སེམས་ཀྱི་བདག་མོ།
མེ་ཆར།
ཟླ་བ་སྒོར་སྒོར་ཨ་མའི་ཞལ་རས་དེ་ཡིན་ན། །
ཉི་ཟེར་དྲོན་མོ་ཨ་མའི་བྱམས་བརྩེ་དེ་ཡིན་ན། །
སྐར་མ་ཁྲ་ཚོམ་ཨ་མའི་འཛུམ་མདངས་དེ་ཡིན་ན། །
ནམ་མཁའ་སྟོང་པ་ཁོ་མོའི་ནང་སེམས་དེ་ལོས་ཡིན། །
སྐྱིད་སྡུག་འཚོ་བ་བསྟར་བའི་གྲུ་ཟུར་དེའི་མཐའ་ན། །
དྲན་པའི་མེ་ལོང་ནང་གི་གཟིམས་མེད་ཀྱི་འོད་ཆེན། །
བརྩེ་བའི་ཁ་དོག་འགྱུར་མེད་གངས་རི་ཡི་རང་མདངས། །
གཏན་དུ་ཡིད་ངོར་འཆར་བའི་བྱམས་ལྡན་གྱི་ཨ་མ། །
ནང་སེམས་དགའ་སྐྱོ་འཐབ་པའི་འཇིག་རྟེན་གྱི་གནས་ནས། །
བརྩེ་བའི་རླབས་ཕྲེང་དྭངས་མ་བུ་ཕྲུག་ལ་གནང་བའི། །
དྲིན་ཆེན་ཨ་མའི་སྐུ་གཟུགས་པད་དཀར་གྱི་སྡོང་པོ། །
དཀའ་སྡུག་འཁོར་བའི་རྔུལ་ཆུའི་རྒྱུན་ཐག་གིས་བྲན་ཡོད། །
བུ་ཕྲུག་གང་དུ་སོང་ཡང་མིག་ཟུང་གིས་འཚོས་ཤིང་། །
རོ་མཆོག་ཟས་ཀྱི་དྭངས་མ་བུ་ཕྲུག་ལ་སྦྱིན་མཁན། །
དལ་འབྱོར་ལུས་རྟེན་གནང་མཁན་བརྩེ་ཆེན་གྱི་བདག་མོ། །
ལས་དབང་ཟབ་མོས་སྦྲེལ་བའི་སྐྱེ་ལུས་འདིའི་ཡུམ་ཆེན། །
འཇིག་རྟེན་སྲིད་པའི་ཁམས་སུ་འཇམ་པོ་ཡི་ཕྱག་ཟུང་། །
ཆུང་ནས་བརྩེ་བའི་དྲོད་ཁོལ་ཡལ་མེད་དུ་བསྐྱངས་ཤིང་། །
རང་སྲོག་བུ་དང་བརྗེ་བའི་གཏོང་ཕོད་ཀྱི་དཔའ་མོ། །
ཨ་མ་བྱམས་ལྡན་མ་ལོའི་བཀའ་དྲིན་དེ་དྲན་ཡོང་། །
འབྲེལ་ཡོད་གསར་འགྱུར།