དགེ་རྒན་ལ་བསྟོད་པའི་གླུ།
གཡོ་མེད་ལྷུན་པོ་ཇི་བཞིན་བརྗིད་པའི་སྐུ། །
རབ་སྙན་ཚངས་པའི་དབྱངས་ལ་འགྲན་པའི་གསུང་། །
དཀྱེལ་ཡངས་སྙིང་རྗེའི་པད་དཀར་འཛུམ་པའི་ཐུགས། །
བཤེས་གཉེན་དམ་པར་སྒོ་གསུམ་གུས་པས་འདུད། །
འཆད་ཁྲིད་བཟང་པོས་ལེགས་ཚོགས་ལམ་དུ་བསྐུལ། །
རྩོད་པའི་དཔུང་གིས་ཕས་རྒོལ་ཟིལ་གྱིས་གནོན། །
རྩོམ་པའི་སྨྱུ་གུ་བར་སྣང་གློག་ལྟར་འཁྱུག །
ལྔ་རིག་ཐུགས་སུ་ཆུད་པ་ངོ་མཚར་ཆེ། །
ཤེས་བྱའི་བསུང་ཞིམ་འཐུལ་བའི་སློབ་གླིང་ན། །
བློ་གསལ་ཚོགས་རྣམས་རང་གི་བུ་བཞིན་གཅེས། །
མ་ལྟར་བརྩེ་བའི་ཕྱག་གིས་སྐྱོང་མཁས་པའི། །
བཀའ་དྲིན་མཚུངས་མེད་དགེ་བའི་བཤེས་ལ་འདུད། །
སློབ་གསོའི་ལས་དོན་ཀུན་གྱི་གཙོ་བོར་འཛིན། །
མི་རིགས་གོང་དུ་འཕེལ་བའི་སྒུལ་ཤུགས་ཏེ། །
མི་ཡི་རིགས་ཀྱི་རྣམ་ཤེས་བཟོ་བཀོད་པ། །
དགེ་རྒན་དམ་པའི་སྐུ་ཚེ་བརྟན་གྱུར་ཅིག །
འབྲེལ་ཡོད་གསར་འགྱུར།