སྐྱིད་གྲོང་གི་སྤུན་ཟླ་ལགས། སེམས་ཤུགས་ཉམས་པ་མ་གནང་།
གློ་བུར་དུ་ཐོན་པའི་རང་བྱུང་གི་གནོད་འཚེ་ཞིག་གིས།
ངའི་མིག་མཐའ་མཆི་མས་བརླན་སོང་།
ངའི་མགྲིན་པ་ཡོངས་སུ་བརྣངས་བྱུང་།
ངའི་སྣ་ཁུང་ཟུང་ལ་ན་ཟུག་བཏང་བྱུང་།
གཅན་གཟན་གཏུམ་པོ་ཞིག་དང་འདྲ་བའི།
ཆུ་རུད་ཀྱི་མཆེ་སྡེར་རྣོན་པོས།
ཞོ་ལྟར་ཆགས་པའི་གཡུ་གཞོང་སྐྱིད་གྲོང་གི་ལང་ཚོ་ལ།
སྦར་ཤད་ལན་གཅིག་བརྒྱབ་སོང་།
རང་བྱུང་གི་ཆག་སྒོ་དེས།
ངའི་རྒྱུས་མངའ་ཆེ་བའི་ཁང་ཁྱིམ་གྱི་སྒོ་མོ།
ས་ཡིས་སྦས་ཤིང་ཆུ་ཡིས་བསྣུབས་སོང་།
མཛེས་པའི་སྐྱིད་གྲོང་ལུང་ཤུར་གྱི།
ཞོགས་པའི་ལྷིང་འཇགས་དཀྲོགས་སོང་།
ནམ་རྒྱུན་སྤྲོ་སྣང་གིས་ཕྱུག་པའི་ཞིང་ས་དེར།
ལོ་ངོ་སྟོང་གི་ཉོ་ཚོང་དང།
ཡུལ་སྐོར་བའི་ཞབས་རྗེས་ཡོད།
མཐའ་མཚམས་ཀྱི་མཚན་མོའི།
མེ་ཕུང་གི་སྒོར་གཞས་ཡོད།
ཞི་བདེ་ལྷིང་འཇགས་ཀྱི་དུས་ཚོད་ནང་།
དངུལ་གྱི་ལག་གདུབ་འཕྲད་པའི་སྒྲ་དབྱངས་སྙན།
འོན་ཀྱང་།
བར་མཚམས་མ་ཆད་པའི་དྲག་ཆར་གྱིས།
རི་བྲག་གི་ཁོག་པ་བརྒྱངས་ནས་བྲང་ཁ་དབྲལ།
འདམ་རྙོག་གི་རྦ་ཀློང་ཆེན་པོས།
ལྷིང་འཇགས་ཀྱི་རྨི་ལམ་ཁད་ཀྱིས་དཀྲོགས།
སྐྱིད་གྲོང་གི་སྤུན་ཟླ་ཚོ།
སེམས་ཤུགས་མ་ཉམས་རོགས།
སྐྱོ་གདུང་གིས་ཁྱེད་ཚོའི་སྒལ་ཚིགས་གུག་ཏུ་འཇུག་མི་རུང་།
རོགས་སྐྱོབ་ཀྱི་དཔུང་གཉེན།
ཁྱེད་ཚོའི་ཕྱོགས་སུ་བསྐྱོད།
འཇམ་མཉེན་གྱི་ཕྱག་ཟུང་རེ་རེས།
ཚེ་སྲོག་གི་རྒྱུན་ཐག་བསྲིངས་ནས།
གུད་ཆག་གི་ཞིག་རོའི་སྟེང་དུ།
མི་རིང་བར་མྱུ་གུ་གསར་པ་འབུས་ངེས།
ཆར་ཡན་ཆད་ཅིང་།
རླུང་ངན་འཇགས་རྗེས།
རི་སྔོན་ཆུ་དྭངས་སླར་ཡང་ང་ཚོར་དབང་ངེས།
སྐྱིད་གྲོང་གི་སེམས་ཤུགས་ཀྱིས།
ས་མཐོའི་སྙིང་རུས་མཚོན།
ཁྱེད་ཚོའི་ངར་ཤུགས་ལས།
ས་མཐོའི་གདེང་སྤོབས་མངོན།
སྐབས་འཕྲལ་གྱི་མུན་ནག་གིས།
དྲིན་ཆེན་ཉི་མའི་བྱོན་ལམ་འགོག་པར་མི་ནུས་པས།
ང་ཚོས་དཔུང་པ་མཉམ་གཤིབ་ཀྱིས།
སྐྱིད་གྲོང་གི་མཛེས་སྡུག་ལྡན་པའི་ཞལ་རས་བསྐྱར་གསོ་དང་།
འཚོ་བ་གསར་པའི་རྣམ་པ་མུ་མཐུད་བཞེངས་པས་ཆོག
དེས་ན། སེམས་ཤུགས་མ་ཉམས་རོགས།
སྐྱིད་གྲོང་བ། ང་ཡི་སྤུན་ཟླ་ལགས།
འབྲེལ་ཡོད་གསར་འགྱུར།