ཆུ་མོ་མར་འགྲོ་ཞིག་ལ། །

བརྩེ་འཕྲིན་དམར་པོ་བསྐུར་ཡོད། །

མཛའ་གྲོགས་བརླིང་པོ་ཞིག་ལ། །

བློ་སེམས་བརྟན་པོར་གཏད་ཡོད། །

སྤྲིན་དཀར་གཡས་འཁྱིལ་ཞིག་ལ། །

འཕྲེང་སེམས་འདུན་མ་བཅོལ་ཡོད། །

འཛུམ་དཀར་ཡིད་འཕྲོག་གཅིག་ལ། །

སྙིང་གཏམ་སྲོང་པོར་བཤད་ཡོད། །

རླུང་བུ་ཁེར་འགྲོ་ཞིག་ལ། །

འཕྲིན་ཡིག་ལན་གསུམ་བསྐུར་ཡོད། །

གཅེས་པའི་སྙིང་སྡུག་གཅིག་ལ། །

ལྷད་མེད་དུང་སེམས་བཅོལ་ཡོད། །

སྟོན་གྱི་སྡོང་ལོ་ཞིག་ལ། །

འཆར་ཡན་སྙན་ཚིག་སྟོར་ཡོད། །

སེམས་སོང་བྱམས་པ་ཞིག་ལ། །

བརྩེ་བའི་དུང་དཀར་ཕུལ་ཡོད། །

ཞོགས་པ་འོད་ཀྱི་ཕོ་ཉར། །

དྲོད་ཀྱི་རྔན་པ་བསྐུར་ཡོད། །

དགའ་བའི་གཤིས་བཟང་ཞིག་ལ། །

སེམས་ཀྱི་ཕྱི་ནང་གཏད་ཡོད། །

ཉི་ནུབ་མཚམས་སྤྲིན་ཞིག་ལ། །

མཛའ་གཞས་ལན་གསུམ་བྲིས་ཡོད། །

སྙིང་སྡུག་དུང་སེམས་ཅན་མས། །

མཉམ་དུ་གསན་རོགས་གནང་དང་། །

ཁུ་བྱུག་མོན་བཞུད་གཅིག་ལ། །

སླར་མཇལ་སྨོན་ལམ་བཏབ་ཡོད། །

མཛའ་མོ་རོགས་ལོ་ཞིག་ལ། །

དྲན་གདུང་སྙན་ངག་བྲིས་ཡོད། །

རྩྭ་འཇག་ཤིག་ཤིག་ཅིག་གིས། །

ཚོར་བའི་ལྡིང་ཁང་བསྐྲུན་ཡོད། །

དྲན་པའི་སྙིང་སྡུག་ལོ་ལོ། །

གང་མགྱོགས་ཕེབས་པར་བསྒུགས་ཡོད། །

བརྩེ་འཕྲིན་དབྱངས་ཀྱི་སྙེ་མར། །

དཀྲིས་པའི་དུང་བརྗོད་ལྷད་མེད། །

ངག་རིག་རྒྱན་དང་འགྲོགས་ནས། །

དབྱངས་གསལ་ལམ་ནས་སྤྲིངས་ཡོད། །