ལྗོངས་ཡོངས་ཀྱི་དཔལ་འབྱོར་ལས་དོན་ཚོགས་འདུའི་ཐོག་ནང་མཁོ་ཆེ་རུ་ཏན་ཏིག་བཏང་སྟེ་མཁོ་སྤྲོད་གཉིས་འགན་ལེན་བྱས་ནས་གྲོང་ཁྱེར་དང་གྲོང་གསེབ་ཀྱི་ཁྲོམ་ར་དར་རྒྱས་ཆེན་པོ་ཡོང་བ་བྱེད་དགོས་ཞེས་ནན་བཤད་བྱས་ཡོད། ནང་མཁོ་ཆེ་རུ་ཏན་ཏིག་བཏང་སྟེ་མཁོ་སྤྲོད་འགན་ལེན་བྱས་ནས་གྲོང་ཁྱེར་དང་གྲོང་གསེབ་ཀྱི་ཁྲོམ་ར་དར་རྒྱས་ཆེན་པོ་ཡོང་བ་བྱ་རྒྱུའི་རྩ་བའི་ལས་འགན་ནི་འཛད་སྤྱོད་ཀྱི་དགོས་མཁོ་ཆེ་རུ་ཧུར་ཐག་བཏང་སྟེ་གྲོང་ཁྱེར་དང་གྲོང་གསེབ་གཉིས་ཀྱི་འཛད་སྤྱོད་མཉམ་དུ་འཕེལ་ཐུབ་པ་བྱ་རྒྱུ་དེ་རེད། འཛད་སྤྱོད་ནི་དཔལ་འབྱོར་འཕར་བའི་སྒུལ་ཤུགས་མཐའ་མ་དེ་རེད། རང་ལྗོངས་ཀྱིས་ཚན་རིག་དང་མཐུན་པའི་འཕེལ་རྒྱས་ལ་སྐུལ་འདེད་གཏོང་བ་དང་དཔལ་འབྱོར་འཕེལ་རྒྱས་གཏོང་སྟངས་འགྱུར་ལྡོག་མགྱོགས་པོ་གཏོང་བའི་ལྡོག་མེད་ཀྱི་གདམ་ག་ཞིག་དང་ཕུགས་ཇུས་ཤིག་ཡིན་པའི་འཛད་སྤྱོད་ཀྱི་མི་མངོན་པའི་ནུས་པ་སྔོག་འདོན་བྱ་རྒྱུ་དེས་ང་ཚོར་འཛད་སྤྱོད་ལ་བརྟེན་ནས་དཔལ་འབྱོར་འཕར་རྒྱུར་སྐུལ་ཁྲིད་བྱེད་པའི་ནུས་པར་དེ་བས་མཐོང་ཆེན་བྱས་ཏེ་འཛད་སྤྱོད་ཁོར་ཡུག་ལེགས་སུ་ཏན་ཏིག་གཏོང་བ་དང་འཛད་སྤྱོད་ལ་སྐུལ་མ་གཏོང་བའི་སྲིད་ཇུས་རྒྱུན་ཆད་མེད་པར་འཐུས་སྒོ་ཚང་དུ་གཏོང་བའི་ཐོག་ནས་གྲོང་ཁྱེར་དང་གྲོང་གསེབ་ཀྱི་གྲོང་མིའི་འཛད་སྤྱོད་ཐད་ཀྱི་མི་མངོན་པའི་ནུས་པ་སྔར་བས་འདོན་སྤེལ་བྱེད་པ་དང་། གྲོང་ཁྱེར་དང་གྲོང་གསེབ་ཀྱི་འཛད་སྤྱོད་མཉམ་དུ་འཕེལ་བའི་རྣམ་པ་བཟང་པོ་སྔར་བས་སྲ་བརྟན་དང་འཕེལ་རྒྱས་གཏོང་དགོས་པའི་བླང་བྱ་བཏོན་ཡོད། མང་ཚོགས་ཀྱི་གཞི་རྩའི་འཚོ་བ་འགན་ལེན་བྱ་རྒྱུའི་སྐོར་གྱི་རྒྱལ་སྲིད་སྤྱི་ཁྱབ་ཁང་གི་བཀོད་སྒྲིག་ནན་ཏན་ངང་ལག་བསྟར་དོན་འཁྱོལ་བྱེད་པའི་ཁར་རང་ལྗོངས་ཀྱི་འདྲེན་གཏོང་རྣམ་པའི་ཁྲོམ་རའི་ཁྱད་ཆོས་དང་ཟུང་འབྲེལ་གྱིས་ནང་མཁོ་ཆེ་རུ་གཏོང་རྒྱུ་དང་། མཁོ་སྤྲོད་འགན་ལེན་བྱ་རྒྱུ། གྲོང་ཁྱེར་དང་གྲོང་གསེབ་ཀྱི་ཁྲོམ་ར་དར་རྒྱས་གཏོང་རྒྱུ་བཅས་གསུམ་གཅིག་གྱུར་དམ་ཚགས་ཡོང་བ་བྱས་ཏེ་འཛད་སྤྱོད་བྱེད་རྒྱ་ཆེ་རུ་གཏོང་རྒྱུ་དང་། མཁོ་སྤྲོད་འགན་ལེན་བྱ་རྒྱུ། འཁོར་རྒྱུག་བདེ་བླག་ཡོང་བ་བྱ་རྒྱུ། ཟོག་གོང་ཚོད་འཛིན་བྱ་རྒྱུ། ལམ་སྲོལ་འཛུགས་རྒྱུ་སོགས་ཀྱི་ལས་དོན་ཡག་པོ་བསྒྲུབས་ནས་ཟོག་གོང་བརྟན་པོ་ཡོང་བ་བྱེད་དགོས།
ནང་མཁོ་ཆེ་རུ་ཏན་ཏིག་བཏང་སྟེ་མཁོ་སྤྲོད་འགན་ལེན་བྱས་ནས་གྲོང་ཁྱེར་དང་གྲོང་གསེབ་ཀྱི་ཁྲོམ་ར་དར་རྒྱས་ཆེན་པོ་ཡོང་བ་བྱེད་དགོས་ན་ཡོང་འབབ་མང་དུ་གཏོང་རྒྱུར་ཤུགས་བརྒྱབ་ནས་འཛད་སྤྱོད་ནུས་པ་ཆེ་རུ་གཏོང་བ་དང་ནང་མཁོ་ཆེ་རུ་གཏོང་རྒྱུའི་འཐབ་ཇུས་དང་མང་ཚོགས་ལ་སྐུལ་འདེད་ཀྱིས་འཛད་སྤྱོད་བྱེད་ཤུགས་ཆེ་རུ་གཏོང་རྒྱུའི་སྲིད་ཇུས་དང་བྱེད་ཐབས་དོན་འཁྱོལ་ཡག་པོ་བྱས་ཏེ་གྲོང་མི་སྤྱི་དང་ལྷག་པར་དུ་ཡོང་འབབ་ཉུང་བའི་མང་ཚོགས་ཀྱི་ཉོ་སྒྲུབ་བྱེད་ནུས་དངོས་ཆེ་རུ་བཏང་ནས་འཛད་སྤྱོད་ཚོགས་སྤྱི་གསོ་སྐྱོང་དང་སྟོབས་ཆེར་གཏོང་དགོས། རྒྱལ་ཁབ་ཀྱི་ཡོང་འབབ་བགོ་བཤའི་ལམ་ལུགས་སྒྱུར་བཅོས་ཀྱི་བླང་བྱ་གཞིར་བཟུང་ཡོང་འབབ་བགོ་བཤའ་རྒྱག་སྟངས་ལེགས་སྒྲིག་དང་བཟང་སྒྲིག་བྱེད་པ་དང་ངལ་རྩོལ་ཡོང་འབབ་གྲུབ་ཚུལ་དང་འཕར་བའི་ལམ་སྲོལ་འཐུས་སྒོ་ཚང་དུ་བཏང་ནས་རྒྱལ་དམངས་ཡོང་འབབ་ནང་བཟུང་བའི་གྲོང་མིའི་ཡོང་འབབ་ཀྱི་བསྡུར་ཚད་མཐོ་རུ་དང་ཐོག་མའི་བགོ་བཤའི་ནང་བཟུང་བའི་ངལ་རྩོལ་ཐོབ་ཆའི་བསྡུར་ཚད་མཐོ་རུ་གཏོང་དགོས། གླ་ཕོཊ་ཀྱི་ཁྲིད་སྟོན་བྱེད་ཕྱོགས་དང་། ངལ་རྩོལ་ནུས་ཤུགས། ཁྲོམ་རའི་གླ་ཕོགས་ཁྲིད་སྟོན་གོང་ཚད། ལས་རིགས་ཀྱི་མི་ཤུགས་མ་གནས་ཆ་འཕྲིན་ཡོངས་བསྒྲགས་བཅས་ཀྱི་ལམ་ལུགས་འཐུས་སྒོ་ཚང་དུ་གཏོང་དགོས། ཡོང་འབབ་ཉུང་བའི་ཚོགས་སྤྱིའི་ཡོང་འབབ་མང་དུ་དང་མ་མཐའི་གླ་ཕོགས་ལམ་ལུགས་འཐུས་སྒོ་ཚང་དུ་གཏོང་དགོས་པ་མ་ཟད་མ་མཐའི་གླ་ཕོགས་ཚད་གཞི་ཡང་ལེགས་སྒྲིག་འོས་འཚམ་བྱེད་དགོས། དམངས་འཚོ་ལེགས་སུ་གཏོང་རྒྱུ་དང་སྤྱི་ཚོགས་བྱ་གཞག་ཐད་གཏོང་ཆ་གཏོང་ཤུགས་རྒྱུན་ཆད་མེད་པར་ཆེ་རུ་གཏོང་བ་དང་ལས་ཞུགས་མཐོར་གཏོང་དང་། སྤྱི་ཚོགས་འགན་ལེན། སྨན་བཅོས་འཕྲོད་བསྟེན། སློབ་གསོ་སོགས་གཞི་རྩའི་སྤྱི་པའི་ཞབས་ཞུའི་འགན་ལེན་ནུས་པ་དང་ཆུ་ཚད་རྒྱུན་ཆད་མེད་པར་མཐོ་རུ་བཏང་ནས་གྲོང་མིའི་འཛད་སྤྱོད་བྱེད་ཤུགས་ཆེ་རུ་གཏོང་རྒྱུའི་སྔོན་དཔག་སྲ་བརྟན་དུ་གཏོང་དགོས།
ནང་མཁོ་ཆེ་རུ་ཏན་ཏིག་བཏང་སྟེ་མཁོ་སྤྲོད་འགན་ལེན་བྱས་ནས་གྲོང་ཁྱེར་དང་གྲོང་གསེབ་ཀྱི་ཁྲོམ་ར་དར་རྒྱས་ཆེན་པོ་ཡོང་བ་བྱེད་དགོས་ན་མི་མངོན་པའི་ནུས་པ་སྔོག་འདོན་ཤུགས་ཆེན་བྱས་ནས་འཛད་སྤྱོད་རིམ་པ་མཐོ་རུ་གཏོང་རྒྱུར་སྐུལ་འདེད་གཏོང་དགོས་ཤིང་། ཁྱིམ་སྤྱོད་གློག་ཆས་དང་། ཁྱིམ་ཆས། རླངས་འཁོར། སྦག་སྦག་བཅས་གཤམ་འཚོང་གི་ལས་དོན་སྔར་བས་ཡག་པོ་སྒྲུབ་པ་དང་། ཁྱིམ་སྤྱོད་གློག་ཆས་དང་རླངས་འཁོར་སོགས་ཪྙིང་ཚབ་གསར་བརྗེའི་སྲིད་ཇུས་མུ་མཐུད་ལག་བསྟར་བྱེད་པ། ཞིང་འཕྲུལ་ཉོ་སྒྲུབ་ཀྱི་ཁ་གསབ་མང་དུ་གཏོང་བ། སྤྱི་ཚོགས་སྐྱོབ་རོགས་དང་འགན་ལེན་ཚད་གཞི་དང་ཟོག་གོང་འཕར་བ་དང་འབྲེལ་བ་བྱེད་པའི་སྟབས་བསྟུན་ལམ་སྲོལ་ཞིབ་འཇུག་བྱས་ནས་གང་མགྱོགས་བཟོ་བ། ཁ་གསབ་དང་འཚོ་སྣོན་སྲིད་ཇུས་སྔར་བས་འཐུས་སྒོ་ཚང་དུ་གཏོང་བ་བཅས་བྱས་ནས་མང་ཚོགས་ཀྱི་གཞི་རྩའི་འཚོ་བ་འགན་ལེན་ཏན་ཏིག་བྱེད་དགོས། “གཤམ་འཚོང་བརྒྱད་ཀྱི ”འདུ་འགོད་དང་ཟུང་འབྲེལ་དམ་ཚགས་བྱས་ཏེ་ཞིང་འབྲོག་པའི་འཛད་སྤྱོད་རིམ་པ་མཐོ་རུ་དང་འཛད་སྤྱོད་ཀྱི་དགོས་མཁོ་གསར་པ་ཆེ་རུ་གཏོང་དགོས། སྡོད་ཁང་གི་སྤྱི་གསོག་མ་དངུལ་དང་སྡོད་ཁང་གི་ཁ་གསབ་ལམ་ལུགས་འཐུས་སྒོ་ཚང་དུ་བཏང་ནས་གྲོང་ཁྱེར་དང་གྲོང་རྡལ་གྱི་གྲོང་མིའི་སྡོད་ཁང་དང་རླངས་འཁོར་ཐད་ཀྱི་འཛད་སྤྱོད་སྲ་བརྟན་དང་འཕེལ་རྒྱས་གཏོང་དགོས། ཡུལ་སྐོར་དང་། བཟའ་འཐུང་། སྤྲོ་སྐྱིད་སོགས་སྲོལ་རྒྱུན་ཞབས་ཞུའི་འཛད་སྤྱོད་འཕེལ་རྒྱས་ཤུགས་ཆེན་གཏོང་དགོས།
ནང་མཁོ་ཆེ་རུ་ཏན་ཏིག་བཏང་སྟེ་མཁོ་སྤྲོད་འགན་ལེན་བྱས་ནས་གྲོང་ཁྱེར་དང་གྲོང་གསེབ་ཀྱི་ཁྲོམ་ར་དར་རྒྱས་ཆེན་པོ་ཡོང་བ་བྱེད་དགོས་ན་ལྟ་སྐུལ་དོ་དམ་བྱ་རྒྱུར་ཤུགས་སྣོན་བརྒྱབ་ནས་འཛད་སྤྱོད་ཁོར་ཡུག་ལེགས་སུ་གཏོང་དགོས་ཤིང་། “འབྲུ་རིགས ”དང “ཤ་ཚལ་སྒོང་གསུམ ”ལ་སྲིད་གཞུང་གི “འགོ་ཁྲིད་གཙོ་བོ ”ཡིས་འགན་འཁུར་བའི་ལམ་ལུགས་དོན་འཁྱོལ་ཡག་པོ་བྱས་ཏེ་ཐོན་སྐྱེད་འཕེལ་རྒྱས་ཤུགས་ཆེན་གཏོང་བ་དང་། ཚོང་ཟོག་གལ་ཆེན་གསོག་འཇོག་ལམ་ལུགས་འཐུས་སྒོ་ཚང་དུ་གཏོང་བ། ཁྲོམ་རས་སྙོམས་སྒྲིག་བྱ་རྒྱུར་ཤུགས་སྣོན་རྒྱག་པ། མཁོ་སྤྲོད་ནུས་ལྡན་བྱེད་ཤུགས་ཆེ་རུ་གཏོང་བ་བཅས་བྱས་ནས་ཁྲོམ་རའི་མཁོ་སྤྲོད་འགན་ལེན་བྱེད་དགོས། གྲོང་ཁྱེར་དང་གྲོང་རྡལ་གྱི་ཚོང་དོན་ཟོག་འདྲེན་ཁེ་ལས་འཕེལ་རྒྱས་ཤུགས་ཆེན་བཏང་ནས་ཐག་ཉེ་ལ་སྟབས་བདེ་བའི་གྲོང་ཁྱེར་དང་གྲོང་གསེབ་ཀྱི་ཚོང་དོན་ཟོག་འདྲེན་མ་ལག་རིམ་བཞིན་འཐུས་སྒོ་ཚང་དུ་གཏོང་དགོས། ནུས་ཤུགས་ཡོད་རྒུ་བཏོན་ནས་འཛད་སྤྱོད་ཁྲོམ་ར་ལེགས་སྒྲིག་དང་ཚད་ལྡན་དུ་གཏོང་བ་དང་རྫུས་མ་བཟོ་བ་དང་། རྫུས་མ་འཚོང་བ། བཙན་ཤེད་ཀྱིས་ཉོ་བའམ་འཚོང་བ་སོགས་ཀྱི་བྱ་སྤྱོད་ལ་ཁྲིམས་ལུགས་ལྟར་ཆད་གཅོད་བྱས་ཏེ་འཛད་སྤྱོད་ཁོར་ཡུག་ལེགས་སུ་གཏོང་བ་དང་འཛད་སྤྱོད་པའི་ཁེ་དབང་ལ་སྲུང་སྐྱོང་བྱེད་དགོས། མིག་སྔའི་ཟོག་གོང་རྒྱུན་ཆད་མེད་པར་འཕར་ཚུལ་དེར་དོ་ཁུར་ཆེན་པོ་བྱས་ཏེ་ཟོག་གོང་ལྟ་ཞིབ་ཚད་ལེན་དང་སྔོན་བརྡའི་ལས་དོན་ཡག་པོ་སྒྲུབ་དགོས། ཁེ་ལས་ཀྱི་རྒྱུན་ལྡན་གྱི་གཉེར་སྐྱོང་བྱེད་སྒོར་སྲུང་སྐྱོང་བྱ་རྒྱུ་དང་རིན་གོང་ཐད་ཀྱི་ཁྲིམས་འགལ་བྱ་སྤྱོད་ལ་རྡུང་རྡེག་གཏོང་རྒྱུ་གཉིས་ཟུང་འབྲེལ་གྱིས་དཔལ་འབྱོར་དང་། ཁྲིམས་ལུགས། དགོས་ངེས་ཀྱི་སྲིད་འཛིན་བཅས་བྱེད་ཐབས་ཕྱོགས་བསྡུས་ངང་སྤྱད་དེ་ཁྲོམ་རའི་སྒྲིག་ལམ་ལེགས་སྒྲིག་བྱེད་པ་དང་ནན་དུ་གཏོང་བ་དང་། གཉེར་སྐྱོང་བྱ་སྤྱོད་ཚད་ལྡན་དུ་གཏོང་བ། ཟོག་གོང་ཧམ་སྤོར་བྱེད་པ་དང་འབེལ་ཉོ་དཀོན་འཚོང་བྱེད་པ་སོགས་ཀྱི་ཁྲོམ་ར་ཟང་ཟིང་བཟོ་བའི་བྱ་སྤྱོད་ལ་རྡུང་རྡེག་ཚ་ནན་གཏོང་བ། ཚོང་ཟོག་དང་འཚོ་བའི་མཁོ་ཆས་གསོག་འཇོག་དང་མཁོ་འདོན་བྱ་རྒྱུར་ཤུགས་སྣོན་རྒྱག་པ་བཅས་བྱས་ནས་དངོས་ཟོག་རྫོགས་པ་དང་དངོས་ཟོག་གི་རྒྱུན་ཆད་པ་ལ་སོགས་པའི་གནས་ཚུལ་ཐོན་རྒྱུ་སྔོན་འགོག་བྱེད་དགོས།