བོད་རང་སྐྱོང་ལྗོངས་ཀྱི་མི་རིགས་སྲོལ་རྒྱུན་ལུས་རྩལ་འགྲན་ཚོགས་སྐབས་དྲུག་པའི་འགྲན་རར་ཕྱིར་མིག་ལྟ་སྐབས། ལུས་རྩལ་པ་547གྱིས་འགྲན་ར་གཅིག་ཏུ་རྩལ་ནུས་འགྲན་པ་དང་ཉམས་འགྱུར་ངོམ་ཡོད། འགྲན་བསྡུར་ཕུད། ཁོང་ཚོས་ད་དུང་སྤུན་ཟླའི་བརྩེ་བ་གླེང་བ་དང་མི་རིགས་མཐུན་སྒྲིལ་ཡར་ཐོན་ལ་ཐུན་མོང་ཐོག་བསྔགས་བརྗོད་ཀྱང་བྱས།

སྐབས་འདིའི་མི་རིགས་ཀྱི་སྲོལ་རྒྱུན་ལུས་རྩལ་འགྲན་ཚོགས་ཀྱིས་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོ་འཛུགས་རྒྱུའི་གཙོ་རྐང་མཐའ་འཁྱོངས་བྱས་ཏེ་ལྟད་མོ་ཆེ་བའི་མི་རིགས་ཀྱི་སྲོལ་རྒྱུན་ལུས་རྩལ་འགྲན་བསྡུར་བརྒྱུད་དུས་རབས་གསར་པ་དང་རྒྱང་ལམ་གསར་པར་བོད་ཀྱི་མི་རིགས་ཁག་གི་མི་དམངས་ཚོས་ཐུན་མོང་ཐོག་དཔའ་ངར་ཆེར་སྐྱེད་ཀྱིས་འབད་འཐབ་བྱེད་པའི་བསམ་པའི་ཉམས་འགྱུར་གང་ལེགས་མངོན་པར་བྱས་པས། བོད་ཀྱི་ཕུལ་བྱུང་སྲོལ་རྒྱུན་རིག་གནས་སྲུང་སྐྱོང་དང་རྒྱུན་འཛིན་ལ་སྐུལ་མ་ཐེབས་པ་མ་ཟད། ཚང་མར་མི་རིགས་མཐུན་སྒྲིལ་ལས་བྱུང་བའི་སྟོབས་ཤུགས་ཆེན་པོ་ཚོར་དུ་བཅུག་ཡོད།

ཤིང་ལྷམ་འདྲུད་རྩལ་འགྲན་བསྡུར། བོད་ཀྱི་འགྲན་རར་ཐོག་མར་ཞུགས་པ།

“གཅིག་གཉིས། གཅིག་གཉིས། གཅིག་གཉིས”

བོད་རང་སྐྱོང་ལྗོངས་ཀྱི་མི་རིགས་སྲོལ་རྒྱུན་ལུས་རྩལ་འགྲན་ཚོགས་སྐབས་དྲུག་པའི་ཐོག་ལུས་རྩལ་རྣམ་གྲངས་གསར་པ་ཞིག་ཚང་མའི་མིག་ལམ་དུ་བཤམས་པ་སྟེ། དེ་ནི་ཤིང་ལྷམ་འདྲུད་རྩལ་ཡིན་པ་དང་ལུས་རྩལ་པ་3གྱིས་ཤིང་ལྷམ་གཅིག་གི་ནང་རྐང་པ་བརྒྱུས་ནས་འགྲན་བསྡུར་བྱེད་པ་དང་། བར་ཐག་གཅིག་མཚུངས་ནང་དུས་ཚོད་ག་ཚོད་ཀྱིས་ཐུང་ན་ཨང་རིམ་དེ་ཙམ་གྱིས་མདུན་དུ་སླེབས་ཀྱི་ཡོད།

ཤིང་ལྷམ་འདྲུད་རྩལ་ནི་མང་ཚོགས་རང་བཞིན་དང་། རོལ་རྩེད་རང་བཞིན། རྩལ་འགྲན་རང་བཞིན་བཅས་གཞི་གཅིག་ཏུ་འདུས་པའི་མི་རིགས་ཀྱི་སྲོལ་རྒྱུན་ལུས་རྩལ་བྱེད་སྒོ་ཞིག་ཡིན་པ་དང་། རྒྱུན་དུ་སྐྱེས་པ་གསུམ་གྱི་ཤིང་ལྷམ་དང་། བུད་མེད་གསུམ་གྱི་ཤིང་ལྷམ། མི་གསུམ་གྱི་ཤིང་ལྷམ་མཉམ་བསྲེས་རྒྱུག་མཐུད་བཅས་སུ་དབྱེ་གི་ཡོད། དེའི་ཁྱད་ཆོས་གཙོ་བོ་ནི། འགྲན་བསྡུར་བྱེད་སྐབས་མི་ཚང་མས་སེམས་ཤུགས་གཅིག་ཏུ་སྒྲིལ་བ་དང་གོམ་སྟབས་གཅིག་གྱུར་བྱས་ཚེ་གཞི་ནས་འགྲོ་སྐྱོད་སྟབས་བསྟུན་དང་མཐུན་སྦྱོར་ཆ་སྒྲིག་ཡོང་གི་ཡོད། དེར་ལུས་རྩལ་རང་བཞིན་དང་ལྟད་མོའི་རང་བཞིན་ཆེན་པོ་ལྡན་ཡོད།

2007ལོར། རྒྱལ་ཡོངས་ཀྱི་གྲངས་ཉུང་མི་རིགས་སྲོལ་རྒྱུན་ལུས་རྩལ་འགྲན་ཚོགས་སྐབས་བརྒྱད་པའི་ཐོག་ཤིང་ལྷམ་འདྲུད་རྩལ་འགྲན་བསྡུར་དེ་ཉིད་རྣམ་གྲངས་ནང་ཐོག་མར་བཅུག་པ་རེད། 2026ལོར། བོད་རང་སྐྱོང་ལྗོངས་ཀྱི་ལུས་རྩལ་འགྲན་ཚོགས་སྐབས་བཅུ་བཞི་པ་དང་མི་རིགས་ཀྱི་སྲོལ་རྒྱུན་ལུས་རྩལ་འགྲན་ཚོགས་སྐབས་དྲུག་པའི་ཐོག་ཤིང་ལྷམ་འདྲུད་རྩལ་རྣམ་གྲངས་བོད་ཀྱི་འགྲན་རར་ཐོག་མར་ཞུགས་པ་རེད།

མུ་ཏིག་སྤོ་ལོ། དེ་ནི་མངོན་མིན་རིག་གནས་ཤུལ་བཞག་ཡིན་ལ“ཉ་འཛིན་རོལ་རྩེད”ཀྱང་ཡིན།

མུ་ཏིག་སྤོ་ལོའི་འགྲན་རར་རུ་ཁག་རེར་རུ་མི་7རེ་དགོས་པ་སྟེ། ཆུ་ཁུལ་དུ་རུ་མི་4ཡིས་སྤོ་ལོ་སྤྲོད་རེས་དང་། རྡབ་འཁྲིད། བླུགས་པ། འགྲིལ་བ་བཅས་ཀྱི་ཐོག་ནས་འགྲན་བསྡུར་བྱེད་པ་དང་བཀག་སྡོམ་ཁུལ་དུ་མི་2ཀྱིས་ལག་ཏུ་སྤོ་ལོ་རྒྱག་སྤྱད་ཁྱེར་ནས་བཀག་པ། སྐར་ཐོབ་ཁུལ་དུ་མི་1གིས་དྲ་བཤུ་ཁྱེར་ནས་སྐར་མ་རག་ཐབས་བྱེད་པ་རེད།

ལྷ་ས་གྲོང་ཁྱེར་འཐུས་མི་རུ་ཁག་གི་ལུས་རྩལ་པ་རིན་ཆེན་ཟླ་བས། མུ་ཏིག་སྤོ་ལོའི་ལུས་རྩལ་པ་མང་ཆེ་བ་ལན་ཆིའུ་སྤོ་ལོ་རྒྱག་མཁན་ཡིན་མོད། འོན་ཀྱང་གཟུགས་སྟོབས་ཆུང་བ་དང་མྱུར་ཚད་མགྱོགས་པའི་ལུས་རྩལ་པར་ལེགས་ཆ་དེ་བས་ལྡན་ཡོད་ཅེས་བཤད།

1986ལོར་རྒྱལ་ཡོངས་ཀྱི་གྲངས་ཉུང་མི་རིགས་སྲོལ་རྒྱུན་ལུས་རྩལ་འགྲན་ཚོགས་སྐབས་གསུམ་པའི་ཐོག་མུ་ཏིག་སྤོ་ལོ་འགྲན་བསྡུར་ནང་ཐོག་མར་བཅུག་པ་དང་1991ལོར་རྒྱལ་ཡོངས་ཀྱི་གྲངས་ཉུང་མི་རིགས་སྲོལ་རྒྱུན་ལུས་རྩལ་འགྲན་ཚོགས་སྐབས་བཞི་པའི་ཐོག་མུ་ཏིག་སྤོ་ལོ་དངོས་གཞིའི་འགྲན་བསྡུར་རྣམ་གྲངས་ནང་བཅུག་པ་རེད།

མུ་ཏིག་སྤོ་ལོ་ནི་རྩལ་འགྲན་ཙམ་གྱིས་མ་ཚད་མན་ཇུ་རིགས་ཀྱི་ཉ་འཛིན་རིག་གནས་ཀྱི་འགྱུར་རྡོ་གསོན་པོ་ཞིག་ཡིན་པས་ཐོན་སྐྱེད་ཀྱི་བློ་གྲོས་དང་མཉམ་ལས་ཀྱི་སྙིང་སྟོབས་ལྡན་ཡོད། 2008ལོར་རྒྱལ་ཁབ་རིམ་པའི་མངོན་མིན་རིག་གནས་ཤུལ་བཞག་གི་མིང་གཞུང་ཁག་གཉིས་པའི་ནང་བཅུག་ནས་མི་རིགས་ཁག་གིས་མཉམ་སྤྱོད་མཉམ་རོལ་བྱེད་པའི་ལུས་རྩལ་གྱི་སྦྲེལ་ཐག་ཏུ་གྱུར་ཡོད།

ཤེས་རྟོགས་བྱུང་བར་གཞིགས་ན། མིག་སྔར་ལུས་རྩལ་རྣམ་གྲངས་དེ་གཙོ་བོ་ཅི་ལིན་དང་། ཧོ་པེ། པེ་ཅིང་། ཧའེ་ནན། ཡུན་ནན་སོགས་ཞིང་ཆེན(གྲོང་ཁྱེར)དུ་སྤེལ་མང་བ་དང་མཐོ་སློབ་དང་སློབ་གྲྭ་འབྲིང་ཆུང་ཁག་གཅིག་གིས་ལུས་རྩལ་སློབ་ཚན་ནང་བཅུག་ཡོད།

2022ལོར། བོད་རང་སྐྱོང་ལྗོངས་ཀྱི་ལུས་རྩལ་འགྲན་ཚོགས་སྐབས་བཅུ་གསུམ་པ་དང་མི་རིགས་ཀྱི་སྲོལ་རྒྱུན་ལུས་རྩལ་འགྲན་ཚོགས་སྐབས་ལྔ་པའི་ཐོག་མུ་ཏིག་སྤོ་ལོའི་རྣམ་གྲངས་བོད་དུ་ཐོག་མར་འགྲན་བསྡུར་ནང་བཅུག་པ་རེད། སྐབས་འདིའི་ལུས་རྩལ་འགྲན་ཚོགས་ནང་རྣམ་གྲངས་དེ་སླར་ཡང་འགྲན་བསྡུར་གྱི་རྣམ་གྲངས་ནང་བཅུག་ཡོད།

བྱང་རྒན་ཐག་ཤུད། རྣམ་གྲངས་དེས་ལྟད་མོ་བར་དངངས་འཚབ་ཆེན་པོ་སྐྱེ་རུ་བཅུག་པ།

མཐོ་ཚད་སྨི་6ཙམ་དུ་འཁྲབ་སྟོན་པ་གཙོ་བོས་སྐོར་བ་རྒྱག་པ་དང་། མགོ་རྟིང་སློག་པ། མགོ་བཙུགས་ནས་ལངས་པ་སོགས་དཀའ་ཚད་ཆེ་བའི་སྟངས་སྟབས་ངོམ་དགོས་པ་དང་སྲུང་སྐྱོབ་ཐབས་ཤེས་གང་ཡང་མ་སྤྱད་པའི་གནས་ཚུལ་འོག་བདེ་བླག་ངང་ས་ཐོག་ཏུ་བབས་ཀྱི་ཡོད།

མི་རིགས་ཀྱི་སྲོལ་རྒྱུན་ལུས་རྩལ་འགྲན་ཚོགས་སྐབས་དྲུག་པའི་འཁྲབ་སྟོན་རྣམ་གྲངས་ཀྱི་འགྲན་བསྡུར་ཁྲོད་ནས་ལྟད་མོ་བ་ཚོས་སེམས་ཁྲལ་ཆེ་ཤོས་བྱེད་ས་ནི་བྱང་རྒན་ཐག་ཤུད་རེད།

དེ་ནི་འཁྲབ་མཁན་གཙོ་བོ་དང་། འཁྲབ་མཁན་ཕལ་པ། དེ་བཞིན་ལུས་སྟོབས་ཆེ་བའི་ཐག་པ་འཐེན་མཁན་སྐྱེས་པ་བཅུ་གྲངས་བཅས་ལས་གྲུབ་པ་དང་། འཁྲབ་མཁན་གཙོ་བོས་ཀ་རྒྱུག་ཐོག་འཛེགས་ནས་དཀའ་ཚད་ཆེ་བའི་རྩལ་རྩེད་སྣ་ཚོགས་ངོམ་དགོས་པ་དང་། འཁྲབ་མཁན་ཕལ་པ་ནི་ཀ་རྒྱུག་འོག་ཏུ་འཁྲབ་མཁན་གཙོ་བོ་དང་ཁ་སྤྲོད་དུ་ལངས་ནས་བཞད་གད་སློང་མཁན“ཨ་ཁུ་སྟོན་པ”དེ་རེད།

བྱང་རྒན་ཐག་ཤུད་ནི་བོད་ཀྱི་དམངས་ཁྲོད་སྲོལ་རྒྱུན་གྱི་དཀའ་ཚེགས་ཆེ་བའི་རྩལ་རྩེད་འཁྲབ་སྟོན་ཞིག་རེད། ད་ཆ་རང་སྐྱོང་ལྗོངས་རིམ་པའི་མངོན་མིན་རིག་གནས་ཤུལ་བཞག་ཏུ་གྱུར་ཡོད་ལ། མང་ཚོགས་ཀྱིས་ལོ་ལེགས་བྱུང་བར་རྟེན་འབྲེལ་ཞུ་བ་དང་ནང་སེམས་ཀྱི་དགའ་སྤྲོ་མཚོན་པའི་བྱེད་ཐབས་གལ་ཆེན་ཞིག་ཀྱང་རེད། 2019ལོ་དང་2024ལོར་རྣམ་གྲངས་དེ་བོད་ཀྱི་ཚབ་བྱས་ནས་རྒྱལ་ཡོངས་ཀྱི་གྲངས་ཉུང་མི་རིགས་སྲོལ་རྒྱུན་ལུས་རྩལ་འགྲན་ཚོགས་སྐབས་བཅུ་གཅིག་པ་དང་སྐབས་བཅུ་གཉིས་པའི་འཁྲབ་སྟོན་རྣམ་གྲངས་ནང་ཞུགས་པ་དང་འབྲེལ་བྱ་དགའ་རིམ་པ་དང་པོ་དང་གཉིས་པའང་ཐོབ་པ་རེད།