ཁྱེད་ཀྱི་འཁྲུངས་སྐར་ལ་བཀྲ་ཤིས་བདེ་ལེགས་ཞུ།
སྤྱི་ཚོགས་འཕེལ་རྒྱས་ཆ་འཕྲིན་ཁྱེད་ལས་གསལ། །
དེང་རབས་འཚོ་བའི་འཕོ་འགྱུར་ཁྱེད་ལས་མངོན། །
ཁྱེད་ནི་ང་ཚོའི་དུས་རབས་གསར་པ་འདིའི། །
མིག་གི་ལྟ་ཡུལ་རྣ་བའི་ཉན་ས་ཡིན། །
སྲིད་ཇུས་བཟང་པོའི་ཆ་འཕྲིན་ཁྱེད་ལས་གསལ། །
དམངས་ཕན་བྱ་གཞག་མཐའ་དག་ཁྱེད་ལས་རྟོགས། །
ཁྱེད་ནི་བགྲང་བྱ་བདུན་ཅུའི་གངས་ལྗོངས་ཀྱི། །
སྤྱི་ཚོགས་འཚོ་བ་མཚོན་པའི་མེ་ལོང་ལགས། །
གོང་རིམ་གནས་ཚུལ་མཚོན་པའི་གསར་འགྱུར་དང་། །
དམངས་ཀྱི་འཚོ་བའི་བདེ་སྐྱིད་འཕེལ་རྒྱས་སོགས། །
མདོར་ན་དུས་རབས་གསར་པའི་རྒྱལ་ཡོངས་ཀྱི། །
སྙན་པའི་གཏམ་བཟང་ཆ་འཕྲིན་ཁྱེད་ཀྱིས་བསྣམས། །
ད་དུང་བདག་དང་འདྲ་བའི་ན་གཞོན་ཚོའི། །
སྙན་ངག་མྱུ་གུ་འབུས་སའི་ཞིང་ས་དང་། །
རྩོམ་རིག་གསར་རྩོམ་ལམ་བུའི་ལམ་གྲོགས་ཏེ། །
ཁྱེད་ནི་ང་ཚོའི་སྙན་ངག་འཁྲུངས་གཞིས་ཡིན། །
ཁྱེད་ཀྱི་འདས་སོང་བགྲང་བྱ་བདུན་ཅུའི་ནང་། །
དམངས་ཕན་བྱ་བཟང་ཆ་འཕྲིན་མེ་ཏོག་བཞད། །
དེང་རབས་ཚན་རྩལ་འཕེལ་རྒྱས་མྱུ་གུ་འབུས། །
ཁྱེད་ནི་ང་ཚོའི་འཚོ་བའི་ལམ་གྲོགས་ཡིན། །
ཁྱེད་ནི་མཛེས་སྡུག་ངོ་མཚར་རྩྭ་ཐང་བཞིན། །
སྙན་ངག་མེ་ཏོག་དཀར་དམར་ཁྲ་ཆིལ་བཞད། །
ཚིག་དོན་ཟེའུ་འབྲུ་བཅུད་ལྡན་འབྲས་བུ་སྨིན། །
ཁྱེད་ཀྱི་ལང་ཚོ་དར་ཞིང་རྒྱས་པར་ཤོག །
ཁྱེད་ནི་བོད་ལྗོངས་ཉིན་རེའི་ཚགས་པར་ཞེས། །
སྙན་པའི་གྲགས་པ་གང་སར་ཁྱབ་དུས་འདིར། །
ཁྱེད་དང་རྩོམ་སྒྲིག་ཁང་གི་ལས་མི་ཚོར། །
སེམས་ཀྱི་གཏིང་ནས་བཀའ་དྲིན་ཆེ་ཞེས་ཞུ། །
འབྲེལ་ཡོད་གསར་འགྱུར།