སྒོ་ཁྱི།
སྒོ་ཁྱི་ནི་སྦྲ་ཁྱིམ་དང་དུད་ཁྱིམ་གང་རུང་གི་སྒོ་ཁར་བཏགས་ཡོད་པའི་ཁྱིའི་མིང་སྟེ། བབ་ཆགས་པའི་ཐ་སྙད་འདི་ལས་ཀྱང་སེམས་ཅན་གང་དེའི་ལས་དབང་གིས་བསྐོས་པའི་གོ་གནས་དེ་མངོན་མཚོན་བྱས་ཡོད་པ་རེད། དེར་བརྟེན། ཁང་ཁྱིམ་དང་རླངས་འཁོར་ནང་བྱིས་པ་བཞིན་བདེ་སྐྱིད་ཀྱི་རྨི་ལམ་རྨི་བཞིན་པའི་ཁྱི་གུ་དེའི་རིགས་ནི་སྒོ་ཁྱི་མིན་ལ། སྟོད་གོས་ཀྱིས་གཟབ་མཆོར་སྤྲས་ཤིང་ཐོག་ཁང་གི་མལ་ཁྲིའི་སྟེང་ན་གན་རྐྱལ་དུ་ཉལ་བའི་ཁྱི་རྒན་དེའི་རིགས་ཀྱང་སྒོ་ཁྱི་ག་ལ་ཡིན།
སྒོ་ཁྱི་ནི་ཉིན་མཚན་དུས་དྲུག་ལ་འདོགས་ཐག་འདོམ་གང་གི་རང་དབང་ཁྲོད་ཚེ་ཚད་ཟད་ཀྱིན་པའི་སེམས་ཅན་སྙིང་རྗེ་བོ་དེ་ཡིན་ལ། སྒོ་ཁྱི་ནི་ཁ་ཟས་ཐུན་གཅིག་གིས་ཉིན་ཞག་ཁ་སྤྲོད་ལ་སྒོ་ཕྱུགས་དང་དུད་ཁྱིམ་གྱི་ཆགས་འཇིག་སྲུང་བཞིན་པའི་བློས་ཐུབ་ཀྱི་གྲོགས་པོ་དེ་ཡིན་ལགས། ནམ་རྒྱུན། ང་ཚོས་སྦྲ་ནག་གི་དྲོད་ཁོལ་འོག་ཏུ་ཞིམ་མངར་གྱི་བཟའ་བཏུང་ལ་རོལ་དུས། སྒོ་ཁྱི་ནི་བཙན་རྒོལ་གྱི་སོ་སྲུང་བ་ཇི་བཞིན་ཁ་ཆར་དང་བུ་ཡུག་ཁྲོད་དུ་ཀྲོང་ངེར་འགྲེང་ཡོད་ལ། ང་ཚོས་ཁང་ཁྱིམ་གྱི་མལ་གདན་སྟེང་དུ་རྨི་ལམ་གྱི་ཞིང་ཁམས་མྱུལ་དུས། སྒོ་ཁྱི་ནི་ལྷས་འགྲམ་གྱི་འདོགས་ཕུར་འཁྲིས་ན་ལྟོག་སྐོམ་གྱི་ན་ཟུག་སྒོམ་གྱིན་མཚན་ལྗོངས་ཀྱི་ལྷིང་འཇགས་དཀྲོག་བཞིན་གདའ།
སྒོ་ཁྱིས་ང་ཚོར་གནང་བ་ནི་ཟོལ་མེད་ཀྱི་བརྩེ་བ་དང་འགྱུར་མེད་ཀྱི་ཡིད་རྟོན་དེ་ཡིན་ལ། ང་ཚོས་སྒོ་ཁྱིར་ཕུལ་བ་ནི་ལྕགས་ཐག་འདོམ་གང་གི་རང་དབང་དང་ཟས་ལྷག་སྐྱོགས་གང་གི་དྲོད་ཁོལ་དེ་ཡིན། སྒོ་ཁྱིས་ང་ཚོར་བསྐྲུན་པ་ནི་བདེ་འཇགས་ཀྱི་ཁྱིམ་གཞིས་དང་རི་སྤྱང་གི་འགོག་རྒོལ་དེ་ཡིན་ལ། ང་ཚོས་སྒོ་ཁྱིར་བསྐྲུན་པ་ནི་ཚེ་གཅིག་གི་ཁེར་རྐྱང་དང་ཚ་གྲང་གི་སྡུག་ཡུས་དེ་ཡིན། སྒོ་ཁྱིས་ང་ཚོར་བསྩལ་བ་ནི་ཞུམ་མེད་ཀྱི་སྙིང་སྟོབས་དང་མུ་མེད་ཀྱི་བདེ་སྐྱིད་དེ་ཡིན་ལ། ང་ཚོས་སྒོ་ཁྱིར་བྱིན་པ་ནི་སུན་སྣང་གི་ལོ་ཟླ་དང་རྔམ་བརྗིད་ཀྱི་འོས་འགན་དེ་ཡིན་ལགས།
སྒོ་ཁྱི་ལའང་དགའ་སྐྱོ་ཆགས་སྡང་གི་ཚོར་འདུ་ཡོད་ལ། སྒོ་ཁྱི་ལའང་སྐྱེ་རྒ་ན་འཆི་ཡི་སྡུག་བསྔལ་ལོས་ཡོད། སྒོ་ཁྱི་ལའང་ཕ་མ་སྤུན་མཆེད་ཀྱི་ནང་མི་ཡོད་ལ། སྒོ་ཁྱི་ལའང་བཟའ་ཚང་བུ་ཕྲུག་གི་འདོད་བརྩེ་ལོས་ཡོད། དེར་བརྟེན། ང་ཚོས་སྒོ་ཁྱིའི་གཏོང་ཕོད་ཀྱི་སྙིང་སྟོབས་ལ་ཅིས་ཀྱང་བསམ་བློ་གཏོང་དགོས་ཏེ། གཞན་ཕན་གྱི་ལྷག་བསམ་དང་བདག་མེད་ཀྱི་འདུ་ཤེས་ཟེར་བ་དེ་སྒོ་ཁྱི་ལ་དངོས་ནས་ལྡན་པ་རེད། ང་ཚོས་སྒོ་ཁྱིའི་དཀའ་སྡུག་གི་འཚོ་བ་ལ་ངེས་པར་དུ་བསམ་གཞིག་བསྐྱེད་དགོས་ཏེ། ཁེར་རྐྱང་གི་སྡུག་བསྔལ་དང་སུན་སྣང་གི་ཉིན་མཚན་གྲངས་མེད་གཞན་དོན་ཁོ་ནར་བསྐྱལ་མཁན་དེ་སྒོ་ཁྱི་རེད། ང་ཚོས་སྒོ་ཁྱིའི་ལས་དབང་གི་གདམ་གར་སེམས་གཏིང་ནས་འགྱོད་བཤགས་བྱེད་དགོས་ཏེ། རང་ཉིད་ཀྱི་མིག་ཆུ་དང་དཀའ་ཚེགས་ཡོད་ཚད་ང་ཚོའི་བདེ་སྐྱིད་ཀྱི་ཆེད་དུ་འབུལ་མཁན་དེའང་སྒོ་ཁྱི་རེད་ཡཱ།
སྒོ་ཁྱིས་དུས་རྒྱུན་དུ་དབྱར་དགུན་སྟོན་དཔྱིད་ཀྱི་འགྱུར་བག་དང་བསྟུན་ཏེ། སྦྲ་ཁྱིམ་དེ་སྐྱས་སྤོར་བྱེད་པའི་ཉིན་མོ་དེར་རེ་སྒུག་བྱས་ཡོད་དེ། རྒྱུ་མཚན་ནི་ཉིན་མོ་དེར་ཁོ་རང་འདོགས་ཐག་གི་བཀག་རྒྱ་ལས་གྲོལ་ཏེ་རང་དབང་གི་གོམ་སྟབས་བསྒྱུར་ཆོག་པས་རེད། ཉིན་མོ་དེར་སྒོ་ཁྱིས་ལོ་གཅིག་ལ་བཀག་སྡོམ་བྱས་པའི་རྣམ་ཤེས་ཀྱི་གཤོག་ཟུང་དེ་གང་འདོད་དུ་བརྐྱང་ཆོག་པས་རེད། ཉིན་མོ་དེར་ཁོ་རང་རིགས་མཐུན་གྱི་ཁྱི་ཚོགས་ཁྲོད་ནས་རྩེད་འཇོ་ཐེངས་གཅིག་བྱས་ཆོག་པས་རེད། རྒྱུ་མཚན་དེའི་དབང་གིས། སྦྲ་ནག་སྐྱས་སྤོར་གྱི་ཞོགས་པར་བདག་པོས་འདོགས་ཐག་བཀྲོལ་མ་ཐག སྒོ་ཁྱི་ནི་བཙོན་གྲོལ་བྱུང་བའི་བཙོན་པ་ཇི་བཞིན་དགའ་སྤྲོའི་ངང་གནམ་ལྡིང་ས་ལྡིང་བྱེད་ལ། སྒོ་ཁྱི་ནི་ལོང་བར་མིག་ཟུང་སྤྲད་པའི་སྤྲོ་བ་ཇི་བཞིན་གང་འདོད་དུ་ཡར་རྒྱུག་མར་རྒྱུག་བྱེད་དོ།།
ང་ཚོས་སྒོ་ཁྱི་ལ་གཅེས་སྤྲས་བྱ་དགོས་ཏེ། དེའི་ལྷག་བསམ་དང་ཡིད་རྟོན་ནི་སྤྱིར་བཏང་གི་གྲོགས་པོ་ཞིག་ལས་ཆེས་ཆེར་འགོངས་པས་སོ། །ང་ཚོས་སྒོ་ཁྱི་ཡི་དྲིན་ལན་ཚོར་དགོས་ཏེ། དེས་གཞིས་ཁྱིམ་འདིའི་སྐྱིད་སྡུག་གི་སླད་དུ་རང་ཉིད་ཀྱི་ཡོད་ཚད་བློས་བཏང་ཡོད་པས་སོ།། ང་ཚོས་སྒོ་ཁྱི་ལ་ཟས་མཆོག་སྤྲོད་དགོས་ཏེ། དེས་རི་སྤྱང་དང་ཇག་རྐུན་གྱི་འགོག་རྒོལ་ལ་ལུས་ཟུངས་ཀྱི་འཚོ་བཅུད་འཛོམ་དགོས་པས་སོ། །ང་ཚོས་སྒོ་ཁྱི་དེ་རང་གི་བུ་ཕྲུག་བཞིན་བསྐྱང་དགོས་ཏེ། དེས་གནད་འགག་གི་སྐབས་སུ་རང་གི་བུ་ཕྲུག་ལས་ལྷག་པའི་བྱ་སྤྱོད་ཀྱིས་མི་སེམས་སྒུལ་ཐུབ་པས་སོ།།
དེ་ལས་ཀྱང་ཡིད་སྐྱོ་བ་ནི་སྒོ་ཁྱིའི་ཚེ་མཇུག་གི་ལས་དབང་སྟེ། རྒྱུ་འབྲས་དང་སྙིང་རྗེ་བྲལ་བའི་བདག་པོ་ལ་ལས། ཚེ་གཅིག་ལུས་གཅིག་ལ་རང་ཁྱིམ་གྱི་སྐྱིད་སྡུག་ཐད་བློ་སེམས་དཀར་བའི་སྒོ་ཁྱི་གང་དེ་ལོ་ཟླའི་འགྱུར་བག་ཁྲོད་ན་སོ་རྒས་ཚེ། དབང་པོ་ཉམས་རྒུད་དུ་གྱུར་ཏེ་རིན་ཐང་དབེན་ཚེ། རྐང་ལག་ན་ཚོད་ཀྱི་རྐྱེན་པས་ལྡེམ་མྱུར་བྲལ་ཚེ། མཚེར་ཤུལ་དུ་གད་སྙིགས་བཞིན་གཡུག་ཅིང་། སྟོང་འཇགས་འཇགས་ཀྱི་རི་ལུང་དག་ན་བདག་མེད་ཀྱི་དྭ་ཕྲུག་ནང་བཞིན། མིག་ཟུང་མཆི་མས་རློན་གྱིན་སུ་ཞིག་ལ་རེ་སྒུག་གི་མིག་ཟུང་བགྲད་ཡོད། ཁ་ཆར་དང་བུ་ཡུག་གི་འཇབ་རྒོལ་ཁྲོད་ན་གྲང་ལྟོགས་ཀྱི་ན་ཟུག་སྒོམ་བཞིན། ལུས་ཟུངས་ཉག་གཅིག་གི་གསོན་ཤུགས་ལ་བརྟེན་ཏེ་སུ་ཞིག་གི་ལོག་ཕེབས་ལ་རེ་ལྟོས་བྱས་ཡོད་ཨང་།
མདོར་ན། སྒོ་ཁྱི་ནི་ང་ཚོ་མིའི་རིགས་ཀྱིས་ཐབས་ཤེས་དང་གཡོ་ཇུས་ཀྱིས་གྲོགས་སུ་བཀུགས་པ་ནས། རང་ཅག་ལ་ཆེས་བློ་སེམས་དཀར་བའི་སེམས་ལྡན་གཞུང་དྲང་ཞིག་ཡིན་ལ། སྒོ་ཁྱི་ནི་འོ་སྐོལ་མིའི་རིགས་ཀྱིས་སྒེར་སེམས་དང་འདོད་ཧམ་གྱིས་ཁྱིམ་དུ་ཉར་བ་ནས། ཁྱིམ་གཞིས་གང་དེར་ཆེས་ཡིད་རྟོན་བྱེད་པའི་སྲོག་ཆགས་གཏན་ཚིགས་དང་ལྡན་པ་ཞིག་ཀྱང་ཡིན་པས། ལས་འབྲས་དང་བྱང་སེམས་ཀྱི་རྣམ་གཞག་རྟོགས་པའི་བདག་པོ་ལ་ལ་ཞིག་གིས། སྒོ་ཁྱི་དེ་རང་གི་ཁྱིམ་མི་ལྟར་བྱམས་བརྩེ་དང་ཐུགས་ཁུར་གྱིས་བདག་སྐྱོང་བྱེད་སྲིད་ཀྱང་། རང་རེའི་དོན་དངོས་ཀྱི་འཚོ་བའི་ཁྲོད་དུ་དེ་ལྟའི་བདག་པོ་ནི་ཧ་ཅང་ཉུང་ཉུང་ཡིན་པ་ཀུན་གྱིས་ཤེས་གསལ་ལྟར་རེད། དེར་བརྟེན། ང་ཚོས་ཉམ་ཐག་པའི་བློས་ཐུབ་ཀྱི་གྲོགས་པོ་འདིའི་སྐྱིད་སྡུག་ངེས་དགོས་ལ། ང་ཚོས་སྙིང་རྗེ་བའི་འགྱུར་མེད་ཀྱི་སོ་སྲུང་བ་དེའི་དྲིན་ལན་རྟོགས་དགོས་སོ། །ང་ཚོས་བབ་ཆགས་པའི་སྲོག་ཆགས་གང་དེར་བདག་སྐྱོང་ལེགས་པོ་བྱ་དགོས་ལ། ང་ཚོས་བློ་དཀར་བའི་སྒོ་ཁྱིའི་ལྷག་བསམ་དང་དྲིན་ལན་དེ་སེམས་གཏིང་ནས་འཇལ་དགོས་སོ།།
འབྲེལ་ཡོད་གསར་འགྱུར།