དབྱར་གྱི་དྲན་ཤིང་།
གཡུ་ཆུང་།
དབྱར་གསུམ་མེ་ཏོག་གི་མཛེས་སྡུག །
ཡངས་པའི་སྤང་ཐང་དུ་བཞད་དུས། །
རྐང་དྲུག་གཡུ་སྦྲང་གི་གཞོན་ནུ། །
དབྱར་གྱི་དྲན་ཤིང་རང་ཡིན་སོང་། །
སྔོ་ལྗང་རྩི་ཤིང་གི་ལང་ཚོ། །
ཟིལ་པའི་རོ་བཅུད་ཀྱིས་མྱོས་དུས། །
ཟམ་ཟིམ་སྨུག་ཆར་གྱི་བདུད་རྩི། །
དབྱར་གྱི་དྲན་ཤིང་རང་ཡིན་སོང་། །
ཤག་ཤག་ཆར་པ་ཡི་ཐིགས་པ། །
རི་ཀླུང་ཐང་གསུམ་ལ་བྱོ་དུས། །
གཡུ་འབྲུག་སྔོན་མོ་ཡི་སྐད་སྙན། །
དབྱར་གྱི་དྲན་ཤིང་རང་ཡིན་སོང་། །
ཚང་ཚིང་ལྗོན་པ་ཡི་ཚལ་དུ། །
འདབ་ཆགས་གསུང་སྙན་དེ་སྒྲོག་དུས། །
སྙན་འཇེབས་འཇོལ་མོ་ཡི་གྲེ་འགྱུར། །
དབྱར་གྱི་དྲན་ཤིང་རང་ཡིན་སོང་། །
དྭངས་གཙང་ཆུ་མོ་ཡི་ཀློང་དུ། །
ལྡེམ་མྱུར་རྐྱལ་རྩལ་ལ་རོལ་བའི། །
མཛེས་ལྡན་གསེར་མིག་གི་ཉ་མོ། །
དབྱར་གྱི་དྲན་ཤིང་རང་ཡིན་སོང་། །
སྔོ་བསངས་མཁའ་དབྱིངས་ཀྱི་དབུས་སུ། །
བསིལ་རླུང་འཇམ་པོ་ཞིག་ལྡང་དུས། །
སྤྲིན་དཀར་མེ་ཏོག་གི་ཚོམ་བུ། །
དབྱར་གྱི་དྲན་ཤིང་རང་ཡིན་སོང་། །
དབྱར་གཞུང་ལང་ཚོ་ཡི་མཛེས་པ། །
སྐྱེ་འགྲོའི་འདྲེན་བྱེད་ཀྱི་བདུད་རྩི། །
སྤྲོ་དགའི་ཡིད་སེམས་རང་འཁོར་ས། །
རེ་སྒུག་ལོ་ཟླ་ལ་བཅོལ་ཡོད། །
འབྲེལ་ཡོད་གསར་འགྱུར།