སྐྱེད་མོས་ཚལ་བཞིའི་འཆི་མེད་ར་བ་ན། །

ངོ་མཚར་བཀོད་པ་སྟོང་གིས་ཡོངས་ཕྱུག་པ། །

འདི་ཀོ་བི་ཤྭ་ཀརྨས་བཞེངས་པ་འམ། །

ཡང་ན་རྣམ་རྒྱལ་ཁང་བཟང་འཕོས་སམ་ཅི། །

གསེར་སྦྱངས་བཙོ་མས་ལེགས་གྲུབ་རྒྱ་ཕིབས་དང་། །

བྱ་གཡབ་གནྫིར་དང་སིལ་སྙན་དང་། །

དྲ་བ་དྲ་ཕྱེད་རི་དྭགས་ཆོས་འཁོར་སོགས། །

བཀོད་ལེགས་ཁང་བཟང་འདི་ཉིད་མཁའ་ན་འགྱིངས། །

ཨེ་མ་ཡིད་འཕྲོག་གཞལ་ཡས་ཁང་འདིའི་རྩེར། །

རྒོད་པོའི་ཚོགས་རྣམས་གཤོག་སྒྲོ་འདར་བཞིན་དུ། །

རེ་ཞིག་དབུགས་ཀྱང་ཧད་དེ་ངལ་གསོ་བྱེད། །

མཁའ་ལ་བཙུགས་པའི་ཐེམ་སྐས་འདི་ཙམ་ཉིད། །

བསམ་པའི་དོན་མཆོག་ཐུགས་ཀྱི་མེ་ལོང་བཞིན། །

གྲུབ་ཅིང་རྫོང་མཁར་རྣམས་ཀྱི་མཐའ་མའི་གཞིས། །

རྩེ་གྲ་འདི་ཡི་མཆོར་སྒེག་དཔལ་ཡོན་ལ། །

རྫོང་མཁར་གཞན་གྱིས་འགྲན་པའི་སྐལ་བ་ཕྲ། །

ལྟ་བས་མི་ངོམས་གང་དེའི་མཛེས་ཆོས་ཀྱིས། །

བདག་གི་ཡིད་དབང་རབ་ཏུ་འཕྲོག་གྱུར་པས། །

འདྲེན་བྱེད་གནམ་ལ་ལྟ་བའི་སྐད་ཅིག་མར། །

མགོ་ཡི་ཞྭ་ཡང་དབང་མེད་ལྟུང་ལ་ཁད། །