སྲོལ་རྒྱུན་གྱི་ལུས་རྩལ་དང་རྩེད་མོ་ལས་འཕྲོས་པའི་བུ་བཅོལ་ཁང་གི་སློབ་ཁྲིད་ལག་ལེན་སྐོར་གྱི་བསམ་གཞིག་ཐོར་བུ།
ལུས་རྩལ་དང་རྩེད་མོ་ནི་མི་རྣམས་ཀྱི་སྤྲོ་བ་འཕེལ་ཐབས་ཤིག་ཡིན་ལ། དཀའ་དུས་ངལ་དུབ་སེལ་བྱེད་དང་། སྡུག་དུས་གནོན་ཤུགས་འཇོམས་བྱེད་ཙམ་མ་ཟད། མི་རྣམས་ཕན་ཚུན་འབྲེལ་འདྲིས་བྱེད་པའི་གོ་སྐབས་ཤིག་ཀྱང་ཡིན། སྤྱི་ཚོགས་ཐོག་མི་དང་མིའི་དབར་མཐུན་སྒྲིལ་དང་མཉམ་ལས་ཀྱི་རྩ་བ་འཛུགས་པའི་བྱ་བ་ཞིག་ཡིན་པས། སློབ་གྲྭ་ཆུང་ཆུང་ཞིག་གམ་ཡང་ན་སྤྱི་ཚོགས་ཆེན་པོ་གང་ཡིན་རུང་། ལུས་རྩལ་དང་རྩེད་མོ་ཡིས་མི་སེམས་གཅིག་ཏུ་སྒྲིལ་ཐུབ། དེར་བརྟེན། སློབ་གྲྭའི་ཁོར་ཡུག་ཁྲོད་དུ་ལུས་རྩལ་དང་རྩེད་མོའི་རྣམ་གྲངས་གང་ལ་གང་འཚམས་བཀོད་སྒྲིག་བྱེད་དགོས་པ་ནི་ཤེས་བྱ་སློབ་པའི་ཆོས་ཉིད་དང་མཐུན་པ་ཡིན།
དེང་དུས་བུ་བཅོལ་ཁང་གི་སློབ་ཁྲིད་སློབ་གསོ་དང་ཁྱིམ་ཚང་སློབ་གསོའི་གནས་བབ་ལ་བལྟས་ཚེ། དེང་གི་བྱིས་པ་རྣམས་ནི་ཆུང་དུས་ནས་ཁ་པར་དང་གློག་རྡུལ་རྩེད་ཆས་ལ་དགའ་པོ་བྱེད་པ་དང་། བྱིས་དུས་ཀྱི་དུས་ཚོད་མང་པོ་གློག་རྡུལ་ཐོན་རྫས་ལ་བརྟེན་ནས་གཟུགས་མེད་བར་སྟོང་ཁྲོད་དུ་ཟད་འགྲོ་བ་ལས། འཚོ་བ་དངོས་སུ་ལུས་རྩལ་དང་རྩེད་མོ་རྩེ་བའི་གོ་སྐབས་ནི་ཅུང་ཟད་ཉུང་ངུར་གྱུར་ཡོད། དེར་བརྟེན་བུ་བཅོལ་ཁང་གི་སློབ་ཁྲིད་ཁྲོད་དུ་ལུས་རྩལ་དང་རྩེད་མོའི་རྣམ་གྲངས་མང་ཙམ་བཀོད་སྒྲིག་དང་ལག་ལེན་བསྟར་ན་བྱིས་པ་རྣམས་བདེ་ཐང་ངང་འཚར་ལོངས་ཡོང་བར་ཕན་པ་ཆེན་པོ་ལྡན་པ་སྨོས་མི་དགོས། ཡང་ཕྱོགས་གཞན་ཞིག་ནས་བཤད་ན། ལུས་རྩལ་དང་རྩེད་མོ་ལའང་རིགས་ཤིན་ཏུ་མང་བས། སློབ་ཁྲིད་ཁྲོད་དུ་རྩེད་མོའི་རིགས་གསར་པ་གསར་རྐྱང་མང་དྲགས་ན་ཕ་མ་ཉེ་དུ་ཀུན་གྱིས་ཧ་གོ་དོན་རྟོགས་མེད་པས་ཁྱིམ་ཚང་སློབ་གསོ་དང་ཁ་ཐག་རིང་དུ་འགྲོ་བའི་ཉེན་ཁ་ཡོད་པ་དང་། རྙིང་པ་རྙིང་ཁོག་མང་དྲགས་ན་དུས་རབས་གསར་པའི་བྱིས་པའི་ཁམས་དང་མོས་པར་མཐུན་དཀའ་བར་བརྟེན། བོད་ཀྱི་གཞི་རིམ་བུ་བཅོལ་ཁང་དུ་བོད་ཀྱི་སྲོལ་རྒྱུན་ལུས་རྩལ་དང་རྩེད་མོ་འགའ་ཞིག་ཚོད་ལྟའི་སློབ་ཁྲིད་བྱས་ན་ཕན་ནུས་ཆེན་པོ་ལྡན་པའི་བསམ་ཚུལ་ཐུང་ངུ་འགའ་ཞིག་ཞུ་བར་འདོད།
དང་པོ། བོད་ཀྱི་སྲོལ་རྒྱུན་ལུས་རྩལ་དང་རྩེད་མོ་གང་དང་གང་ཞིག་བུ་བཅོལ་ཁང་གི་སློབ་ཁྲིད་དུ་བཞག་ན་འཚམ་མམ་ཞེ་ན། དཔེར་ན། རལ་པ་འཁྲབ་རྒྱུ་ལ་མཚོན་ན་བཤད་པ་དང་འཁྲབ་པ་ཙམ་མ་ཟད། དབུགས་ཀྱི་འབྱིན་རྔུབ་དང་ལུས་ཀྱི་སྟངས་སྟབས་སོགས་གང་ས་ཅི་ཐད་ནས་བླང་བྱ་མང་པོ་ཡོད་ཀྱང་། བྱིས་པའི་ལོ་ཚོད་དང་འཚམས་པའི་འཁྲབ་སྲོལ་ཁག་གཅིག་སྤྱད་ཚེ་བྱིས་པའི་གཟུགས་གཞི་བདེ་ཐང་ལ་ཕན་ཐོགས་ཡོང་ངེས་ཡིན། དེ་བཞིན་ཆབ་རྡོ་རྩེད་རྒྱུ་ལ་མཚོན་ན། ཕྱོགས་གཅིག་ནས་བོད་རིགས་དམངས་ཁྲོད་དུ་དར་ཁྱབ་ཤིན་ཏུ་ཆེ་བའི་རྩེད་མོའི་རིགས་ཤིག་ཡིན་ལ། ཕྱོགས་གཞན་ཞིག་ནས་བཤད་ན། ཆབ་རྡོ་ནི་རྡོ་ཧྲུག་ཆུང་ངུ་འགའ་ཞིག་ལ་ལག་མཛུབ་ཀྱིས་རྩེད་སྲོལ་མི་འདྲ་བ་ཁ་ཤས་ཡོད་པས། རྩེད་མོ་འདི་ནི་བྱིས་པར་མཚོན་ན་དཀའ་ལས་ཆེན་པོ་མེད་ཅིང་དུས་ཚོད་ཐུང་ངུའི་ནང་དུ་དང་ལེན་བྱེད་ཐུབ་པ་དང་། གཙོ་བོ་མིག་དང་ལག་པའི་འགུལ་སྐྱོད་ལ་ཕན་ཆེན་པོ་ཐོགས་ཐུབ་པ་ཞིག་ཡིན། དེ་མིན་རྒྱལ་པོ་མིག་མང་ལྟ་བུའི་རྩེད་མོ་ཡང་བྱིས་པའི་ཁམས་དང་མོས་པར་འོས་ཤིང་འཚམས་པ་དང་། མིག་མང་གི་རི་མོའི་ལམ་ཐིག་ལྟར་རྒྱལ་པོ་དང་རྡོ་ཧྲུག་བར་གྱི་འགྲན་རྩོད་བྱེད་པ་དེའང་བྱིས་པའི་བློ་རིག་ཇེ་གསལ་དང་རིག་པ་རྩེ་གཅིག་ཏུ་སྒྲིམ་པའི་ཕན་ནུས་ལྡན་ཡོད། དེ་མིན་ལུས་རྩལ་དང་རྩེད་རིགས་ཤིན་ཏུ་མང་ཡང་བྱིས་པ་དང་འཚམས་ཤིང་སློབ་ཁྲིད་དུ་ཚོད་ལྟ་བྱེད་རུང་བའི་དཔེར་མཚོན་འདི་ཙམ་ལགས་ཀྱང་མུ་མཐུད་སྔོག་འདོན་དང་ཞིབ་འཇུག་བགྱིས་ཚེ་འདི་ལས་མང་བའི་ངེས་པ་མཆིས།
གཉིས་པ། སྲོལ་རྒྱུན་གྱི་ལུས་རྩལ་དང་རྩེད་མོ་འགའ་ཞིག་བུ་བཅོལ་ཁང་གི་སློབ་ཁྲིད་ཁྲོད་ལག་ལེན་བྱས་ན་དོན་སྙིང་ཅི་འདྲ་ཡོད་དམ་ཞེ་ན། གཅིག་ནས་བྱིས་པའི་ཁམས་དང་མོས་པར་མཐུན་ཞིང་། ནང་དོན་ལ་ཉ་ཉོག་མཉམ་བསྲེས་མེད་པའི་སྲོལ་རྒྱུན་རྩེད་རིགས་ནི་ཀྲུང་ཧྭ་མི་རིགས་ཕུལ་བྱུང་རིག་གནས་ཀྱི་ཆ་ཤས་ཤིག་ཡིན་པ་དང་། རིག་གནས་འདིའི་རིགས་ཆུང་ཆུང་བྱིས་པར་བསླབ་ཐུབ་ཚེ་ཀྲུང་ཧྭ་མི་རིགས་ཀྱི་ཕུལ་བྱུང་རིག་གནས་རྒྱུན་འཛིན་དང་དར་སྤེལ་གཏོང་སྟངས་ཤིག་ཡིན། གཉིས་ནི་སྲོལ་རྒྱུན་གྱི་ལུས་རྩལ་དང་རྩེད་མོ་ནི་སློབ་གྲྭའི་དགེ་རྒན་དང་ཁྱིམ་གྱི་ཕ་མ་རྒན་རྒོན་ཐུན་མོང་ནས་བསླབ་ཐུབ་པ་ཞིག་ཡིན་ལ། བུ་བཅོལ་ཁང་དང་ཁྱིམ་ཚང་བར་གྱི་འབྲེལ་བ་རྒྱུན་མཐུད་དང་མཉམ་ལས་ཡར་རྒྱས་ཡོང་བར་ཕན་པ་ཆེན་པོ་ལྡན། གསུམ་ནས་སྲོལ་རྒྱུན་གྱི་ལུས་རྩལ་དང་རྩེད་མོ་མང་པོ་ཞིག་ས་གནས་ས་ཐོག་ཏུ་བྱིས་པ་གཉིས་ཡན་ཆོད་མཉམ་དུ་འདུས་ནས་རྩེད་དགོས་པས་བྱིས་པ་ཕན་ཚུན་བློ་སྒོ་འབྱེད་པ་དང་། མཉམ་ལས་རོགས་རམ་གྱི་བསམ་བློ་སྐྱེད་སྲིང་བྱེད་པའི་ཕན་ནུས་ཡོད་པ་ཡིན། བཞི་ནས་སྲོལ་རྒྱུན་གྱི་ལུས་རྩལ་དང་རྩེད་མོ་ཕལ་མོ་ཆེ་ནི་ས་དང་འདམ་བག རྩྭ་དང་རྩི་ཤིང་། ཆུ་དང་ཆར་པ། རྡོ་དང་ཕ་བོང་སོགས་ལ་ཐུག་རེག་མྱོང་གསུམ་གྱི་སྒོ་ནས་རྩེད་དགོས་པས། ཁ་པར་དང་གློག་རྡུལ་རྩེད་ཆས་སོགས་གཟུགས་མེད་བར་སྟོང་དང་རིང་དུ་གྱེས་ཏེ་རང་བྱུང་ཁམས་དང་ཉེ་བར་བཅར་ཐུབ་པའི་ཕན་ཡོན་ལྡན།
གསུམ་པ། སྲོལ་རྒྱུན་གྱི་ལུས་རྩལ་དང་རྩེད་མོའི་རིགས་བུ་བཅོལ་ཁང་གི་སློབ་ཁྲིད་དུ་འཆར་འགོད་དང་ལག་ལེན་བྱེད་པའི་རྩ་དོན་གང་འདྲ་དགོས་སམ་ཞེ་ན། གཅིག་ནས་བུ་བཅོལ་ཁང་གི་སློབ་ཁྲིད་ནི་འབྲེལ་ཡོད་ཀྱི་སློབ་གསོའི་ལམ་སྟོན་ཡིག་ཆ་དང་འབྲེལ་ཡོད་ཁྲིམས་སྲོལ་ཡིག་ཆར་གཞིར་བཟུང་ནས་འཆར་འགོད་དང་ལག་ལེན་བྱེད་པ་ཡིན་པས། སྲོལ་རྒྱུན་གྱི་ལུས་རྩལ་དང་རྩེད་མོ་རྣམས་བུ་བཅོལ་ཁང་གི་སློབ་ཁྲིད་ཁྲོད་དུ་ནང་འདྲེན་བྱེད་དུས་ཀྱང་འབྲེལ་ཡོད་གཏན་འབེབས་ལ་བསྟུན་དགོས་པ་མ་ཟད། ཚན་རིག་གི་སློབ་གསོའི་བསམ་བློ་དང་ངེས་པར་དུ་མཐུན་དགོས་པ་ཡིན། གཉིས་ནས་སྲོལ་རྒྱུན་གྱི་ལུས་རྩལ་དང་རྩེད་མོ་ནི་རྣམ་པ་སྣ་ཚོགས་པ་ཡོད་པ་ལས་བྱིས་པའི་ཁམས་དང་མོས་པ། དེ་བཞིན་ལོ་ཚོད་བཅས་དང་མཐུན་པའི་རྩེད་རིགས་ལ་ཞིབ་འཇུག་བྱེད་དགོས་པ་དང་། བྱིས་པ་སྤྱིའི་གནས་ཚུལ་ལ་བརྟག་དགོས་པ་མ་ཟད། བྱིས་པ་རེ་རེའི་དགའ་ཕྱོགས་ལའང་རྒྱུས་ལོན་ཟབ་མོ་བྱས་ཏེ་སྲོལ་རྒྱུན་རྩེད་རིགས་འདི་བཞིན་བུ་བཅོལ་ཁང་གི་བྱིས་པ་མི་རེ་ངོ་རེར་འཚམ་པར་བྱེད་དགོས།
མདོར་ན། བོད་ཀྱི་སྲོལ་རྒྱུན་ལུས་རྩལ་དང་རྩེད་རིགས་མང་པོ་ཞིག་ནི་རིག་པ་རྩེ་གཅིག་ཏུ་སྒྲིམ་པ་དང་། ངལ་བ་ཁྱད་དུ་སེལ་བ། ཚོད་ལྟ་བྱེད་པའི་དཔའ་དང་སྤོབས་པ་སྐྱེ་བ་སོགས་ཀྱི་ཕན་ནུས་ཡོད་པར་བརྟེན། གཞི་རིམ་བུ་བཅོལ་ཁང་གི་སློབ་ཁྲིད་ཁྲོད་དུ་གང་ལ་གང་འཚམས་འཆར་འགོད་དང་ལག་ལེན་བྱས་ཚེ་བྱིས་པ་རྣམས་ལ་བློ་སྐྱེད་ཆེན་པོ་ཡོང་བར་མ་ཟད། སློབ་སྔོན་སློབ་གསོར་སློབ་ཁྲིད་གསར་གཏོད་ཀྱི་གྲུབ་ཆའང་ངང་ངམ་ཤུགས་ཀྱིས་མངོན་ཐུབ་པར་སྙམ། དེ་བཞིན་སློབ་གྲྭའི་དགེ་རྒན་དང་ཁྱིམ་གྱི་ཕ་མ་ཐུན་མོང་ནས་སྲོལ་རྒྱུན་གྱི་ལུས་རྩལ་དང་རྩེད་མོ་ལ་དང་དོད་བྱས་ཚེ། སློབ་མ་དང་དགེ་རྒན། ཁྱིམ་བདག་དབར་གྱི་འབྲེལ་འདྲིས་ཟབ་ཏུ་གཏོང་བ་དང་ཐུན་མོང་ཐོག་ཡར་རྒྱས་འགྲོ་བའི་ཐབས་ལམ་བཟང་པོ་ཞིག་ཡིན་པར་སེམས།
(བོད་ལྗོངས་ཆབ་མདོ་གྲོང་ཁྱེར་འཇོ་མདའ་རྫོང་བུ་བཅོལ་ཁང་གཉིས་པའི་དགེ་རྒན་ཤེས་རབ་སྒྲོལ་མ)
འབྲེལ་ཡོད་གསར་འགྱུར།