འབྲོག་པའི་བུ་མོ།
མཐོ་འབྲིང་སློབ་མ། ཨ་བུ་ཚེ་རིང་།
ཆུ་འཛིན་ལང་ལོང་འཁྲིགས་པའི་རྫ་འདབས་སུ། །
འུར་རྡོ་དགུང་ལ་འཕྱར་བའི་གཤིས་བཟང་མ། །
རྫི་གླུ་ངག་ལ་ལེན་པའི་དབྱངས་ཅན་མ། །
འབྲོག་པའི་བུ་མོ་ཁུ་བྱུག་སྔོན་མོ་ཡིན། །
ཆུ་ཕྲན་གྱ་གྱུར་བཞུར་བའི་ཆུ་གཞུང་དུ། །
ཆུ་ཟོམ་སྐེད་ལ་ཁུར་བའི་ལུས་ཕྲ་མ། །
ནོར་ཕྱུགས་སྒོ་ཁར་བཀྲམ་པའི་ཡིད་འོང་མ། །
འབྲོག་པའི་བུ་མོ་སྦྲ་ནག་བདག་མོ་ཡིན། །
དུ་ཞག་མཁའ་རུ་འཕྱུར་བའི་སྦྲ་ནག་ཏུ། །
འོ་ཞོ་བརྩེ་བས་དཀྲོག་པའི་བཞིན་བཟང་མ། །
དཀར་ཆུའི་ལས་ལ་སྤྲོ་བའི་བརྩེ་ལྡན་མ། །
འབྲོག་པའི་བུ་མོ་མཛངས་མའི་ཁྱུ་མཆོག་ཡིན། །
ཁྲ་ཚོམ་མེ་ཏོག་བརྒྱན་པའི་རྩྭ་ཐང་སྟེང་། །
གཡང་དཀར་ལུག་ཁྱུ་འཚོ་བའི་ཡིད་འཕྲོག་མ། །
ལྡེམ་ལྡེམ་གར་སྟབས་སྒྱུར་མཁས་གར་མཁན་མ། །
འབྲོག་པའི་བུ་མོ་རིགས་བཟང་མཛེས་ལྡན་མ། །
འབྲེལ་ཡོད་གསར་འགྱུར།