ཕ་ཡུལ་གྱི་སྟོན་ཁ།
འུར་འུར་གྲགས་པའི་དབྱར་གྱི་འབྲུག་སྒྲ་རེ་ཞིག་མགྲིན་པ་འགགས་པ་འདྲ། །
ལང་ལོང་འདུ་བའི་སྤྲིན་པ་ནག་པོ་ལྷོ་དང་བྱང་དུ་ཡིབ་སྟེ་གནས། །
ཤག་ཤག་འབབ་པའི་ཆར་པ་ཟམ་ཟིམ་སྐེམ་དུ་སོང་བའི་མིག་ཆུ་བཞིན། །
ལྷང་ལྷང་འཚེར་བའི་ཉི་མ་ཁོ་ན་ནམ་མཁའི་རྣ་ཆ་ཁོ་ནར་གྱུར། །
དལ་བུར་ལྡང་བའི་རླུང་བུ་ཞིག་གིས་ལོ་མའི་སྡོད་ཁང་ས་རུ་བསྒྱུར། །
དེ་མ་ཉིད་དུ་ས་གཞིའི་ངོས་ལ་གསེར་གྱིས་བྲིས་པའི་རི་མོ་བཀོད། །
ཡུལ་ལྗོངས་ཀུན་ལ་གསེར་ཞུན་བྱུགས་འདྲའི་ལོ་ལེགས་གསར་པས་མགོ་བོ་ལྡེམ། །
རྩྭ་དག་རླུང་གི་འཕྱོ་འཇགས་ཁྲོད་དུ་ཁ་དོག་ལྗང་གུ་རིམ་གྱིས་བརླགས། །
དེའི་ཚེ་དུས་ཚིགས་གསུམ་པའི་ཉམས་སྣང་ས་གཞིའི་ངོས་ལ་གསལ་ལེར་འཆར། །
བྱ་བྱིའུ་མང་པོ་སྐྱོ་བས་འཕུར་ཡང་ཞིང་པའི་བཞིན་ལ་འཛུམ་མདངས་རྒྱས། །
སྙེ་མའི་མགོ་བོ་ཐུར་ལ་དཔྱངས་པ་འབྲས་བུས་གཏམས་པའི་རྣམ་འགྱུར་ཏེ། །
དེ་ལ་རླུང་གིས་གཡོས་པའི་རྣམ་པས་བདག་པོར་གཡབ་མོ་བྱེད་དང་མཚུངས། །
ཟོར་ཆུང་ལེབ་མོ་ཤུགས་ཀྱིས་འགུལ་བས་སོག་མ་ཕྲ་མོ་དུམ་བུར་གཏུབས། །
དཀའ་ཐུབ་ལུས་ལ་རྔུལ་ཆུ་ཁྲོམ་མེར་དབུགས་ཀྱང་ཅུང་ཟད་ཧལ་བཞིན་མོད། །
བཞིན་ལ་འཛུམ་པའི་སོ་དཀར་མངོན་པ་སྐར་མ་ཤར་བའི་ངང་ཚུལ་ཅན། །
མགྲིན་པའི་སྦུབས་ནས་གླུ་སྒྲ་སྙན་མོ་རི་ཀླུང་ཐང་གསུམ་འགེངས་བྱེད་པ། །
སྟོན་གྱི་དུས་འདིར་ཞིང་གྲོང་འདི་ནི་གྲོང་ཁྱེར་དག་ལས་འཁྲུག་པར་སྣང་། །
ཚར་མའི་ཕོན་པོ་ཞིང་ཆུང་ནང་དུ་མོག་མོག་བཙོས་པའི་མོག་ཕྲུ་འདྲ། །
རིམ་པར་བརྩེགས་པའི་སྐས་ཞིང་དག་ནི་མཆོད་རྟེན་བརྩེགས་པའི་བང་རིམ་བཞིན། །
ཐང་གཤོངས་ཡངས་མོའི་ཞིང་ཐང་དེ་ནི་ཤོག་དཀར་སྟེང་གི་རེ་ཁཱ་སྟེ། །
སྣ་ཚོགས་གཟུགས་དང་ཁ་དོག་གིས་འགྱིངས་ཡུལ་ལུང་འདི་ཉིད་རབ་ཏུ་མཛེས། །
སྔོ་ལྗང་ལོ་མའི་ལང་ཚོ་གསར་པ་སད་སེར་གཏུམ་པོས་མ་བཅོམ་པ། །
དགུང་བསངས་ཨ་སྔོན་བཀའ་དྲིན་གསོ་ཕྱིར་གཏང་རག་སླད་དུ་མཆོད་པ་ཡི། །
འབྲུ་སོགས་བསྣམས་ཏེ་མཆོད་པ་འབུལ་ཞིང་སྣ་ཚོགས་ཆོ་ག་ལེགས་པར་བྱས། །
སང་ལོའི་རེ་བའི་འབྲས་བུ་སྨིན་ལ་གེགས་བར་དབེན་པའི་སྨོན་ལམ་བཏབ། །
བཅོ་ལྔའི་ཟླ་བ་ལམ་ལམ་འཚེར་བ་ཞིང་པའི་རོགས་ཟླར་ཡོང་བ་བཞིན། །
ཉིན་དཀར་མ་ཟད་མཚན་མོའི་དུས་སུའང་གཉིད་ལ་མ་ཡུར་ལས་ལ་གཞོལ། །
སྐས་ཞིང་རི་ལམ་ཆུང་ངུ་དག་ནི་དུད་འགྲོས་མི་འདྲེན་ཐབས་མེད་ཀྱང་། །
གཞུང་ཞིང་འཕྲུལ་གྱིས་མྱུར་མོར་འདྲེན་པ་འཕོ་འགྱུར་ཟེར་བ་བསྟན་དང་མཚུངས། །
ཞིང་ཐང་གྲུ་བཞི་སྟོང་པར་གྱུར་དུས་དུད་འགྲོ་དག་གི་ལོ་གསར་ཏེ། །
སོག་མའི་རྩྭ་དང་འབྲུ་ཡི་ལྷག་མ་རྩྭ་སོགས་གང་འདོད་བཟའ་ཆོག་ཅིང་། །
ཁྱུ་དང་ཁྱུ་བྱས་རྩེ་དགར་རོལ་ཞོར་རྡུང་ཁ་འགྲན་ནས་རྒྱལ་ཕམ་རྩོད། །
རེ་ཞིག་དཀར་ནག་ཁྲ་བོའི་ཚོན་རིས་བྲིས་ལྟར་ཡིད་འོང་རྣམ་པར་བཀྲ། །
ནས་དང་སོག་མའི་དབྱེ་བ་བརྗེས་ལ་གཡུལ་ཁ་གཅོག་ཅེས་བྱ་བ་སྟེ། །
སྔ་མོ་དུད་འགྲོའི་སུག་བཞིས་བཅགས་པས་ཉིན་མཚན་བཅོ་བརྒྱད་འགོར་བ་ལ། །
ཚན་རྩལ་འཕྲུལ་གྱི་འཁོར་ལོས་སྒྱུར་དུས་ཉིན་ཞག་འགའ་ལ་མཇུག་བསྒྲིལ་བ། །
མྱུར་ཞིང་སླ་ལ་སྟབས་བདེ་ཅན་གྱིས་འཕེལ་རྒྱས་ཞེས་པའི་རྟགས་མཚན་མངོན། །
ཕ་ཡུལ་རི་ཁུག་ལུང་ཆུང་འདི་རུའང་དུས་བསྟུན་གོམ་སྒྲ་ལྷང་ལྷང་གྲགས། །
གྲོ་ནས་སྲན་དང་པད་ཁ་སྤུངས་པས་རི་བོའི་རྔམ་ཟིལ་ཉམས་བྱེད་ཅིང་། །
བང་མཛོད་ཆེན་མོ་ལྟེམ་མེར་བཀང་བས་བྱི་བ་དགའ་བའི་འཛུམ་བག་ལྡན། །
གསེར་རྡོག་སེར་པོས་སྨིན་པའི་ལོ་ལེགས་སོ་ནམ་པ་རྣམས་དགའ་བྱེད་དེ། །
ཕ་ཡུལ་སྐྱིད་པའི་གཞོང་གཞོང་འདི་ན་སྟོན་ཁའི་ཉམས་སྣང་མངོན་པར་བཀྲ། །
འབྲེལ་ཡོད་གསར་འགྱུར།