བསིལ་ལྗོངས་ཀྱི་དུས་བཞིར་བསྔགས་པ།
མཐོ་མཐོ་གངས་རིས་བསྐོར་བའི་སྣོད་བཅུད་ཀྱི་གཞོང་པ། །
དྭངས་དྭངས་ཆུ་མིག་བཞུར་བའི་མུ་ཏིག་གི་ཕྲེང་མཛེས། །
སྙན་སྙན་སྐད་ངག་འཇེབས་པའི་མི་ཡུལ་གྱི་དག་ཞིང་། །
མཛེས་མཛེས་བསོད་ནམས་ཞིང་ས་བསིལ་ལྗོངས་རང་ཡིན་སོང་། །
ཆུ་འཛིན་ལང་ལོང་འཁྲིགས་པའི་དཔྱིད་དཔལ་གྱི་ཕོ་ཉ། །
མ་བོས་མགྲོན་པོའི་ཟོལ་གྱིས་ཕེབས་པ་རང་བྱུང་ན། །
མཚར་སྡུག་ལང་ཚོས་སྙེམས་པའི་དཔྱིད་དཔལ་གྱི་སྒེག་མོ། །
གཡུ་ལོའི་གོས་བཟང་མནབས་པའི་རང་མདངས་དེ་མཚར་ཨང་། །
ངང་ངུར་རང་དགར་རྒྱུ་བའི་དབྱར་ལྗོངས་ཀྱི་དགའ་མ། །
བསིལ་འཇམ་སྐྱིད་ཆུར་ཞུགས་པའི་སྟངས་སྟབས་ཀྱི་མཛེས་པས། །
འདོད་ལྡན་སེམས་གྱི་བརྟན་པ་ཅིག་ཅར་དུ་ཕྲོགས་ཏེ། །
སྐྱེ་བོ་དགའ་བའི་སྣང་བ་བསིལ་རླུང་དང་འདྲེས་སོང་། །
མགོ་ལྕོག་ལྡེམ་ལྡེམ་གཡོ་བའི་འབྲས་ལྡན་གྱི་སྟོན་ཞིང་། །
གསེར་མདོག་མར་ཁུ་བྱུགས་འདྲའི་རླབས་ཕྲེང་ལ་རྩེན་ནས། །
འབྲུ་མཛོད་བྱུར་བུར་གཏམས་པའི་བགོ་སྐལ་དུ་བྱུང་དུས། །
ཞིང་པ་རྒན་པོའི་ཞལ་འཛུམ་འདབ་སྟོང་བཞིན་གྲོལ་བྱུང་། །
དར་དཀར་ཡོལ་བས་བཀླུབས་པའི་དགུན་ལྗོངས་ཀྱི་ཕོ་བྲང་། །
འཛམ་གླིང་ཡང་རྩེར་འཕགས་པའི་པོ་ཏ་ལ་བརྗིད་ཆགས། །
ཁ་བ་ལྷབ་ལྷུབ་བསྐྱོད་པའི་བར་སྐོར་ཉིད་སྣུམ་པ། །
ལྷག་བསམ་ཁ་བར་བཏབ་པའི་ཞབས་རྗེས་དེ་མཚར་བ། །
ལྷོད་ལྷོད་སེམས་ཀྱི་སྟ་གོན་བདེ་མལ་དུ་གསོས་ཤིང་། །
ཤང་ཤང་ཆུ་མོ་བཞུར་སྒྲའི་གླུ་སྐད་ལ་ཉན་ཏེ། །
བསིལ་བསིལ་རྫོང་རྒྱབ་ཀླུ་ཡི་ཕོ་བྲང་གི་འདབས་ནས། །
བདེན་བདེན་ངག་གི་ཚིག་གསུམ་བསིལ་ལྗོངས་ལ་ཕུལ་ཡོད། །
འབྲེལ་ཡོད་གསར་འགྱུར།