2026ལོའི་ཆབ་མདོ་གྲོང་ཁྱེར་བྲག་གཡབ་རྫོང་གི“དམར་མདངས་ཆབ་མདོ། དར་རྒྱས་ཡར་བརྩོན”ཞེས་པའི་མང་ཚོགས་རང་བཞིན་གྱི་འགྲན་བསྡུར་སྐབས་གཉིས་པའི་དེང་རབས་ལག་རྩལ་གྱི་རྫོང་རིམ་པའི་བསྐྱར་འགྲན་བྱ་ཡུལ་དུ་ལོ་44ལ་སླེབས་པའི་འོན་ལྐུགས་འཇམ་དབྱངས་རྡོ་རྗེས་བཀོལ་སྤྱོད་སྟེགས་བུའི་མདུན་དུ་སྒུར་སྒུར་བྱས་ནས་ཁ་ཙམ་ལས་མཐོང་རྒྱུ་མེད་པའི་གདོང་ཁེབས་ཤིག་གྱོན་ནས་བསྡད་ཡོདཅིང་། ཚ་ལ་རྒྱག་པའི་ལག་རྩལ་བྱང་ཆུབ་པས་གཞན་གྱིས་བལྟས་ཚེ་ཁོང་དང་བདམས་ཐོན་པ་གཞན་གྱི་དབར་ཁྱད་པར་གང་ཡང་མཐོང་མི་ཐུབ།

གྲུབ་འབྲས་ཁྱབ་བསྒྲགས་བྱེད་སྐབས་ཁོང་ལ་རྫོང་རིམ་པའི་བསྐྱར་འགྲན་གྱི་ཨང་གཉིས་པ་ཐོབ་ཡོད་པ་རེད།

ཁོང་གིས་མགོ་བོ་བཏེགས་པ་དང་མཐེ་བོང་ཡང་ཡང་བསྒྲེངས་ནས་སྟབས་བདེ་ཤོས་ཀྱི་ལག་བརྡ་དེས་མི་ཚང་མར་སྒྲ་མེད་འཇིག་རྟེན་དུ་གནས་པའི་དབང་དུ་བཏང་ན་ཡང་། ཉིན་རེ་བཞིན་བརྟན་སྲུང་དང་འབད་བརྩོན་བྱས་ནས་རང་ཉིད་ལ་དབང་བའི་འབད་འཐབ་ཀྱི་ལམ་བུ་བཏོད་ཐུབ་པ་ར་སྤྲོད་བྱས་ཡོད།

ད་ལོ་ལོ་44ལ་སླེབས་པའི་འཇམ་དབྱངས་རྡོ་རྗེ་བྲག་གཡབ་རྫོང་མཁར་སྒང་གྲོང་ཚོའི་གྲོང་གསེབ་ཀྱི་ཁྱིམ་ཚང་ཞིག་ཏུ་སྐྱེས་པ་དང་སྐྱེས་དུས་ནས་འོན་ལྐུགས་ཡིན་པ་རེད། ཆུང་དུས་ཁྱིམ་གྱི་དཔལ་འབྱོར་ཞན་པ་དང་ཕ་མས་ཞིང་ལས་ལ་བརྟེན་ནས་འཚོ་བ་སྐྱེལ་གྱི་ཡོད་པས། ལོ་ན་ཆུང་བའི་ཁོང་སྔ་ས་ནས་ཧ་གཉིད་གོ་པོ་ཡོད་ཅིང་གཅེན་གཅུང་མིང་སྲིང་ཚོ་དང་མཉམ་དུ་དབུལ་ཕོངས་ཀྱི་ཁྱིམ་ཚང་སྐྱོང་གི་ཡོད། ལོ་18ལ་སླེབས་པ་ནས་བཟུང་ཁོང་གིས་གཅེན་པོ་བློ་དགའ་དང་མཉམ་དུ་ཚ་ལ་རྒྱག་སྟངས་ལོ་8སྦྱངས།

སྐད་ཆའི་ཐོག་ནས་སྤེལ་རེས་བྱེད་ཐབས་བྲལ་བས་ལག་རྩལ་སྦྱོང་བའི་གོམ་པ་རེ་རེ་མིག་གཉིས་ལ་བརྟེན་དགོས། ཚ་ལ་རྒྱག་པའི་ལས་རིམ་ཚང་མ་དགེ་ཕྲུག་གཞན་གྱིས་དགེ་རྒན་གྱི་སྐད་ཆ་ཐེངས་གཅིག་ཉན་རྗེས་ཚོད་ལྟ་བྱེད་ཐུབ་ཀྱི་ཡོད་མོད། འོན་ཀྱང་ཁོང་གིས་འཁྲིས་སུ་ལངས་ནས་ལྟ་བ་དང་དེ་རྗེས་ཟུར་གྱི་རྒྱུ་ཆའི་ཐོག་ཡང་ཡང་འཚོལ་ཞིབ་བྱེད་དགོས་ཀྱི་ཡོད། ཚ་ལ་ཐེངས་དང་པོ་རྒྱག་སྐབས་ཁོང་གིས་གདོང་ཁེབས་གྱོན་དགོས་པ་མི་ཤེས་པས་མིག་གཉིས་ཀྱིས་ཐད་ཀར་བལྟས་པས། འོད་དྲག་པོ་མིག་སྐྱིར་ཕོག་ནས་མིག་ཆུ་རྫོགས་རྒྱུ་མེད་པ་ཤོར། གཅེན་པོས་ཁོང་ཚུར་འཐེན་རུང་ཁོང་གིས་མགོ་བོ་གཡུག་ཙམ་བྱས་ནས་ངལ་གསོ་ཕྲན་བུ་བརྒྱབ་རྗེས་སླར་ཡང་ཚ་ལ་རྒྱག་རྩིས་བྱས།

ལོ་8སོང་རྗེས། ཚ་ལ་སྲུབས་སྦྱོར་དང་ཚ་ལ་རྒྱག་སྟངས་ཀྱི་ལག་རྩལ་བྱང་ཆུབ་པས་ཤང་ནང་གི་རྒན་ལགས་ཁ་ཤས་ཀྱིས་ཀྱང་ཁོང་ལ་བསྔགས་བརྗོད་བྱེད་ཀྱི་ཡོད།

ལག་རྩལ་བྱང་ཆུབ་པ་སྦྱངས་རྗེས་འཇམ་དབྱངས་རྡོ་རྗེས་ལོ་འཁོར་མོར་ཉེ་འཁོར་གྱི་ཤང་དང་གྲོང་རྡལ་དུ་གློག་གི་ཚ་ལ་རྒྱག་པའི་ལས་ཀ་ཙག་ཙིག་བྱེད་པ་དང་། སེམས་རྩ་འཁོལ་པོས་ཁྱིམ་མཚེས་ལ་ཞིང་འཕྲུལ་ཉམས་བཟོ་བྱེད་རོགས་དང་བང་ཁྲི་བརྟན་དུ་གཏོང་རོགས་བྱེད་ཀྱི་ཡོད། ལོ་མང་པོའི་རིང་ལ་ཁོང་གིས་ལག་རྩལ་དེར་བརྟེན་ནས་བག་ཕེབས་ཀྱི་འཚོ་བར་རོལ་བཞིན་ཡོད།

2026ལོར་བྲག་གཡབ་རྫོང་གི་“དམར་མདངས་ཆབ་མདོ། དར་རྒྱས་ཡར་བརྩོན”ཞེས་པའི་མང་ཚོགས་རང་བཞིན་གྱི་འགྲན་བསྡུར་སྐབས་གཉིས་པ་དངོས་སུ་འགོ་ཚུགས་པ་དང་། གྲོང་ཚོ“ཨུ་ལྷན་གཉིས”དང་ཤང་གི་ལས་བྱེད་པའི་སྐུལ་སློང་དང་ལྕག་སྐུལ་འོག་འཇམ་དབྱངས་རྡོ་རྗེས་བློ་ཁོག་ཆེན་པོས་འགྲན་བསྡུར་ནང་ཞུགས་པ་རེད། འགྲན་བསྡུར་མ་བྱས་གོང་། རྫོང་མི་སྤྱི་ཅུས་ཀྱིས་གཅིག་སྡུད་གསོ་སྦྱོང་དང་ཤང་གི་ལས་དོན་པས་བརྒྱུད་རིམ་ཧྲིལ་པོར་ལྟ་སྐྱོང་དང་ངང་རྒྱུད་རིང་པོས་གཞོགས་འདེགས་བྱས་ཡོད་པ་རེད།

མི་ལ་བརྩོན་འགྲུས་ཡོད་གྱུར་ན། མི་འགྲུབ་བྱ་བ་གང་ཡང་མེད། གློག་གི་ཚ་ལའི་རྣམ་གྲངས་ཀྱི་རྫོང་རིམ་པའི་བསྐྱར་འགྲན་ནང་ཨང་གཉིས་པ་ཐོབ་པའི་ཁོང་ལ་སེམས་འགུལ་ཚད་མེད་ཐེབས་པ་དང་བཀའ་དྲིན་ཆེན་པོ་ཚོར་ཞིང་། འགྲན་བསྡུར་མཇུག་འགྲིལ་རྗེས། ཁོང་གིས་མཐེ་བོང་བསྒྲེངས་པ་དེ་ནི་འགྲན་ར་དང་རང་ཉིད་ལ་རོགས་སྐྱོར་བྱེད་མཁན་ལས་དོན་པར་གུས་བཀུར་ཞུ་ལུགས་མཚོན་པ་མ་ཟད། བློས་གཏོང་གཏན་ནས་བྱས་མེད་པའི་རང་ཉིད་ལའང་གུས་བཀུར་ཞུ་ལུགས་མཚོན་གྱི་ཡོད།

བྱ་དགའ་ཐོབ་ནས་ཕྱིར་ལོག་རྗེས། འཇམ་དབྱངས་རྡོ་རྗེའི་ལག་རྩལ་ལ་མི་དེ་བས་མང་བའི་ཁས་ལེན་ཐོབ་ཅིང་། མངགས་ཐོ་ལེན་པའི་ཁྱབ་ཁོངས་དེ་ཡང་གྲོང་ཚོ་དེ་ག་ནས་མཐའ་འཁོར་གྱི་ཤང་དང་གྲོང་རྡལ་མང་པོར་ཁྱབ་སྟེ་འབབ་འཕར་ཐབས་ལམ་རྒྱུན་མཐུད་རྒྱ་ཆེར་ཕྱིན་ཡོད། སྔོན་ཆད་ངོ་ཚ་སྨིན་པའི་ཁོང་སྔར་བས་བློ་བག་ཡངས་པོ་དང་ཡར་རྒྱས་བརྩོན་ལེན་བྱེད་མཁན་དུ་གྱུར། ཁོང་གིས་དངོས་སྒྲུབ་དང་འཕོ་འགྱུར་ལས་འབད་འཐབ་ཀྱི་དོན་སྙིང་མངོན་པར་བྱས་ཡོད།

དབང་པོ་སྐྱོན་ཅན་ཡིན་པའི་ཁོང་གིས་བློ་རྩ་བརྟན་པོས་འབད་བརྩོན་ལྷོད་མེད་བྱས་ཏེ་འཇོན་ཐང་ཧུར་ཐག་སྦྱངས་ནས་འབབ་འཕར་ཏན་ཏིག་ཡོང་བར་བྱས་པའི་གཏམ་རྒྱུད་མཁར་སྒང་གྲོང་ཚོར་ཁྱབ་སྟེ། ཤང་ནང་གི་མི་ཚང་མས་བསྔགས་བརྗོད་བྱེད་པའི་བརྩོན་སྐྱེད་ཀྱི་མིག་དཔེར་གྱུར་ཡོད་ལ། མང་ཚོགས་དཀྱུས་མ་དང་དམིགས་བསལ་ཚོགས་སྤྱི་དེ་བས་མང་བས་ཕུགས་འདུན་དོན་གཉེར་གྱིས་མདུན་སྐྱོད་བྱེད་པའི་རེ་བ་ཡང་མཐོང་ཡོད། དཀའ་སྡུག་གང་འདྲ་ཞིག་འཕྲད་རུང་དཀའ་ངལ་ཁྱད་བསད་དང་འབད་འཐབ་ལྷོད་མེད་ཀྱིས་འཇོན་ཐང་སྦྱངས་ཚེ་མ་འོངས་པར་རེ་བ་དང་འོད་སྣང་གིས་ཁེངས་པ་ཚང་མར་མྱོང་ཚོར་ཟབ་མོ་ཐུབ་ཡོད་པ་རེད།

འགྲན་བསྡུར་མཇུག་འགྲིལ་རྗེས། འཇམ་དབྱངས་རྡོ་རྗེས་གཟི་བརྗིད་མཚན་སྙན་གྱི་ལག་ཁྱེར་སྒམ་ནང་བླུགས། ཁོང་གིས“གཟེངས་བསྟོད་ལག་ཁྱེར་འདི་ནི་གཞན་ལ་ངོམ་སོ་རྒྱག་ཆེད་མ་ཡིན་པར། ས་ཆ་ཞིག་གིས་རང་ཉིད་ལ་གར་སྟེགས་ཤིག་སྤྲད་མྱོང་བས། ཚ་རྒྱག་ལག་རྩལ་བྱང་ཆུབ་པར་སྦྱངས་ནས་གར་སྟེགས་དེར་ངོ་གནོང་མི་དགོས་པ་བྱེད་དགོས་པའི་དྲན་སྐུལ་གཏོང་ཆེད་ཡིན”ཞེས་ལག་བརྡ་བྱས།