་ལ་སློབ་གསོ་གཏོང་བ། འཕེལ་རྒྱས་ལ་སྐུལ་འདེད་གཏོང་བ། བརྟན་ལྷིང་ལ་སྐུལ་འདེད་གཏོང་བ་བཅས་རིག་གནས་ཀྱི་གལ་ཆེའི་ནུས་པ་འདོན་སྤེལ་གང་ལེགས་ཀྱིས་མཆོང་སྐྱོད་ལྟ་བུའི་འཕེལ་རྒྱས་དང་ཡུན་རིང་བདེ་འཁོད་ལ་སྐུལ་འདེད་གཏོང་ཆེད་བསམ་བློའི་འགན་ལེན་དང་། གླེང་ཕྱོགས་ཀྱི་རྒྱབ་སྐྱོར། རིག་གནས་ཀྱི་ཆ་རྐྱེན། བསམ་པའི་སྒུལ་ཤུགས་བཅས་མཁོ་འདོན་བྱེད་རྒྱུ་དེ་ནི་རིག་གནས་འཛུགས་སྐྱོང་གི་གཞི་རྩའི་བླང་བྱ་ཞིག་ཡིན་པས་དུས་གང་འདྲ་ཞིག་དང་གནས་ཚུལ་གང་འདྲ་ཞིག་གི་འོག་ཏུའང་དམ་འཛིན་ལྷོད་མེད་བྱེད་དགོས་པ། མི་དམངས་མང་ཚོགས་ཀྱི་གཞི་རྩའི་རིག་གནས་ཁེ་དབང་འགན་ལེན་ཏན་ཏིག་བྱས་ནས་ཉིན་བཞིན་ཆེ་རུ་འགྲོ་བའི་མི་དམངས་མང་ཚོགས་ཀྱི་བསམ་པ་དང་རིག་གནས་དགོས་མཁོ་རྒྱུན་ཆད་མེད་པར་སྐོང་སྟེ་སྤྱི་ཚོགས་ཀྱི་ཤེས་དཔལ་ཡར་ཐོན་ལ་སྐུལ་འདེད་ཧུར་ཐག་གཏོང་རྒྱུ་དེ་ནི་རིག་གནས་འཛུགས་སྐྱོང་གི་གཞི་རྩའི་དམིགས་ཡུལ་ཡིན་པས་དུས་གང་འདྲ་ཞིག་དང་གནས་ཚུལ་གང་འདྲ་ཞིག་གི་འོག་ཏུའང་སེམས་ནང་བརྟན་པོར་ངེས་དགོས་པ། ཏཱ་ལའི་རུ་ཚོགས་ཀྱི་ལོག་སྤྱོད་ངོ་བོར་ཐེར་འདོན་དགག་རྒྱག་གཏིང་ཟབ་བྱས་ནས་བསམ་བློ་ཆབ་སྲིད་དང་སློབ་གསོའི་ལས་དོན་ལ་དམ་འཛིན་ཡག་པོ་བྱས་ཏེ་འདུ་ཤེས་འཛིན་སྟངས་ཁྱབ་ཁོངས་ཀྱི་ཁ་ཕྲལ་ལ་ངོ་རྒོལ་བྱེད་པའི་འཐབ་རྩོད་ཀྱི་རང་འགུལ་དམག་འཐབ་ཡག་པོ་བརྒྱབ་ནས་བསམ་བློའི་ཐད་ནས་མི་རིགས་ཁག་གི་ལས་བྱེད་པ་དང་མང་ཚོགས་ཚོས་ཁ་ཕྲལ་ལ་ངོ་རྒོལ་དང་བརྟན་ལྷིང་སྲུང་སྐྱོང་བྱེད་པའི་ལྕགས་རི་རིང་པོ་བརྟན་པོ་ཞིག་འཛུགས་རྒྱུ་དེ་ནི་རིག་གནས་འཛུགས་སྐྱོང་གི་ཆབ་སྲིད་འགན་འཁྲི་ཞིག་ཡིན་པས་དུས་གང་འདྲ་ཞིག་དང་གནས་ཚུལ་གང་འདྲ་ཞིག་གི་འོག་ཏུའང་ཕྲག་སྟེང་དུ་འཁུར་ཕོད་པ་བྱེད་དགོས་པ། བོད་ཀྱི་ཕུལ་བྱུང་སྲོལ་རྒྱུན་རིག་གནས་སྲུང་སྐྱོང་ཡག་པོ་བྱེད་པ་དང་། རྒྱུན་འཛིན་ཡག་པོ་བྱེད་པ། དར་སྤེལ་ཡག་པོ་གཏོང་བ་བཅས་ཀྱིས་ཀྲུང་ཧྭ་མི་རིགས་ཀྱི་ཁྱད་ལྡན་རིག་གནས་སྲུང་སྐྱོང་ཁུལ་འཛུགས་སྐྲུན་བྱེད་རྒྱུ་དེ་ནི་རིག་གནས་འཛུགས་སྐྱོང་གི་ལོ་རྒྱུས་ཀྱི་འགན་འཁྲི་ཞིག་ཡིན་པས་དུས་གང་འདྲ་ཞིག་དང་གནས་ཚུལ་གང་འདྲ་ཞིག་གི་འོག་ཏུའང་རང་རྟོགས་ངང་འགན་འཁུར་དགོས་པ། བསམ་བློ་བཅིངས་འགྲོལ་དང་། དུས་བསྟུན་འཕེལ་རྒྱས། སྒྱུར་བཅོས་གསར་གཏོད་བཅས་བྱས་ནས་ཀྲུང་གོའི་ཁྱད་ཆོས་དང་བོད་ཀྱི་དམིགས་བསལ་ཁྱད་ཆོས་ལྡན་པའི་རིག་གནས་འཕེལ་རྒྱས་ཀྱི་ལམ་བུ་འཚོལ་ཞིབ་ཧུར་ཐག་གིས་རིག་གནས་ཀྱི་ཐོན་སྐྱེད་ནུས་ཤུགས་རྒྱུན་ཆད་མེད་པར་བཅིངས་འགྲོལ་དང་འཕེལ་རྒྱས་བཏང་སྟེ་རིག་གནས་འཕེལ་རྒྱས་ཀྱི་གསོན་ཤུགས་འཕེལ་བ་བྱེད་རྒྱུ་དེ་ནི་རིག་གནས་འཛུགས་སྐྱོང་གི་སྒུལ་ཤུགས་རྫོགས་མཐའ་མེད་པ་ཞིག་ཡིན་པས་དུས་གང་འདྲ་ཞིག་དང་གནས་ཚུལ་གང་འདྲ་ཞིག་གི་འོག་ཏུའང་སྔ་བར་ཕྱི་གསུམ་དུ་མཐའ་འཁྱོངས་བྱེད་དགོས་པ། ཏང་གིས་དྲིལ་བསྒྲགས་ལ་དོ་དམ་དང་། ཏང་གིས་རིག་གནས་ལ་དོ་དམ། ཏང་གིས་འདུ་ཤེས་འཛིན་སྟངས་ལ་དོ་དམ་བཅས་བྱེད་རྒྱུ་མཐའ་འཁྱོངས་བྱས་ནས་ཏང་གི་འགོ་ཁྲིད་ལ་རྒྱུན་ཆད་མེད་པར་ཤུགས་སྣོན་དང་ལེགས་སུ་གཏོང་རྒྱུ་དེ་ནི་རིག་གནས་འཛུགས་སྐྱོང་གི་གཞི་རྩའི་འགན་ལེན་ཞིག་ཡིན་པས་དུས་གང་འདྲ་ཞིག་དང་གནས་ཚུལ་གང་འདྲ་ཞིག་གི་འོག་ཏུའང་གཡོ་འགུལ་སྤུ་ཙམ་ཡང་མི་ཐེབས་པ་བྱེད་དགོས།

    རང་ལྗོངས་ཀྱི་རིག་གནས་འཕེལ་རྒྱས་ཆེན་པོ་དང་དར་རྒྱས་ཆེན་པོ་ཡོང་རྒྱུར་སྐུལ་འདེད་ནུས་ལྡན་གཏོང་བར་ངེས་པར་དུ་དུས་བབ་གསལ་རྟོགས་དང་ཡིད་ཆེས་བརྟན་གཏོང་གིས་འགན་འཁྲི་ཁུར་སེམས་དང་ལས་འགན་སྒྲུབ་སེམས་རྒྱུན་ཆད་མེད་པར་ཤུགས་ཆེར་གཏོང་དགོས། རང་ལྗོངས་ཀྱི་སྤྱི་ཚོགས་རིང་ལུགས་ཀྱི་རིག་གནས་འཛུགས་སྐྱོང་བྱེད་པའི་འགན་འཁྲི་ལྕི་ལ་ལས་འགན་གཟི་བརྗིད་ལྡན་པ་ཞིག་ཡོད་པས་དེ་ནི་དཔལ་འབྱོར་དང་སྤྱི་ཚོགས་མཆོང་སྐྱོད་ལྟ་བུའི་འཕེལ་རྒྱས་ཡོང་བ་བྱེད་པའི་ཁ་ཚ་དགོས་གཏུགས་ཀྱི་བླང་བྱ་ཞིག་ཡིན་ལ་སྤྱི་ཚོགས་བརྟན་ལྷིང་སྲུང་སྐྱོང་བྱེད་པ་དང་ཡུན་རིང་བདེ་འཁོད་ཡོང་བ་བྱེད་པའི་ཁ་ཚ་དགོས་གཏུགས་ཀྱི་བླང་བྱ་ཞིག་ཀྱང་ཡིན་པ་དང་། དམངས་འཚོ་འགན་ལེན་དང་ལེགས་སུ་གཏོང་བའི་ཁ་ཚ་དགོས་གཏུགས་ཀྱི་བླང་བྱ་ཞིག་ཡིན་ལ་ཕུལ་བྱུང་གི་སྲོལ་རྒྱུན་རིག་གནས་དར་སྤེལ་དང་ཀྲུང་ཧྭ་མི་རིགས་ཀྱི་ཁྱད་ལྡན་རིག་གནས་སྲུང་སྐྱོང་ཁུལ་གཏོད་པའི་ཁ་ཚ་དགོས་གཏུགས་ཀྱི་བླང་བྱ་ཞིག་ཀྱང་ཡིན། དེར་བརྟེན་ངེས་པར་དུ་འབྱོར་འབྲིང་སྤྱི་ཚོགས་སྒོ་ཀུན་ནས་འཛུགས་སྐྲུན་བྱེད་པའི་བརྗིད་ཆེའི་དམིགས་ཚད་ལ་གཞི་བཙུགས་ནས་མི་རིགས་ཁག་གི་མི་དམངས་ཚོའི་བྱང་ཚད་ཧྲིལ་པོ་མཐོ་རུ་གཏོང་རྒྱུ་དང་སྤྱི་ཚོགས་ཀྱི་ཤེས་དཔལ་ལ་སྐུལ་འདེད་གཏོང་བའི་ཁྲོད་ཀྱི་རིག་གནས་ཀྱི་གལ་ཆེའི་ནུས་པར་ངོས་འཛིན་གང་ལེགས་བྱེད་དགོས་པ་དང་། བོད་ཀྱི་སྤྱི་ཚོགས་ཀྱི་འགལ་ཟླ་གཙོ་བོར་གཞི་བཙུགས་ནས་མཆོང་སྐྱོད་ལྟ་བུའི་འཕེལ་རྒྱས་ལ་སྐུལ་འདེད་གཏོང་བ་དང་དམངས་འཚོ་འགན་ལེན་དང་ལེགས་སུ་གཏོང་བའི་ཁྲོད་ཀྱི་རིག་གནས་ཀྱི་གལ་ཆེའི་ནུས་པར་ངོས་འཛིན་གང་ལེགས་བྱེད་དགོས་པ། བོད་ཀྱི་དམིགས་བསལ་འགལ་ཟླར་གཞི་བཙུགས་ནས་སྤྱི་ཚོགས་མཐུནསྦྱོར་བརྟན་ལྷིང་ཡོང་རྒྱུར་སྐུལ་འདེད་གཏོང་བ་དང་ཡུན་རིང་བདེ་འཁོད་ཡོང་བ་བྱེད་པའི་ཁྲོད་ཀྱི་རིག་གནས་ཀྱི་གལ་ཆེའི་ནུས་པར་ངོས་འཛིན་གང་ལེགས་བྱེད་དགོས་པ། ཀྲུང་ཧྭ་མི་རིགས་ཀྱི་ཁྱད་ལྡན་རིག་གནས་སྲུང་སྐྱོང་ཁུལ་གལ་ཆེན་གཏོད་རྒྱུར་གཞི་བཙུགས་ནས་བོད་ཀྱི་གཟུགས་བཪྙན་མངོན་པ་དང་རྒྱལ་ཁབ་ཀྱི་ཁེ་ཕན་སྲུང་སྐྱོང་བྱེད་པའི་ཁྲོད་ཀྱི་རིག་གནས་ཀྱི་གལ་ཆེའི་ནུས་པར་ངོས་འཛིན་གང་ལེགས་བྱེད་དགོས་པ། ཏང་འཛུགས་སྐྱོང་གི་རླབས་ཆེན་འདུ་འགོད་གསར་པར་གཞི་བཙུགས་ནས་ཏང་གི་སྲིད་སྐྱོང་ནུས་པ་འཛུགས་སྐྱོང་དང་སྔོན་ཐོན་རང་བཞིན་འཛུགས་སྐྱོང་བྱེད་པའི་ཁྲོད་ཀྱི་རིག་གནས་ཀྱི་གལ་ཆེའི་ནུས་པར་ངོས་འཛིན་གང་ལེགས་བྱེད་དགོས། རང་ལྗོངས་ཀྱི་རིག་གནས་འཕེལ་རྒྱས་ཆེན་པོ་དང་དར་རྒྱས་ཆེན་པོ་ཡོང་རྒྱུར་སྐུལ་འདེད་ནུས་ལྡན་གཏོང་བར་ངེས་པར་དུ་གཅིག་གྱུར་འཆར་འགོད་དང་སྤྱི་ཡོངས་ལ་ལྟ་རྟོག་དང་གཙོ་གནད་མངོན་གསལ་དོད་པོ་ཡོང་བ་བྱེད་དགོས། ཚན་རིག་དང་མཐུན་པའི་འཕེལ་རྒྱས་དང་། མཆོང་སྐྱོད་ལྟ་བུའི་འཕེལ་རྒྱས། ཡུན་རིང་བདེ་འཁོད་བཅས་ཀྱི་བརྗོད་བྱ་གཙོ་བོ་སྟངས་འཛིན་ནན་པོ་བྱས་ནས་སྤྱི་ཚོགས་རིང་ལུགས་ཀྱི་བསམ་པའི་དཔལ་ཡོན་སྲོལ་གཏོད་དང་རིག་གནས་འཕེལ་རྒྱས་ཀྱི་ཁྱད་ཆོས་དང་ཆོས་ཉིད་ལ་བརྩི་སྲུང་ཞུས་ཏེ་སྤྱི་ཚོགས་རིང་ལུགས་ཀྱི་སྲོག་ཤིང་དུ་གྱུར་པའི་རིན་ཐང་མ་ལག་འཛུགས་སྐྱོང་བྱེད་རྒྱུ་གཙོ་གནད་དུ་བྱེད་པ་དང་། ཉིན་རེ་བཞིན་ཆེ་རུ་འགྲོ་བའི་མི་དམངས་མང་ཚོགས་ཀྱི་བསམ་པ་དང་རིག་གནས་ཀྱི་དགོས་མཁོ་དེ་འགོ་འཛུགས་ས་དང་དོན་ལ་བབས་སར་བརྩི་བ། འདུ་ཤེས་འཛིན་སྟངས་ཀྱི་བདེ་འཇགས་སྲུང་སྐྱོང་བྱེད་རྒྱུ་དེ་འགན་འཁྲི་གལ་ཆེན་དུ་བརྩི་བ། སྒྱུར་བཅོས་གསར་གཏོད་བྱེད་རྒྱུ་དེ་སྒུལ་ཤུགས་སུ་བརྩི་བ་བཅས་བྱས་ནས་རིག་གནས་ལ་བརྟེན་ནས་ལྗོངས་དར་རྒྱས་ཡོང་བ་བྱེད་པ་དང་། རིག་གནས་ལ་བརྟེན་ནས་ལྗོངས་སྟོབས་ཆེ་ཡོང་བ་བྱེད་པ། རིག་གནས་ལ་བརྟེན་ནས་ལྗོངས་ཕྱུག་པོ་ཡོང་བ་བྱེད་པ། རིག་གནས་ལ་བརྟེན་ནས་ལྗོངས་བརྟན་ལྷིང་ཡོང་བ་བྱེད་པ་བཅས་ཀྱི་འཐབ་ཇུས་ལག་བསྟར་ཤུགས་ཆེན་བྱས་ནས་ཀྲུང་གོའི་ཁྱད་ཆོས་དང་བོད་ཀྱི་དམིགས་བསལ་ཁྱད་ཆོས་ལྡན་པའི་རིག་གནས་ཀྱི་འཕེལ་རྒྱས་ལམ་བུའི་ཐོག་སྐྱོད་དགོས།

    རང་ལྗོངས་ཀྱི་རིག་གནས་འཕེལ་རྒྱས་ཆེན་པོ་དང་དར་རྒྱས་ཆེན་པོ་ཡོང་རྒྱུར་སྐུལ་འདེད་གཏོང་བར་ངེས་པར་དུ་འགོ་ཁྲིད་ལ་ཤུགས་སྣོན་དང་མཉམ་ཤུགས་ཆགས་པ་བྱེད་དགོས། རང་ལྗོངས་ཀྱི་རིག་གནས་འཕེལ་རྒྱས་ཆེན་པོ་དང་དར་རྒྱས་ཆེན་པོ་ཡོང་བ་བྱེད་པར་འགག་རྩ་ནི་ཏང་གི་འགོ་ཁྲིད་ལ་ཐུག་ཡོད། དེར་བརྟེན་རིམ་ཁག་ཏང་ཨུད་དང་སྲིད་གཞུང་དང་འགོ་ཁྲིད་ལས་བྱེད་པ་བཅས་ཀྱིས་ངེས་པར་དུ་འགོ་ཁྲིད་ལ་ཤུགས་སྣོན་ཏན་ཏིག་གིས་རིག་གནས་འཛུགས་སྐྱོང་ལ་འགོ་ཁྲིད་དང་སྐུལ་འདེད་གཏོང་བའི་ནུས་པ་ཟམ་མི་ཆད་པར་ཆེ་རུ་གཏོང་དགོས་པ་དང་། བསམ་བློའི་ངོས་འཛིན་མཐོ་རུ་གཏོང་བ་དང་། ལས་ཀའི་འགན་འཁྲི་ཁ་གསལ་ཡོང་བ་བྱེད་པ། དཔུང་ཁག་འཛུགས་སྐྱོང་ལ་ཤུགས་སྣོན་རྒྱག་པ། ལྟ་སྐུལ་ཞིབ་བཤེར་ལ་ཤུགས་སྣོན་རྒྱག་པ་བཅས་བྱེད་དགོས་པ། འཐབ་ཇུས་ཀྱི་ཁྱོན་ཡོངས་ཀྱི་མཐོ་ཚད་ཐོག་ནས་རིག་གནས་འཛུགས་སྐྱོང་བྱེད་རྒྱུ་དེ་དེ་བས་མངོན་གསལ་དོད་པའི་གནས་བབ་ཐོག་བཞག་ནས་བསམ་བློའི་ཐད་ནས་ཚད་མཐོའི་མཐོང་ཆེན་བྱེད་པ་དང་། སྲིད་ཇུས་ཐད་ནས་རྒྱབ་སྐྱོར་ཤུགས་ཆེན་བྱེད་པ། ལས་དོན་ཐད་ནས་སྐུལ་འདེད་ཤུགས་ཆེན་གཏོང་བ། དོན་འཁྱོལ་བྱེད་པའི་ཐད་ཕན་འབྲས་དོན་གཉེར་བཅས་བྱེད་དགོས། རིག་གནས་ལ་དམ་འཛིན་བྱེད་པ་ནི་འཕེལ་རྒྱས་ལ་དམ་འཛིན་བྱེད་པ་ཞིག་ཡིན་པ་དང་། རིག་གནས་ལ་དམ་འཛིན་བྱེད་པ་ནི་དམངས་འཚོར་དངོས་ཕན་ཐོབ་པ་བྱེད་པ་ཞིག་ཡིན་པ། རིག་གནས་ལ་དམ་འཛིན་བྱེད་པ་ནི་མི་སེམས་གཅིག་ཏུ་འགྲིལ་བ་བྱེད་པ་ཞིག་ཡིན་པ། རིག་གནས་ལ་དམ་འཛིན་བྱེད་པ་ནི་འབྱུང་འགྱུར་དར་རྒྱས་ཡོང་བ་བྱེད་པ་ཞིག་ཡིན་པ་བཅས་ཀྱི་འདུ་ཤེས་བཙུགས་ཏེ་རིག་གནས་འཕེལ་རྒྱས་ཆེན་པོ་ཡོང་རྒྱུར་སྐུལ་འདེད་གཏོང་རྒྱུ་དེ་དཔལ་འབྱོར་འཛུགས་སྐྲུན་དང་། ཆབ་སྲིད་འཛུགས་སྐྱོང་། སྤྱི་ཚོགས་འཛུགས་སྐྲུན་བཅས་དང་དེ་བཞིན་སྣོད་བཅུད་ཤེས་དཔལ་སྲོལ་གཏོད་དང་ཏང་འཛུགས་སྐྱོང་བྱེད་རྒྱུ་དང་མཉམ་དུ་ཞིབ་འཇུག་བཀོད་སྒྲིག་བྱེད་དགོས། རང་སྐྱོང་ལྗོངས་ཏང་ཨུད་དང་སྲིད་གཞུང་གི་སྲ་ཞིང་བརྟན་པའི་འགོ་ཁྲིད་འོག་དེ་བས་རང་རྟོགས་དང་དེ་བས་རང་འགུལ་ངང་རིག་གནས་འཕེལ་རྒྱས་ཆེན་པོ་དང་དར་རྒྱས་ཆེན་པོ་ཡོང་རྒྱུར་སྐུལ་འདེད་བཏང་སྟེ་སྤྱི་ཚོགས་རིང་ལུགས་ཀྱི་རིག་གནས་འཛུགས་སྐྱོང་གི་མཐོ་རླབས་གསར་པ་ཞིག་སྒོ་ཀུན་ནས་འཕྱུར་བ་བྱས་ཏེ་བོད་ཀྱི་མཆོང་སྐྱོད་ལྟ་བའི་འཕེལ་རྒྱས་དང་ཡུན་རིང་བདེ་འཁོད་ཆེད་འབད་འཐབ་ལྷོད་མེད་བྱེད་དགོས།