གཡུ་ཐོག་ཟམ་པའི་སྒང་ནས། །

ལས་ཀྱིས་འཕྲད་པའི་བྱམས་པ། །

ཞལ་རས་འཛུམ་དཀར་ཟླ་བ། །

དེ་འདྲའི་ཡིད་ལ་འཐད་པ། །

བཅོས་མིན་རང་བཞིན་འཇམ་ལ། །

སོ་དཀར་འཛུམ་གྱིས་ཕྱུག་པ། །

ཡིད་འོང་དགའ་བའི་སྨན་ཆུང་། །

ཟམ་པས་བདག་ལ་གནང་བྱུང་། །

གཡུ་ཐོག་ཟམ་པའི་འོག་གི །

དྭངས་གཙང་ཆུ་མོ་འདྲ་བའི། །

འུ་གཉིས་ལས་མཐུན་བརྩེ་བ། །

ཟམ་འོག་ཆུ་ལས་དྭངས་བ། །

ཟམ་ཆེན་རྒྱུད་ནས་ཕེབས་མཁན། །

དེ་འདྲའི་མི་ཚོགས་མང་ཡང་། །

རང་སེམས་མཛའ་བའི་མི་དེ། །

ཁྱོད་ཉིད་གཅིག་པུ་ཡིན་འདུག །

ཟམ་པའི་སྒང་དུ་བསྡད་ནས། །

ཁྱོད་དང་ཁ་བརྡ་བྱས་ཡོད། །

ཟམ་པའི་ཞོལ་ལ་སླེབས་དུས། །

ཁྱོད་རང་དྲན་འགོ་ཚུགས་སོང་། །

གཡུ་ཐོག་ཟམ་པའི་ཞོལ་ནས། །

རེ་བའི་འདུན་མ་བཅོལ་ཡོད། །

བྱམས་པའི་བརྩེ་བ་དྲན་བཞིན། །

ཟམ་པའི་སྣེ་ལ་བསྡད་ཡོད། །

གཡུ་ཐོག་ཟམ་པའི་ལྕགས་རི། །

རྙིང་ནས་ཞིག་ཐབས་མེད་ན། །

ང་དང་བྱམས་པའི་དུང་སེམས། །

ཚེ་འདིར་རྫོགས་མཐའ་མི་འདུག །