འདི་ནི་སྤྱི་ལོ་1999ལོའི་ཟླ་ལྔ་པར་བོད་ལྗོངས་རི་འཛེག་རུ་ཁག་གིས་ཇོ་མོ་གླང་མའི་རི་རྩེར་འཛེགས་རྗེས་ཀྱི་དྲན་རྟེན་འདྲ་པར་ཡིན་པ།

    ཕྲུ་གུ་དེ་དག་ནི་བོད་ལྗོངས་རི་འཛེག་སློབ་གྲྭས་འདི་ལོ་གསར་དུ་བསྡུས་པའི་སློབ་མ་ཁག་གཅིག་ཡིན་ཞིང་། ཁོང་ཚོ་ནི་ཀྲུང་གོའི་རི་འཛེག་བྱ་གཞག་གི་མ་འོངས་པའི་རེ་བ་ཡིན་པ།

    རྒྱལ་ས་པེ་ཅིང་དུ་ཉིན་ལྟར་ཞོགས་པ་གཟི་ཉམས་ལྡན་པའི་རྒྱལ་དར་སྲུང་སྐྱོང་རུ་ཁག་གཅིག་ཡོད་པ་དེས་དམར་མདངས་བཀྲ་བའི་སྐར་ལྔའི་དར་དམར་གནམ་བདེ་སྒོ་མོའི་ཐང་ཆེན་ཐོག་དལ་བུར་སྒྲེང་གི་ཡོད།

    གངས་ལྗོངས་ས་མཐོར་དཔའ་ངར་ཞུམ་མེད་ཀྱི་རི་འཛེག་ཕོ་རྒོད་ཁྱུ་གཅིག་ཡོད་པ་དེས་སྐར་ལྔའི་དར་དམར་འཛམ་གླིང་ཡང་རྩེར་བཙུགས་ནས་ལྷབ་ལྷུབ་ཏུ་གཡོ།

    ཁོང་ཚོ་ནི་བོད་ལྗོངས་རི་འཛེག་རུ་ཁག་རེད།

    “ངེས་པར་དུ་སྐར་ལྔའི་དར་དམར་འཛམ་གླིང་གི་ཡང་རྩེ་ཚང་མར་འཛུགས་རྒྱུ་ཡིན ”ཞེས་བོད་ལྗོངས་རི་འཛེག་རུ་ཁག་བཙུགས་ནས་ལོ་50རིང་བླ་ན་མེད་པའི་དོན་གཉེར་དེའི་ཆེད་དུ་རང་ལྗོངས་ཀྱི་རི་འཛེག་ཕོ་རྒོད་ཀྱིས་དཀའ་སྤྱད་འབད་བརྩོན་དང་འབད་འབུངས་ཆེར་བསྐྱེད་ཀྱིས་རི་རྩེར་འགྲན་སློང་ཡང་ཡང་བྱས་པ་དང་དཀའ་གནད་ཆེ་ཤོས་ལ་འགྲན་སློང་ཡང་ཡང་བྱས་པ་དང་། ལང་ཚོ་དང་། ཁྲག་དྲོན། ཐ་ན་ཚེ་སྲོག་གིས་མེས་རྒྱལ་གྱི་དྲིན་ལན་འཇལ་བའི་བློ་དཀར་ཟོལ་མེད་ཀྱི་དམ་བཅའ་ཡང་ཡང་སྒྲུབ་པ། མིའི་རིགས་ཀྱི་རླབས་ཆེའི་བྱ་སྤྱོད་དང་འཛམ་གླིང་རི་འཛེག་ལོ་རྒྱུས་ཐོག་གི་བྱས་རྗེས་ངོ་མཚར་ཡང་ཡང་བཏོད་པ་བཅས་དང་དུས་མཚུངས “དཀའ་ཉེན་ལ་མི་སྐྲག་པ་དང་། དཔའ་ངར་ཆེན་པོས་ཡང་རྩེར་འཛེགས་པ། འབད་འཐབ་ལྷོད་མེད་བྱེད་པ། མཐུན་སྒྲིལ་མཉམ་སྒྲུབ་བྱེད་པ། མེས་རྒྱལ་གོང་དུ་བཀུར་བ ”བཅས་ཀྱི་རླབས་ཆེན་རི་འཛེག་སྙིང་སྟོབས་ཤིག་བཏོད་ཡོད།

    ལོ་50རིང་གི་རི་འཛེག་ལམ་བུའི་ཐོག་འཛམ་གླིང་གི་ཟིན་ཐོ་ཡང་ཡང་བཏོད་པ།

    “ངེས་པར་དུ་ཇོ་མོ་གླང་མར་འཛེག་ཐུབ་པ་བྱེད་དགོས ”ཞེས་པ་དེ་ཙུང་ལི་ཀྲོའུ་ཨེན་ལའེ་ཡི་བཀའ་སློབ་ཡིན་པ་མ་ཟད་རྒྱལ་ཡོངས་མི་དམངས་ཀྱི་ཁ་ཞེ་གཉིས་མེད་ཀྱི་རེ་བ་ཡང་རེད།

    1960ལོར་རང་རྒྱལ་དུ་རི་འཛེག་རུ་ཁག་ཆེན་པོ་ཞིག་བཙུགས་ནས་ཇོ་མོ་གླང་མར་ཐོག་མར་འཛེགས་པ་རེད། ད་ཐེངས་རུ་ཁག་གི་བཀོད་འདོམས་གནང་མཁན་ཙུང་ལི་ཀྲོའུ་ཨེན་ལའེ་ཡིས་ཀྲུང་གོ་རི་འཛེག་རུ་ཁག་ལ་ཏར་བཏང་གནང་བ་དེ་ནི་ཏང་ཀྲུང་དབྱང་གིས་ཀྲུང་གོ་རི་འཛེག་རུ་ཁག་ལ་བཏང་བའི་སྐུལ་སློང་བཀའ་རྒྱ་རེད།

    དུས་རབས་གོང་མའི་དུས་འགོ་ཤར་ཚུན་ནུབ་ཕྱོགས་ཀྱི་རི་འཛེག་མྱུལ་དཔྱད་མཁན་ཚོས་སྒྲིག་ཆས་འཁྱེར་ནས་བོད་དུ་ཡང་ནས་ཡང་དུ་ཡོང་སྟེ་བྱང་ངོས་ནས་འཛམ་གླིང་གི་རི་རྩེ་མཐོ་ཤོས་སུ་འཛེག་གང་ཐུབ་བྱས་ཀྱང་རྐྱེན་ངན་བར་ཆད་ཡང་ཡང་འཕྲད།

    འགྲན་ཟླ་བྲལ་བའི་ཀྲུང་གོའི་རི་འཛེག་རུ་ཁག་ལ་རྒྱལ་ཁ་ཐོབ་ནས་ནུབ་ཕྱོགས་བའི་ལྷ་སྒྲུང་མིང་གི་ལྷག་མར་བཏང་། ཟླ་5ཚེས་25ཉིན་དཀའ་ཉེན་འཕྲད་པའི་བོད་རིགས་རུ་མི་མགོན་པོ་དང་རྒྱ་རིགས་རུ་མི་ཝང་ཕུའུ་ཀྲོའུ་དང་ཆུས་དབྱིན་ཧྭས་སྐར་ལྔའི་དར་དམར་ཇོ་མོ་གླང་མར་བཙུགས་པས་མིའི་རིགས་ཀྱི་བྱང་ངོས་ནས་སའི་གོ་ལའི་ཡང་རྩེར་ཐེངས་དང་པོར་འཛེགས་པའི་རླབས་ཆེའི་བྱ་སྤྱོད་བཏོད། ཀྲུང་གོའི་རི་འཛེག་རུ་ཁག་གི་དཔའ་བོའི་བྱས་རྗེས་ལས་རང་བྱུང་གནོད་འཚེ་ཚབས་ཆེན་དང་འཐབ་བཞིན་པའི་རྒྱལ་ཡོངས་མི་རིགས་ཁག་གི་མི་དམངས་ལ་སྐུལ་མ་ཆེན་པོ་ཐེབས།

    1975ལོར་ཀྲུང་གོའི་རི་འཛེག་རུ་ཁག་གིས་ཇོ་མོ་གླང་མར་ཐེངས་གཉིས་པ་འཛེགས། བུད་མེད་རུ་མི་ཕན་ཐོགས་ཚུད་པའི་ལུས་རྩལ་པ་9ཐེངས་གཅིག་ཁོ་ནར་རི་རྩེར་འཛེགས་ཐུབ་པ་བྱུང་བ་དང་དུས་དེར་འཕྲལ་སྒྲུབ་རུ་མི་ཚོས་ཉིན་གཅིག་རིང་གི་དཀའ་སྤྱད་ངལ་རྩོལ་བརྒྱུད་རྒྱ་མཚོའི་ངོས་ལས་མཐོ་ཚད་སྨི 8700སར་སྐས་རིམ་གཉིས་པའི་ཐོག་ལྕགས་ཀྱི་སྐས་ཀ་ཞིག་བཙུགས་པས་ད་ལྟའི་བར་དུ་བེད་སྤྱོད་བྱེད་ཀྱི་ཡོད་པ་དང་རྒྱལ་ཁབ་ཁག་གི་རི་འཛེག་མཁན་ཚོས “ཀྲུང་གོའི་སྐས་ཀ ”ཞེས་བརྗོད་ཀྱི་ཡོད།

    1985ལོའི་ཟླ་4པར་བོད་ལྗོངས་རི་འཛེག་རུ་ཁག་གིས་ཁེར་རྐྱང་ངང་རུ་ཁག་སྒྲིག་འཛུགས་བྱས་ནས་རྒྱ་མཚོའི་ངོས་ལས་མཐོ་ཚད་སྨི 8201ཡོད་པའི་འཛམ་གླིང་གི་ཡང་རྩེ་དྲུག་པ་སྟེ་ཇོ་བོ་དབུ་ཡག་ལ་ཐེངས་དང་པོར་འཛེགས་པ་དང་རུ་མི་9རི་རྩེར་འཛེགས་ཐུབ་པ་བྱུང་ཡོད།

    1988ལོར་ཀྲུང་གོ་དང་། རི་པིན། ནེ་པ་ལ་བཅས་རྒྱལ་ཁབ་གསུམ་པོའི་རི་འཛེག་མཁན་ཚོས་མཉམ་དུ་ཇོ་མོ་གླང་མར་འཛེགས་ཏེ་ལྷོ་བྱང་ངོས་གཉིས་ནས་འཛེགས་ཏེ་རི་རྩེར་མཉམ་འཛོམས་དང་ཕྱོགས་གཉིས་ནས་ཇོ་མོ་གླང་མར་འཕྲེད་བརྒལ་བྱ་རྒྱུ་ལེགས་གྲུབ་བྱུང་བ་དང་རང་ལྗོངས་ཀྱི་རི་འཛེག་རུ་མི་ཚེ་རིང་རྡོ་རྗེས་ཡང་རྩེར་གསོ་རླུང་མེད་པའི་འོག་སྐར་མ་99སྡོད་ཐུབ་པའི་འཛམ་གླིང་གི་ཟིན་ཐོ་བཏོད།

    1993ལོར་བོད་ལྗོངས་རི་འཛེག་རུ་ཁག་གིས་རི་འཛེག་དུས་ཚིགས་གཅིག་གི་རིང་རྒྱ་མཚོའི་ངོས་ལས་མཐོ་ཚད་སྨི་8000ཡན་གྱི་རི་བོ་གཉིས་ལ་འཛེགས་པས་རྒྱལ་སྤྱིའི་རི་འཛེག་ལས་རིགས་ཧ་ལས་ཧང་སངས་པར་གྱུར།

    1999ལོར་ཁོང་ཚོ་ཇོ་མོ་གླང་མར་འཛེགས་ནས་སའི་གོ་ལའི་ཡང་རྩེར་མི་རིགས་ལུས་རྩལ་འགྲན་ཚོགས་སྐབས་དྲུག་པའི་མེ་སོན་སྤར་བ་དང་སྤེན་པ་བཀྲ་ཤིས་ཀྱིས་རྒྱ་མཚོའི་ངོས་ལས་མཐོ་ཚད་སྨི་8300ཡོད་པའི་འཕྲལ་སྒྲུབ་སྒར་ས་ནས་ཐོན་ཏེ་ཆུ་ཚོད་4དང་སྐར་མ་47ནང་རི་རྩེར་འཛེགས་ཐུབ་པས་རི་རྩེར་འཛེག་མཁན་མགྱོགས་ཤོས་སུ་གྱུར་བ་དང་ཆབས་ཅིག་རིག་རྣམ་དང་སྐྱིད་སྐྱིད་གཉིས་མཉམ་དུ་ཡང་རྩེར་འཛེག་པའི་ཀྲུང་གོའི་ཁྱོ་ཤུག་དང་པོར་གྱུར།

    ལོ་ངོ་50རིང་སྔ་རྗེས་སུ་བོད་ལྗོངས་རི་འཛེག་རུ་ཁག་གི་རུ་མི་80ལྷག་ཙམ་ཇོ་མོ་གླང་མར་འཛེགས་པ་དང་། མི་ཐེངས 280ཡིས་ཇོ་མོ་གླང་མའི་སྨི་8000ཡན་གྱི་རི་བོར་འཛེགས་པ། མི་24ལ་སྔ་རྗེས་སུ་རྒྱལ་སྤྱིའི་རིམ་པའི་རི་འཛེག་ལུས་རྩལ་ཕོ་རྒོད་ཀྱི་མཚན་སྙན་ཐོབ་པ། ཚེ་རིང་རྡོ་རྗེ་སོགས་ལུས་རྩལ་པ་མང་པོར་རྒྱལ་ཡོངས་ཀྱི “ལྔ་གཅིག ”ངལ་རྩོལ་གཟེངས་རྟགས་དང་རྒྱལ་ཡོངས “གསུམ་བརྒྱད ”དར་དམར་བའི་མཚན་སྙན་ཐོབ་ཡོད། 2000ལོར་རང་སྐྱོང་ལྗོངས་མི་དམངས་སྲིད་གཞུང་གིས་བོད་ལྗོངས་རི་འཛེག་རུ་ཁག་ལ “ས་མཐོའི་དཔའ་བོའི་རི་འཛེག་རུ་ཁག ”གི་གཟི་བརྗིད་མཚན་སྙན་གནང་བ་དང་ད་ལོར་རང་སྐྱོང་ལྗོངས་སྲིད་གཞུང་གིས་སླར་ཡང “ས་མཐོའི་དཔའ་བོའི་མཉམ་སྡེབ་རི་འཛེག་རུ་ཁག ”ཅེས་པའི་གཟི་བརྗིད་མཚན་སྙན་གནང་རྒྱུའི་གཏན་འབེབས་གནང་།

    ལོ་14རིང་རི་བོ་14ལ་འཛེགས་ནས་གཟི་བརྗིད་དང་བསམ་འདུན་སྒྲུབ་པ།

    2007ལོའི་ཟླ་7ཚེས་12ཉིན་གྱི་ཆུ་ཚོད་12དང་སྐར་མ་20ནི་1992ལོའི་ལོ་མཇུག་ཏུ་བཙུགས་པའི “རྒྱ་མཚོའི་ངོས་ལས་མཐོ་ཚད་སྨི་8000ཡན་གྱི་འཛམ་གླིང་གི་རི་རྩེ་14ལ་འཛེག་པའི་ཀྲུང་གོ་བོད་ལྗོངས་མྱུལ་དཔྱད་རུ་ཁག ”གི་ལོ་རྒྱུས་ཐོག་ལམ་ཚད་རྡོ་རིང་ལྟར་གྱི་དོན་སྙིང་ལྡན་པའི་དུས་སྐབས་ཤིག་རེད། གཙོ་ཤུགས་རུ་མི་ཚེ་རིང་རྡོ་རྗེ་དང་། སྤེན་པ་བཀྲ་ཤིས། བློ་ཚེ་བཅས་ཀྱིས་རྒྱ་མཚོའི་ངོས་ལས་མཐོ་ཚད་སྨི་8068ཡོད་པའི་འཛམ་གླིང་གི་རི་རྩེ་བཅུ་གཅིག་པ་ཅ་ཧྲུའུ་པུའུ་མུའུ Ⅰཔའི་རི་རྩེར་ལངས་ཏེ་རྣམ་པར་བཀྲ་བའི་སྐར་ལྔའི་དར་དམར་བཀྲམ་ནས་སེམས་འགུལ་ཐེབས་པའི་སྒོ་ནས་ཕན་ཚུན་འཐམ་འཁྱུད་བྱས་ཏེ་འཛམ་གླིང་ཐོག་གི་རི་རྩེ་14ཚང་མར་འཛེགས་རྒྱུ་ལེགས་གྲུབ་བྱུང་བར་རྟེན་འབྲེལ་ཞུས།

    ཉིན་དེའི་ཆེད་དུ་འཛམ་གླིང་ཐོག་ཚོགས་པའི་རྣམ་པའི་ཐོག་ནས་རི་རྩེ་14ལ་འཛེགས་པའི་རི་འཛེག་རུ་ཁག་གཅིག་པུ་དེས་ཧི་མ་ལ་ཡ་དང་ཁ་ར་ཁུ་ནུ་རི་རྒྱུད་ཀྱི་གངས་རིའི་ར་བའི་ཁྲོད་ལོ་ངོ་14ཏག་ཏག་འབད་འཐབ་བྱས། བོད་ཀྱི་ས་ཐག་རིང་བའི་ཞིང་འབྲོག་ཁུལ་ནས་ཡིན་པའི་བབ་ཆགས་པའི་བོད་རིགས་ཕོ་རྒོད་བཅུ་ལྷག་ཙམ་གྱིས་རང་ཉིད་ཀྱི་ཆེས་མཛེས་སྡུག་ལྡན་པའི་ལང་ཚོའི་ལོ་ཟླ་དེ་གངས་རིའི་ཁྲོད་དུ་ཕུལ་བ་དང་ཉེན་ཁ་གཅིག་རྗེས་གཉིས་མཐུད་དུ་བྱུང་བའི་རྩེར་སྙེགས་ཀྱི་ལམ་བུ་རེ་རེ་བརྒྱུད་ཡོད།

    1993ལོ་ནས་2007ལོའི་བར་མྱུལ་དཔྱད་རུ་ཁག་གིས་སྔ་རྗེས་སུ་ནེ་པ་ལ་དང་། ཀྲུང་གོའི་བོད་ལྗོངས། པ་ཀེ་སི་ཐན་བཅས་ས་མཚམས་ནང་གི་འཛམ་གླིང་ཐོག་གི་རི་རྩེར་འཛེགས་པ་དང་མི་གསུམ་གྱིས་རི་རྩེ་14ལ་འཛེགས་ཏེ་ཚོགས་པའི་རྣམ་པའི་ཐོག་ནས་རི་རྩེ་14ལ་འཛེགས་པའི་འཛམ་གླིང་གི་ཟིན་ཐོ་བཏོད།

    སའི་གོ་ལའི་སྟེང་དུ་རྒྱ་མཚོའི་ངོས་ལས་མཐོ་ཚད་སྨི་8000ཡན་གྱི་རི་རྩེ་14ཡོད་པ་དང་ཨེ་ཀྲ་ལི་བ་མེ་སི་ནར་གྱིས་1970ལོར་རི་རྩེ་14ལ་འཛེག་འགོ་ཚུགས་ཚུན་འཛམ་གླིང་ཐོག་དམིགས་ཚད་དེ་ལེགས་གྲུབ་བྱུང་མཁན་རི་འཛེག་མཁས་ཅན་13ལས་མེད། ད་ཆ་ཀྲུང་གོའི་བོད་རིགས་རུ་མི་གསུམ་དེའི་ཁོངས་སུ་ཚུད་པ་དང་བསམ་འདུན་མངོན་འགྱུར་བྱུང་སྟེ་གཟི་བརྗིད་མཚན་སྙན་ནི་རླབས་ཆེན་གྱི་ཀྲུང་གོ་མི་དམངས་ལ་གཏོགས།

    ལང་ཚོ་དང་ཁྲག་དྲོན་ལས་གྲུབ་པའི་རླབས་ཆེན་གྱི་རི་འཛེག་སྙིང་སྟོབས།

    ལོ་50ཡི་རིང་བོད་ཀྱི་རི་འཛེག་རུ་ཁག་སྒར་ས་ཆེན་པོར་སླེབས་རིམ་བཞིན་བརྗིད་ཉམས་ལྡན་པའི་རྒྱལ་དར་སྒྲེང་བའི་མཛད་སྒོ་འཚོགས་ཀྱི་ཡོད། ཁ་བས་བཀླུབས་པའི་འཇིག་རྟེན་ཐོག་དམར་མདངས་བཀྲ་བའི་སྐར་ལྔའི་དར་དམར་ལྷབ་ལྷུབ་ཏུ་གཡོ་སྐབས་རུ་མི་ཚོ་བློ་བདེ་པོ་ཡོང་གི་ཡོད། གང་ལགས་ཤེ་ན། རླབས་ཆེན་མེས་རྒྱལ་དང་ཉིན་བཞིན་ཡར་ངོའི་ཟླ་ལྟར་འཕེལ་བའི་སྤྱི་ཚོགས་རིང་ལུགས་ཀྱི་བོད་གསར་ནི་ཁོང་ཚོའི་རྒྱབ་རྟེན་ཆེན་པོ་ཞིག་ཡིན་པས་རེད། བླ་ན་མེད་པའི་རྒྱལ་གཅེས་རིང་ལུགས་ཀྱི་སྙིང་སྟབས་དེ་རིགས་ཀྱིས་བོད་ཀྱི་རི་འཛེག་རུ་མི་མི་རབས་འགའ་ཞིག་གིས་དཔའ་མཛངས་རྟུལ་ཕོད་ཀྱིས་མདུན་དུ་བསྐྱོད་རྒྱུར་སྐུལ་མ་ཐེབས་ཡོད། 1990ལོར་ཀྲུང་གོ་དང་། ཨ་རི། སུའུ་ལན་བཅས་རྒྱལ་ཁབ་གསུམ་གྱི་རི་འཛེག་རུ་ཁག་གིས་མཉམ་འབྲེལ་ཐོག་ཇོ་མོ་གླང་མར་འཛེགས་པ་དང་བོད་ཀྱི་རུ་མིའི་རི་འཛེག་གི་ནུས་པ་ཆེ་ཤོས་དང་རི་འཛེག་གི་མྱུར་ཚད་མགྱོགས་ཤོས་ཡིན་པས་ཨ་རི་དང་སུའུ་ལེན་གྱི་རི་འཛེག་རུ་མི་ཧང་སངས་ནས་ཁོང་ཚོས་ཀྲུང་གོའི་རི་འཛེག་རུ་མི་ཚང་མར་སྙིང་དང་གློ་བ་ཐོལ་པ་ཡོད་པ་འདྲ་ཞེས་བཤད། འོན་ཏེ་བོད་ཀྱི་རུ་མི་ཚོས “ང་ཚོར་སེམས་པ་ཐོལ་པ་གཅིག་ཡོད་པ་དེ་ནི་མེས་རྒྱལ་དང་མི་དམངས་ཀྱི་ཆེད་དུ་གཟི་བརྗིད་མཚན་སྙན་བརྩོན་ལེན་བྱེད་པའི་སེམས་པ་དེ་རེད ”ཅེས་ཤོད་ཀྱི་ཡོད།

    རི་བོ་14ཡི་མྱུལ་དཔྱད་རུ་ཁག་གི་རུ་མི་གཙོ་བོ་ཡིན་པའི་རྒྱལ་སྤྱིའི་རིམ་པའི་རི་འཛེག་ལུས་རྩལ་ཕོ་རྒོད་རིག་རྣམ་གྱིས་རྒྱ་མཚོའི་ངོས་ལས་མཐོ་ཚད་སྤྱི་ཁྲེ་8000ཡན་གྱི་རི་བོ་13ལ་གྲུབ་འབྲས་ཐོབ་པའི་སྒོ་ནས་འཛེགས་པ་དང་ཉེན་ཁ་སྣ་ཚོགས་ལས་ཐེངས་མང་བསྒྲལ་ཡོད། འོན་ཏེ་གྲུབ་འབྲས་ཆེན་པོ་ཐོབ་ཉེར་ཡོད་པའི་སྐབས་སུ་ཁོང་རི་བོ་མཇུག་ཤོས་དེ་འཛེག་པའི་ལམ་བར་དུ་འགྱེལ། གཉེན་ཉེའི་སྒྲུབ་མི་ཐུབ་པའི་བྱ་གཞག་ལེགས་སྒྲུབ་དང་མེས་རྒྱལ་གྱིས་གནང་བའི་འགན་འཁྲི་ལེགས་སྒྲུབ་བྱེད་ཆེད་ཁོང་གི་བཟའ་ཟླ་སྐྱིད་སྐྱིད་ཀྱིས་ཅ་ཧྲུའུ་པུའུ་ལུའུ་མུའི་རི་རྩེ་Iའཛེག་པའི་བྱ་སྤྱོད་ནང་ཞུགས་རྒྱུའི་རེ་བ་བཏོན་པ་དང་འབྲེལ་རི་རྩེར་འཛེགས་ཐུབ་པ་བྱུང་སྟེ་ཀྲུང་གོའི་ཅ་ཧྲུའུ་པུའུ་ལུའུ་མུའི་རི་རྩེ་Iའཛེག་མཁན་བུད་མེད་དང་པོར་གྱུར།

    2005ལོར་རྒྱལ་ཁབ་ཀྱི་ལུས་རྩལ་ལས་འགུལ་གྱི་གཟི་བརྗིད་མཚན་སྙན་ཐེངས་གསུམ་ཐོབ་མྱོང་བའི་རྒྱལ་ཡོངས་ཀྱི་སྔོན་ཐོན་ལས་དོན་པ་སྤེན་པ་བཀྲ་ཤིས་ཀྱི་ལུས་པོ་ཚབས་ཆེན་རྨས་ཏེ་རྣ་བ་གཡས་པའི་དབང་པོ་ཉམས། རྒྱུན་གཏན་ལྟར་ན། ཁོང་སླར་ཡང་རི་འཛེག་ལས་འགུལ་ནང་ཞུགས་རྒྱུར་མི་འཚམས་མོད། འོན་ཏེ་ཁོང་གིས་རི་བོ་14ཡི་མྱུལ་དཔྱད་རུ་ཁག་ནང་ཁོང་དང་སྐུ་གཤེགས་པའི་རིག་རྣམ་ཕུད་རི་བོ་13འཛེག་ཐུབ་མཁན་ཚེ་རིང་རྡོ་རྗེ་དང་བློ་ཚེ་གཉིས་ལས་མེད། གལ་ཏེ་ཁོང་གིས་རི་བོ་མཇུག་ཤོས་དེ་འཛེག་རྒྱུ་དོར་ཚེ་ཚོགས་པའི་ཐོག་ནས་རི་བོ་14ཚང་མར་འཛེག་པའི་ཟིན་ཐོའི་མཚན་སྙན་ལ་གནོད་པ་གསལ་པོར་ཤེས་པར་བརྟེན་ན་ཟུག་གི་ཇི་ལྟར་མནར་ཡང་ཁོང་གིས “སྐར་ལྔའི་དར་དམར་རི་བོ་མཇུག་ཤོས་དེར་འཛུགས་པའི ”དད་སེམས་ལ་གཡོ་འགུལ་སྤུ་ཙམ་ཡང་ཐེབས་མེད།

    མིའི་རིགས་ཀྱི་ལོ་རྒྱུས་ཆུ་རྒྱུན་ནང་ལོ་ངོ་50ནི་སྐད་ཅིག་ཙམ་ཞིག་རེད། འོན་ཏེ་བོད་ཀྱི་རི་འཛེག་ཕོ་རྒོད་ཚོའི་ངོས་ནས་བརྗོད་ན་ཁོང་ཚོའི་རྩ་ཆེའི་མི་ཚེའི་ནང་འོད་སྟོང་འཕྲོ་ཆེ་ཤོས་ཀྱི་ལང་ཚོའི་ལོ་ཟླ་ཞིག་ཡིན། ཁོང་ཚོའི་ལུས་ཐོག་ནས་མངོན་པའི “དཀའ་ཉེན་ལ་མི་སྐྲག་པ་དང་དཔའ་ངར་ཆེན་པོས་ཡང་རྩེར་འཛེགས་པ། འབད་འཐབ་ལྷོད་མེད་བྱེད་པ། མཐུན་སྒྲིལ་མཉམ་སྒྲུབ་བྱེད་པ། མེས་རྒྱལ་གོང་ན་མེད་པ་བརྩི་བ ”བཅས་ཀྱི་རླབས་ཆེན་རི་འཛེག་སྙིང་སྟོབས་དེ་དུས་སྐབས་གསར་པའི་ཀྲུང་ཧྭ་མི་རིགས་སྙིང་སྟོབས་ཀྱི་གྲུབ་ཆ་གལ་ཆེན་ཞིག་ཏུ་གྱུར་ཡོད།