ལྷ་ལྡན་གྲོང་གི་དབྱར་དུས་ལ་བསྔགས་པ།
གཡུ་མདོག་ས་འཛིན་ཕྲེང་བའི་མུ་ཁྱུད་ཅན། །
དལ་འབབ་སྐྱིད་ཆུ་སྔོན་མོའི་སྐ་རགས་ཅན། །
སྣ་ཚོགས་བ་གམ་མང་པོའི་ཕྲ་རྒྱན་ཅན། །
ལྷ་ལྡན་གྲོང་གི་དབྱར་དུས་མིག་གི་དཔྱིད། །
མཐོན་མཐིང་ཀུན་གསལ་བུ་མོའི་ཕང་བ་རུ། །
རབ་དཀར་ཆུ་འཛིན་དར་གྱི་བླ་བྲེས་བརྒྱན། །
སྲིད་པའི་མིག་གི་འོད་སྟོང་ཕྱོགས་བཅུར་འཕྲོ། །
དྲི་བཞོན་འཇམ་པོས་དབུགས་དབྱུང་དཔག་མེད་སྦྱིན། །
སྤྱི་གླིང་ནེའུ་གསིང་ཁུད་དུ་ཡིད་འཕྲོག་པའི། །
ཕྲ་ཚོམ་མེ་ཏོག་སྣ་ཚོགས་སྡུག་གུར་བཞད། །
ཚང་ཚིང་ལྗོན་ཤིང་གཡུ་ལོ་ཐགས་སུ་བཀྲ །
གཉིས་སྐྱེས་གསུང་གི་འགྱུར་ཁུགས་རྣ་བར་སྙན། །
ཡིད་འོང་སྣོད་བཅུད་བཀོད་པ་མ་ལུས་པ། །
གཅིག་ཏུ་བསྡུས་འདྲའི་ནོར་གླིང་ཀླུ་ཁང་དུ། །
སྐྱེ་བོའི་ཚོགས་ཀྱིས་གང་དགའ་གང་སྐྱིད་ངང་། །
གླིང་ཁ་གཏོང་བའི་རྣམ་པ་ཉམས་རེ་དགའ། །
བསིལ་ལྗོངས་ཞེས་བྱའི་གྲགས་པ་ཕྱོགས་ཀུན་ཏུ། །
ཁྱབ་པས་ཚ་བའི་ཡུལ་གྱི་སྐྱེ་འགྲོའི་ཚོགས། །
དྲི་ལྡན་མེ་ཏོག་སྙེག་པའི་བུང་བ་བཞིན། །
ལྗོངས་འདིར་རྒྱུ་བའི་ཡོ་ལང་སྤྲིན་བཞིན་འཁྲིགས། །
སྲོད་དང་ཞོགས་ཀའི་དམར་སེར་མཚམས་སྤྲིན་འོག །
གྲུ་འཛིན་རི་བོའི་གཟི་འོད་དང་བསྡོངས་ནས། །
རང་རང་དགའ་བའི་ལས་ལ་ཧུར་ཐག་གིས། །
འཇུག་པའི་མི་རྣམས་ཤིན་ཏུ་ཡི་གར་འོང་། །
གཡུ་ཡི་མར་གད་བཞུར་འདྲའི་མཚེའུའི་ངོས། །
ངང་ངུར་འདབ་ཆགས་སྣ་ཚོགས་བག་ཡངས་རྒྱུ། །
རྩི་ཤིང་རིགས་སྣ་མང་པོས་ཡོངས་སུ་ཁྱབ། །
ལྷ་ཀླུ་འདམ་རའི་ཡུལ་ལྗོངས་ཡིད་ཀྱི་གསོས། །
བཤེས་གཉེན་དམ་པའི་མ་ནོར་ལམ་སྟོན་འོག །
གནའ་དེང་ཤེས་བྱའི་མཚོ་མོར་ལེགས་འཇུག་པའི། །
བློ་གསལ་ཚོགས་ཀྱིས་འབྲས་བཟང་ཁུར་བསྣམས་ནས། །
སློབ་གྲྭ་རིམ་པར་འགྲིམས་པའི་ཚུལ་འདི་མཛེས། །
སྐྱེ་འགྲོ་ཡོངས་ལ་བདེ་བའི་དཔལ་སྦྱིན་པའི། །
དབྱར་གྱི་ལྷ་སའི་སྣོད་བཅུད་བཀོད་པ་འདིས། །
སུམ་རྩེན་དགའ་ལྡན་གནས་ལ་སྐྱེངས་པ་སྟེར། །
ལོངས་སྤྱོད་ཀླུ་ཡི་ཡུལ་ཀྱང་དམའ་སར་འགོད། །
ཡུལ་འདིའི་མཛེས་པ་དགའ་མའི་བསླུ་བྲིད་བཞིན། །
ཡེ་ནས་བཟློག་ཐབས་བྲལ་བའི་ཉེར་ལེན་གྱིས། །
སྨྲ་བསམ་བརྗོད་འདས་ཡིད་ཀྱི་འགྱུར་བ་ཀུན། །
ལྡེམ་ལྡེམ་སོར་མོའི་འདུ་བྱེད་བསྒྱུར་ཏེ་བྲིས། །
འབྲེལ་ཡོད་གསར་འགྱུར།