ཤང་ཤང་ཆུ་ཕྲན་ཁོང་ལ། །

ཅ་ཅོ་ཆེ་ཞེས་མ་གསུངས། །

ལ་ལུང་མང་པོ་བརྒྱབ་ནས། །

ཐག་རིང་རྒྱང་ལ་ཆས་འགྲོ། །

ཆུ་མགོ་གངས་ལས་བརྡོལ་ཞིང་། །

ཆུ་རྔ་རྒྱ་མཚོར་འདྲེས་པ། །

རི་ཐང་སྒང་གཤོངས་བར་གྱི། །

ཁུག་པ་སྟོང་ཕྲག་བསུས་ཡོད། །

སྤང་ཐང་ཡངས་མོའི་གཞོང་ལ། །

གྱ་གྱུའི་གོམ་སྟབས་བསྒྱུར་ནས། །

སྤང་ཁའི་དཀར་དམར་མེ་ཏོག །

འཐུ་བའི་ལས་ལ་བྲེལ་ཡོད། །

ཚང་ཚིང་ནགས་ཀྱི་ཚལ་ལ། །

ཡངས་པའི་གོམ་ཁ་བསྒྱུར་ནས། །

རྐང་འཐུང་གཡུ་ལོའི་ཚོགས་ལ། །

ཟིལ་པའི་དངོས་གྲུབ་གནང་ཡོད། །

བྲག་རི་མཐོན་པོའི་དབུས་སུ། །

མཆོངས་ཤིང་བརྒྱུགས་པ་གནང་དུས། །

ཞུམ་མེད་སྤོབས་པའི་བར་ནས། །

ཟོལ་མེད་རང་གཤིས་མངོན་ཡོད། །

དགུན་གྱི་ལྷགས་བསིལ་གྲང་མོས། །

ཆབ་རོམ་སྦུབས་ལ་དྲངས་ཡང་། །

རྒྱང་ལ་ཕྱོགས་པའི་གོམ་ཁ། །

ལྷོད་པའི་དུས་ནི་མེད་དོ། །

དབྱར་གྱི་འབྲུག་གི་ཕོ་ཉས། །

ཆར་པའི་མགྲོན་པོ་བསུ་དུས། །

ཆུ་མོའི་ལང་ཚོ་རྒྱས་ནས། །

རི་ཀླུང་གཡུ་ཡིས་བརྒྱན་ཡོད། །

འགྲོ་བའི་སྐོམ་གདུང་སེལ་ཞིང་། །

རྩི་ཤིང་ལང་ཚོ་རྒྱས་པ། །

ཆུ་མོའི་ཐིགས་པ་རེ་རེ། །

རིན་བྲལ་ནོར་བུ་ཡིན་སོང་། །

ཀྱག་ཀྱོག་ལམ་ཕྲན་བརྒྱུད་ནས། །

རྒྱང་ལ་བཞུད་པའི་ཆུ་མོར། །

ལྡོག་མེད་གོམ་ཁ་ལྡན་ཞིང་། །

བདུད་རྩིའི་སྨན་ལས་ལྷག་པ། །

ཉི་མའི་འོད་ཀྱིས་གསོས་ཤིང་། །

ཟླ་བའི་བསིལ་གྱིས་བསྐྱངས་པས། །

ཡན་ལག་བརྒྱད་དང་ལྡན་པ། །

སྐྱེ་འགྲོའི་སྙིང་ནོར་ཡིན་ནོ། །