སྐྱིད་པོ་མང་ཡུལ་གྱི་གྲོང་ལ། །

འབྲས་ལྡན་ལྗོངས་རྒྱུ་ཡི་མཚམས་སུ། །

ཞི་འཇམ་བདེ་ལྷོད་ཀྱི་ཁོར་ཡུག །

འབྱུང་བའི་བར་ཆད་ཀྱིས་གཙེས་སོང་། །

རི་རབ་འདར་སྐད་དང་སྦྲགས་ནས། །

གཙང་ཆབ་ངུ་སྒྲ་ཡང་འདོན་བཞིན། །

ཉམ་ཆུང་འགྲོ་བ་ཡི་ཚེ་སྲོག །

བཞུར་བའི་ཆུ་མོ་ལ་ཐིམ་སོང་། །

བལྟས་ན་བཟོད་ཐབས་ཀྱང་མི་འདུག །

མཐོང་ན་དངངས་སྐྲག་ལས་ཐབས་ཅི། །

མི་འདོད་བསྐོས་ཐང་གི་མདུན་དུ། །

ཞུ་བ་འཐེན་ས་ཡང་མི་འདུག །

ཁྱིམ་གྱི་ཀ་བ་དེ་འགྱེལ་སོང་། །

ཐབ་ཀྱི་མེ་དྲོད་ཀྱང་ཡལ་སོང་། །

དམར་ཆུང་སྙིང་ཁ་དེ་གས་པའི། །

སྤུན་ཟླའི་ན་ཟུག་དེ་ཚོར་བྱུང་། །

སྐྱིད་སྡུག་ལས་དབང་གི་ཐག་པ། །

ང་ཚོ་ཕན་ཚུན་ལ་འབྲེལ་ཡོད། །

མཛེས་པའི་མང་ཡུལ་གྱི་སྐྱིད་གྲོང་། །

གཏན་དུ་ཞུམ་པ་ནི་མི་སྲིད། །

རླབས་ཆེན་མེས་རྒྱལ་གྱི་དཔུང་ཡོད། །

མི་རིགས་མཐུན་སྒྲིལ་གྱི་ཤུགས་ཡོད། །

སེམས་སྡུག་སྟོབས་ཤུགས་ཀྱིས་གསོས་དང་། །

རེ་བའི་སང་ཉིན་ལ་འོད་ཡོད། །