ཁྱེད་སྐུ་གཟུགས་མི་ཆེ་མི་རྒྱགས་ལ། །

དབུའི་སྐྲ་ལོ་མི་རིང་སྣུམ་པོ་མ། །

གདོང་དཀར་གསལ་ཟླ་བར་མཚུངས་པ་ཡི། །

ན་ཆུང་ཆུང་ང་སེམས་མ་རྐུ་དང་། །

གསུང་ཕྲ་མོ་མི་ཆེ་སྙན་པོ་མ། །

ངའི་རྣ་ལ་འཇེབས་པས་བརྗེད་ནུས་མིན།

རྒྱུད་སྐུད་པར་དམ་ལྷོད་བཏང་རྗེས་སུ། །

སྒྲ་འགྲིག་པའི་སྒྲ་སྙན་དབྱངས་དང་མཚུངས། །

འཛུམ་ཤིག་ཤིག་འཛུམ་ཆུང་གྲོལ་དུས་སུ། །

མཛེས་མཛེས་པའི་མཛེས་ཀོང་གསལ་ལེ་མ། །

མཛེས་ན་ཆུང་བཞད་མོ་མ་བཞད་དང་། །

ངའི་ཁྲ་ཆུང་མིག་སེར་ལངས་ནས་ཡོད། །

སྤྱན་དཀྲི་ག་ཤིག་ཤིག་ཅིག་གི་འོག །

ཁྲ་ཧྲིག་ཧྲིག་སྤྱན་ཟུང་གཡོ་དུས་སུ། །

ང་ལྟ་རྒྱ་མཐོང་རྒྱ་ཆེ་ན་ཡང་། །

རགས་ཞིབ་མོས་མ་ལྟ་རང་ལྟ་རེད། །

ཁྱེད་བཅུ་དྲུག་ལང་ཚོའི་དཔལ་ལྡན་མ། །

ངའི་གམ་དུ་མ་བྱོན་རྒྱང་ནས་ཕེབས། །

ངའི་སྙིང་ཆུང་འཕར་བས་མི་ཚད་ཅིང་། །

འགྲོ་གོམ་པའི་རང་དབང་ཤོར་ནས་གདའ། །

ཁྱེད་ཕ་ཡུལ་ལྷ་སར་ལོག་དུས་སུ། །

ང་བཞག་ནས་མ་འགྲོ་ཁྲིད་རོགས་ཞེས། །

མནའ་ཆུང་ཆུང་ཞིག་ཀྱང་བཞག་རྗེས་སུ། །

ད་ཁྱེད་དང་མཉམ་འགྲོ་མཉམ་འདུག་བྱེད། །