༄༅། སྤང་ཐང་གི་དྲན་པ།
རྫི་མོའི་གོམ་ཆུང་ཕྲ་མོ། །
མདུན་ལ་སྤོ་ཙམ་གནང་དུས། །
ཉི་མའི་འོད་ཀྱི་ཟེགས་མ། །
བསིལ་བསིལ་རླུང་བུས་གཏོར་སོང་། །
ཟེགས་མའི་མུ་ཏིག་རྡོག་པོ། །
རྩྭ་མགོའི་ཟིལ་པར་འདྲེས་སོང་། །
ལུ་གུ་གོམ་ལག་མྱུར་མོས། །
རྩེད་འཇོའི་གར་ལ་རོལ་སོང་། །
རྩྭ་མགོའི་མུ་ཏིག་ཟིལ་པ། །
ལུ་གུའི་སུག་པས་དཀྲོགས་སོང་། །
ཟིལ་པའི་མུ་ཏིག་ཆར་ཡིན། །
ཆར་པ་སྤང་ལ་བབས་སོང་། །
སྤང་ཁའི་སྤང་རྒྱན་མེ་ཏོག །
ཆུང་ཆུང་ལུ་གུའི་རྩེད་གྲོགས། །
གདོང་གི་འཛུམ་ཆུང་དམུལ་དམུལ། །
རིང་བའི་ཕྱི་ཐག་ཡིན་སོང་། །
དབྱར་མ་སྟོན་ལ་སླེབས་དུས། །
སྤང་རྒྱན་འདབ་ལོ་མ་ཐོར། །
ལུ་གུ་སུན་པར་དོགས་ནས། །
ཡུད་ཙམ་འདུག་རོགས་མཛད་ཡོད། །
ཁ་ཆར་བུ་ཡུག་འཚུབ་ན། །
ཚར་ལྭ་རྫི་བོར་ཕུལ་ཆོག །
ལུ་གུའི་གོམ་པའི་རྩེད་འཇོ། །
སང་ལོ་སྤང་ལ་སྒྱུར་ཤོག །
འབྲེལ་ཡོད་གསར་འགྱུར།