རླབས་ཆེན་མེས་རྒྱལ་ལ་ཕུལ་བའི་བསྟོད་ཚིག་མེ་ཏོག་ཆུན་པོ།
དབང་ཕྱོགས་ཙི་ནའི་ཡུལ་ཁམས་ཀྱི། །
པེ་ཅིང་གྲོང་གི་ལྟེ་བ་རུ། །
ཀྲུང་ཧྭའི་སྤྱི་མཐུན་རྒྱལ་ཁབ་ཆེ། །
དབུ་བརྙེས་གཏམ་བཟང་གང་སར་ཁྱབ། །
འཕྲིན་བཟང་དེ་ཡི་སྙན་པའི་གྲགས། །
བསེར་བུའི་ཤུགས་ཀྱིས་སྐུལ་བ་ལྟར། །
འཛམ་གླིང་སྐྱེ་འགྲོའི་ངག་སྒོ་ནས། །
སྨོན་པའི་ཚིག་འབྲུ་རྒྱུན་མར་གྲགས། །
བཅུ་གྲངས་ལོ་ཡི་ཉག་མའི་ནང་། །
ཡངས་པའི་ཞིང་ས་གཤིན་པོ་ལ། །
བསྟུད་མར་འབྲས་བཟང་སྨིན་པས་ན། །
ལོ་ལེགས་གཏམ་བཟང་བརྗོད་མི་ཚར། །
གྲངས་མེད་འཁོར་ལོ་ཆེ་ཆུང་ལས། །
ངོ་མཚར་འཕྲུལ་གྱི་ཐབས་རྩལ་ངོམས། །
འཛམ་གླིང་བཟོ་ལས་ལོ་རྒྱུས་ཐོག །
སྔོན་མེད་ཟིན་ཐོ་ཡང་ཡང་བཀོད། །
མཁའ་ལམ་གཞུང་ལམ་ཆུ་ལམ་སོགས། །
གང་ལ་གང་འདོད་སྐྱེལ་འདྲེན་གྱི། །
ཡོ་བྱད་ཚར་དུ་དངར་བ་ཡིས། །
སྨོན་པའི་ཡུལ་དུ་དེ་མར་འབྱོར། །
སློབ་གསོའི་བྱ་གཞག་མྱུར་འཕེལ་གྱི། །
ཤེས་རིག་འོད་སྣང་གང་སར་འཕྲོས། །
རྒྱལ་དམངས་བྱང་ཚད་ཡར་འཕེལ་གྱིས། །
སྔོན་ཐོན་མི་རིགས་ཤུལ་ལམ་བསྙེགས། །
འཕྲོད་སྦྱོར་འདུ་འགོད་སྣེ་མང་ལས། །
དམངས་ཀྱི་ཚེ་སྲོག་ཡུན་དུ་བསྲིངས། །
བྱི་རིམས་ལ་སོགས་ནད་ཡམས་རིགས། །
སྔར་སོང་འདས་པའི་གཏམ་དུ་ཟད། །
ཚན་རྩལ་འབྲས་བཟང་གཡུར་ཟ་བ། །
སྣ་མང་བྱ་གཞག་འཕེལ་བའི་གསོས། །
ཟླ་བ་སྐར་མའི་གོ་ལ་སོགས། །
རྐང་གཉིས་མི་ཡི་སྤྱོད་ཡུལ་གྱུར། །
ལྔ་ཚན་མང་པོའི་འཆར་འགོད་ལས། །
རྒྱལ་དམངས་དཔལ་གྱི་འབྱོར་བ་རྒྱས། །
མེས་རྒྱལ་གོང་འོག་མངའ་ཐང་གི །
སྟོབས་ཀྱི་ཁོ་ལག་རྫོགས་པར་བྱས། །
ཡུན་ཐུང་བཅུ་ཕྲག་བགྲང་བྱའི་ནང་། །
གནམ་ས་བླ་འོག་འཕོ་འགྱུར་མཚར། །
དམངས་རྣམས་ཕྱུག་པའི་སྐྱིད་གཏམ་དེ། །
ཡངས་པའི་ནོར་འཛིན་ཁྱོན་ལ་གྲགས། །
སྣ་མང་བྱ་གཞག་འཕེལ་ཁ་མྱུར། །
རྒྱལ་སྟོབས་དབུ་རྨོག་ཉིན་བཞིན་བཙན། །
དཔལ་ཡོན་དར་བའི་སྙན་གཏམ་གྱི། །
བ་དན་ནམ་ཡང་གཡོ་བར་སྨོན། །
འབྲེལ་ཡོད་གསར་འགྱུར།