ཆར་གླུ
ཆར་པ་ལན་གཅིག་བབས་བྱུང་། །
སྤང་རིའི་སྒང་ལ་བབས་བྱུང་། །
སྤང་རིར་ར་ལུག་འཚོ་མཁན། །
རྫི་བོའི་སེམས་ལ་བབས་བྱུང་། །
ཆར་པ་ལན་གཅིག་བབས་བྱུང་། །
ཞིང་ཐང་མངལ་དུ་བབས་བྱུང་། །
ཞིང་ཁའི་ལྗང་པ་གསོ་མཁན། །
སོ་ནམ་སེམས་ལ་བབས་བྱུང་། །
ཆར་པ་ལན་གཅིག་བབས་བྱུང་། །
ཆུ་བོའི་གཞུང་ལ་བབས་བྱུང་། །
ཆུ་ནང་འཁྱུག་བགྲོད་རྩེན་པའི། །
ཉ་མོའི་སེམས་ལ་བབས་བྱུང་། །
ཆར་པ་ལན་གཅིག་བབས་བྱུང་། །
སྐྱེད་མོས་ཚལ་དུ་བབས་བྱུང་། །
འཆར་ཀའི་མེ་ཏོག་སྟོང་གི།
གང་བུའི་ཕང་བར་བབས་བྱུང་། །
ཆར་པ་ལན་གཅིག་བབས་བྱུང་། །
ལྗོན་ཤིང་ར་བར་བབས་བྱུང་། །
གཡུ་ལོའི་རང་མདངས་ཟད་ཁའི། །
ལྗོན་པའི་རྩ་བར་བབས་བྱུང་། །
ཆར་པ་ལན་གཅིག་བབས་བྱུང་། །
རྒྱང་བཞུད་ལམ་དུ་བབས་བྱུང་། །
ལམ་གྱི་ཚ་གདུག་འགོག་པའི། །
གདུགས་ཀྱི་བྱེད་པོར་བབས་བྱུང་། །
ཆར་པ་ལན་གཅིག་བབས་བྱུང་། །
སྒང་གཤོང་མེད་པར་བབས་བྱུང་། །
སྔོ་ལྗང་ཚེ་སྲོག་ཀུན་པོའི། །
དུས་ཐོག་མགོན་དུ་བབས་བྱུང་། །
ཆར་པ་ལན་གཅིག་བབས་བྱུང་། །
གངས་ཅན་ལྗོངས་ལ་བབས་བྱུང་། །
རེ་སྒུག་ཁྲི་ཁྲག་མང་པོའི། །
འདུན་པ་གསོ་བཞིན་བབས་བྱུང་། །
ཆར་པ་ལན་གཅིག་བབས་བྱུང་། །
ནམ་མཁའི་དབྱིངས་ནས་བབས་བྱུང་། །
ཡུས་དང་ངོ་སོ་མེད་པར། །
སིམ་སིམ་སིམ་ལ་བབས་བྱུང་། །
ཆར་པ་ལན་གཅིག་བབས་བྱུང་། །
མི་རྒན་ལུས་ལ་བབས་བྱུང་། །
སེམས་པའི་གཡང་རྟེན་ལུས་ཀྱི། །
ནད་འཇོམས་བདུད་རྩིར་བབས་བྱུང་། །
ཆར་པ་ལན་གཅིག་བབས་བྱུང་། །
དར་མའི་སེམས་ལ་བབས་བྱུང་། །
ལྷག་བསམ་དལ་འགྲོའི་རྒྱུན་གྱི། །
ཕྱི་ཐག་སྲིང་བཞིན་བབས་བྱུང་། །
ཆར་པ་ལན་གཅིག་བབས་བྱུང་། །
ན་ཆུང་ཀླད་ལ་བབས་བྱུང་། །
རིག་པའི་ལྗང་མྱུག་རྒྱས་པའི། །
གཏན་གྱི་གཉེན་པོར་བབས་བྱུང་། །
ཆར་པ་ལན་གཅིག་བབས་བྱུང་། །
སྲོག་ལྡན་སེམས་ལ་བབས་བྱུང་། །
སྲོག་མེད་གཟུགས་ལ་བབས་བྱུང་། །
ཀུན་གྱི་གཞི་ལ་བབས་བྱུང་། །
ཆར་པའི་དགེ་མཚན་སྨྲས་ན། །
ཆར་ཐིགས་ལས་ཀྱང་མང་བས། །
ཆར་པ་ལན་གཅིག་ལན་གཉིས། །
ཆར་ལྡན་དུས་ལ་འབབ་ཤོག །
འབྲེལ་ཡོད་གསར་འགྱུར།