དཔྱིད་ཀ

དཔྱིད་ཀྱི་ཕོ་ཉས་གླུ་དབྱངས་བར་མེད་ལེན། །

སྦྲང་ཆར་ཟིལ་མས་སྔོ་ལྗང་འདོད་དགུ་འཇོ། །

ནམ་མཁའི་ནོར་བུས་འཛུམ་ཞལ་གྲོལ་བའི་ཚེ། །

གངས་རི་དག་ཀྱང་རྔུལ་ཆུ་ཁྲུམ་ཁྲུམ་བྱེད། །

དབྱར་ཁ།

དབྱར་རྔའི་སྒྲ་དབྱངས་མཁའ་མཐར་ཁྱབ་བཞིན་དུ། །

མདོངས་མཐའ་ཅན་རྣམས་མྱོས་པའི་བྲོ་གར་འཁྲབ། །

དེ་ལྟར་བསེར་བུའི་སྒྲ་དབྱངས་དང་བསྟུན་བཞིན། །

རྩི་ཤིང་མེ་ཏོག་དགའ་བའི་མགོ་ལྕོག་ལྡེམ། །

སྟོན་ཁ།

མཚན་མོ་རྒྱུ་སྐར་ཚོགས་ཀྱིས་ལྷ་ལམ་བརྒྱན། །

ཉིན་མོ་སྤྲིན་དཀར་ཚོམ་བུའི་ལང་ཚོ་མཛེས། །

བརྒྱ་བྱིན་བང་མཛོད་འཕོས་འདྲར་ས་གཞིའི་ངོར། །

གསེར་དག་མི་ཤོང་བརྩེགས་ནས་བཞག་པ་བཞིན། །

དགུན་ཁ།

སྐྱི་བསེར་མགྱོགས་འགྲོས་རྡུལ་རྣམས་དཀྲུགས་ཙ་ན། །

བྱེད་པོ་བ་མོས་ཁ་བའི་དཔུང་དམག་དྲངས། །

དེར་འཇིགས་དྭངས་གཙང་མཚོ་དང་ཆུ་ཕྲན་ཚོགས། །

ཆབ་རོམ་མལ་དུ་གབ་པའི་ཚུལ་ལ་བྲེལ། །