ཤར་ཕྱོགས་རི་བོའི་རྩེ་ནས། །

གསེར་གྱི་བང་ཆེན་ཕེབས་བྱུང་། །

ང་ཅག་ཁ་བའི་ལྗོངས་ལ། །

སྲིད་བཟང་གཏམ་སྙན་བསྣམས་བྱུང་། །

ཏང་གིས་དམར་དམག་མངགས་ནས། །

བོད་རྙིང་ལུགས་རྙིང་གཏོར་སོང་། །

ཞིང་བྲན་ཁྲི་ཚོ་བརྒྱ་ལ། །

ཡར་ལངས་བཅིངས་འགྲོལ་ཐོབ་སོང་། །

དུས་རབས་གསར་པའི་ལམ་ཆེན། །

ཞུམ་མེད་རྡོག་པས་བརྫིས་ནས། །

ཕུགས་བསམ་མངོན་འགྱུར་ཆེད་དུ། །

མདུན་ནས་མདུན་དུ་བསྐྱོད་ཡོད། །

ཀྲུང་དབྱང་ལས་དོན་ཉི་ཟེར། །

འཛམ་གླིང་ཡང་རྩེར་འཕྲོས་སོང་། །

དབུལ་སྒྲོལ་ཕྱུག་འགྱུར་མེ་ཏོག །

གངས་ལྗོངས་ས་མཐོར་བཞད་སོང་། །

ཏང་གི་མཛུབ་སྟོན་མ་ལུས། །

སེམས་ལ་བརྟན་པོར་བཅངས་ནས། །

འཆམ་མཐུན་ཤེས་དཔལ་ལྡན་པའི། །

ཕ་ཡུལ་སྐྲུན་པར་ཕེབས་ཤོག །

ཏང་གི་མི་རིགས་སྲིད་ཇུས། །

དྲོ་སྐྱིད་ཉི་མའི་འོད་ཟེར། །

ཕ་ཡུལ་གངས་ལྗོངས་ས་མཐོར། །

བདེ་སྐྱིད་རྩ་བ་ཚུགས་སོང་། །

བོད་རིགས་མི་དམངས་འཚོ་བ། །

དབྱར་མཚོ་རྒྱས་དང་མཚུངས་པ། །

ས་ཕྱོགས་གང་ས་གང་དུ། །

འབྱོར་ཕྱུག་དཔལ་ཡོན་བཞད་འདུག །

ཏང་གི་སྲིད་ཇུས་བཟང་པོ། །

ཉི་ཟླའི་འོད་ལས་ལྷག་པ། །

ཞིང་འབྲོག་མི་དམངས་རྣམས་ལ། །

ཅི་ཟ་ཅི་འཐུང་གནང་བྱུང་། །

ཕྱུགས་རིགས་ཤ་ཤེད་རྒྱས་པ། །

ཤ་མར་ཐུད་གསུམ་འབེལ་བ། །

ཞིང་ལས་ཚན་རྩལ་དྲིན་གྱིས། །

བང་མཛོད་འབྲུ་ཡིས་བཀང་འདུག །

རླངས་འཁོར་མེ་འཁོར་ནང་ནས་། །

དངོས་ཟོག་འདྲ་མིན་དབོར་བྱུང་། །

བོད་རིགས་མི་དམངས་རྣམས་ལ། །

ཟས་གོས་སེམས་ཁྲལ་མི་འདུག །

གངས་ལྗོངས་ས་མཐོའི་ཡུལ་ལ། །

སློབ་གྲྭ་ཆེ་འབྲིང་ཆུང་གསུམ། །

དཔྱིད་ཀྱི་མྱུ་གུ་རྒྱས་བཞིན། །

ས་ཕྱོགས་གང་སར་བསྐྲུན་སོང་། །

སློབ་གསོའི་སྲིད་བཟང་དྲིན་གྱིས། །

བུ་ཕྲུག་སློབ་གྲྭར་གཏོང་བར། །

ཟས་གོས་སྡོད་གསུམ་འགན་ལེན། །

སློབ་ཡོན་རྩ་ཆག་གནང་བྱུང་། །

བོད་རིགས་བུ་ཕྲུག་མ་ལུས། །

ཤེས་རིག་གཤོག་རྩལ་སྦྱོང་བའི། །

བསྐལ་བ་བཟང་པོ་འདི་འདྲ། །

མི་ནུབ་ཏང་གི་བཀའ་དྲིན། །

བློ་རིག་བཀྲ་བའི་བོད་ཕྲུག །

དཀའ་སྤྱད་ཤེས་རིག་སྦྱོངས་དང་། །

ཚན་རིག་ལང་ཚོའི་མེ་ཏོག །

གངས་ལྗོངས་མགུལ་ལ་སྒྲོན་ཤོག །

སྣུམ་གནག་གཞུང་ལམ་སྟེང་དུ། །

རླངས་འཁོར་བྱ་ལས་མྱུར་བ། །

སྔོན་ཆད་རྐང་ལམ་ཕྲ་མོ། །

ག་ལེ་བཞུགས་རོགས་གནང་དང་། །

སྤྲང་ཕྲུག་སྣབས་ལུད་འཛར་འཛར། །

ཤེས་རིག་གཤོག་རྩལ་རྒྱས་ནས། །

བོད་གསར་འཛུགས་སྐྲུན་ཆེད་དུ། །

སྲིད་གྲོས་སྲིད་གླེང་བྱེད་ཀྱིས། །

ཐག་རིང་ལུང་ཁུག་གྲོང་ཚོར། །

སྨན་ཁང་ནད་ཁང་བསྐྲུན་སོང་། །

སྨན་བཅོས་འགན་བཅོལ་སྲིད་བཟང་། །

མི་དམངས་ཡོངས་ལ་ཁྱབ་སོང་། །

ཏང་གི་སྲིད་བཟང་ཉི་འོད། །

གངས་ཅན་ས་གཞིར་འཕྲོས་སོང་། །

བཟོ་ལས་ཡུལ་སྐོར་ཐོན་རྫས། །

ལག་ཤེས་འདྲ་མིན་དར་སོང་། །

གནམ་ལ་མིས་བཟོས་སྲུང་སྐར། །

ས་ལ་མྱུར་བགྲོད་མེ་འཁོར། །

མཚོ་ལ་གྲུ་གཟིངས་སྣ་ཚོགས། །

མེས་རྒྱལ་མངའ་ཐང་རྒྱས་སོང་། །

དཔལ་འབྱོར་དཔལ་འབར་སྒྲོན་མེ། །

གངས་ལྗོངས་ས་མཐོར་འབར་སོང་། །

ཚོང་ཟོག་སྣ་ཁ་འཛོམས་ཤིང་། །

ཉོ་མཁན་དཔུང་གདང་ཤིག་ཤིག །

ནམ་མཁའ་སྔོ་ཞིང་བསངས་ལ། །

ཆུ་མོ་དྭངས་ཤིང་གཙང་བ། །

རི་དྭགས་ཅི་དགར་རྒྱུ་བ། །

སྐྱེ་ཁམས་བཟང་བའི་རྟགས་རེད། །

གངས་ལྗོངས་རི་ཀླུང་གནས་མཆོག །

ཡིད་དབང་འཕྲོག་པའི་ནོར་བུ། །

ཡུལ་སྐོར་འཚང་ཁ་ཤིག་ཤིག །

ཡུལ་མིའི་དངུལ་ཁུག་བརྒྱངས་སོང་། །

གྲོང་དང་གྲོང་གི་བར་ལ། །

ཐོག་བརྩེགས་བ་གམ་བསྐྲུན་སོང་། །

དེང་རབས་ཁྱིམ་ཆས་འདྲ་མིན། །

ཁྱིམ་གྱི་རྒྱན་དུ་གྱུར་སོང་། །

བོད་ལྗོངས་ས་ཆ་གང་སར། །

དྲ་རྒྱའི་བརྡ་རྟགས་ཁྱབ་སོང་། །

གཞུང་ལམ་ཤར་གཏོང་ཐུབ་པས། །

མྱུར་སྐྱེལ་བསྐུར་མ་འབྱོར་བྱུང་། །

བསིལ་ལྗོངས་རི་བོའི་རྩེ་ལ། །

གློག་ཤིང་རྡོ་རྗེའི་ཀ་བ། །

གློག་སྐུད་སྡོམ་དྲ་འཐེན་པས། །

གློག་འོད་ཁྲ་ཆིལ་དགུ་ཆིལ། །

ཡར་ཀླུང་གཙང་པོའི་སྟོད་སྨད། །

མ་དངུལ་དུང་ཕྱུར་བཏང་ནས། །

རླངས་འཁོར་མེ་འཁོར་ཐར་བའི། །

ཟམ་ཆེན་བརྒྱ་ཕྲག་བསྐྲུན་སོང་། །

ཡར་ཀླུང་གཙང་པོའི་གཡས་གཡོན། །

རྩི་ཤིང་ལྗོན་ཤིང་བཏབ་པས། །

སྔོན་ཆད་བྱེ་རླུང་འཇགས་ཤིང་། །

སྔོ་ལྗང་ནགས་སུ་གྱུར་སོང་། །

བྲག་རི་གཡང་གཟར་བཤགས་ནས། །

ཕུ་ཆུ་མདའ་ལ་དྲངས་སོང་། །

ཞིང་ཐང་སྐྱ་མོའི་དབུས་ནས། །

སྙེ་མས་མགོ་ལྕོག་ལྡེམ་ལྡེམ། །

ཕུ་ལ་ཆུ་རྫིང་བསྐྲུན་སོང་། །

དྭངས་གཙང་ལྷད་མེད་ཆུ་མོ། །

རིལ་རིལ་སྦུ་གུའི་ནང་ནས། །

ཆུ་ཟོམ་ནང་ལ་དྲངས་སོང་། །

གནམ་གྲུ་མཁའ་ལ་འཕུར་སོང་།། །

མེ་འཁོར་བྱ་ལྟར་མྱུར་བ། །

འགྲིམ་འགྲུལ་པ་ཊའི་རི་མོ། །

གངས་ལྗོངས་ཡུལ་ལ་བྲིས་སོང་། །

ཁེ་གཉེར་སྲིད་བཟང་དྲི་བཞོན། །

གངས་ལྗོངས་ས་མཐོར་ལྡང་སོང་། །

སྒོར་མོ་དུང་ཕྱུར་ལོན་པའི། །

རྩེར་སོན་ཁེ་ལས་འཁྲུངས་སོང་། །

ཏང་གི་དབུ་ཁྲིད་མེད་ན། །

བོད་ལྗོངས་མི་དམངས་རྣམས་ལ། །

བདེ་སྐྱིད་འཚོ་བ་གསར་པ། །

འདི་འདྲ་ཐོབ་ས་མ་རེད། །

རྒྱ་བོད་མི་རིགས་མཛའ་མཐུན། །

སྔོན་མོའི་ཆུ་ལས་རིང་བ། །

གཅིག་ཕན་གཅིག་རོགས་གསེར་ཟམ། །

ཁ་བའི་ཡུལ་ལ་བསྐྲུན་ཡོད། །

བདེ་སྐྱིད་རྫོགས་ལྡན་དུས་འདིར། །

ཐོག་མའི་བསམ་འདུན་བཟང་པོ། །

སེམས་ལ་བརྟན་པོར་བཅངས་ཏེ། །

ཕ་ཡུལ་སྐྲུན་པར་རེམས་ཤོག །