གངས་རིའི་སྐོར་ལམ་ནང་དུ། །

རྔུལ་ཆུ་ཨོག་མར་འཁྲིལ་བྱུང་། །

ཞང་ཞུང་བུ་མོའི་འཛུམ་གྱིས། །

ངལ་དུབ་རང་སར་ཞི་སོང་། །

མགོ་རས་ཁྲ་ཁྲའི་འོག་གི །

སྤྱན་མིག་ཀྲི་ག་ཤིག་ཤིག །

ང་ལ་ཟུར་མིག་གནང་ནས། །

ག་རེ་ལབ་དགོས་བསམས་བྱུང་། །

སྐེའུ་དམར་པོའི་ཐོག་གི །

མཆུ་སྒྲོས་པད་མ་འདབ་བརྒྱད། །

ཕིག་ཙམ་ཕིག་ཙམ་མ་གནང་། །

བཀའ་མོལ་ཡོད་ན་གསུངས་དང་། །

མཛེས་པའི་སྨན་ཆུང་བུ་མོ། །

གར་དང་ཤོན་ལ་ཕེབས་དང་། །

གཡས་ཀྱི་སྒ་ལེབ་མཛེས་པོ། །

ལྷུངས་ཀྱང་ང་རས་སྒྲུག་ཆོག །

བྲང་གི་བྱུ་རུ་སྤོས་ཤེལ། །

གནམ་གྱི་སྐར་ལས་མང་བ། །

ང་རང་སྐར་ཚོགས་ཁྲོད་ཀྱི། །

པ་སངས་ཡིན་ན་བསམས་བྱུང་། །

ཕྱུར་པ་རྒྱ་ཁྲ་སྨུག་ཆུང་། །

དཀྱིལ་ནས་གཤགས་པ་མཐོང་དུས། །

ང་ཡི་མིག་ཆུང་ཕྲ་མོ། །

ཅུང་ཟད་སྐྱེངས་ཀྱང་སྐྱེངས་སོང་། །

གཡང་ལུགས་མཆོར་པོའི་རྒྱབ་གཟུགས། །

སུ་ལ་ངོམ་མཁན་ཡིན་ནམ། །

ཕྱིར་བལྟས་ཡང་ཡང་བསློགས་ནས། །

ཅི་ཞིག་གང་ལ་ལུས་སོང་། །

སྒྲོལ་མ་ལ་འགོའི་རྩེ་ནས། །

དམ་བཅའ་བཞག་ཆོག་གསུང་གིས། །

ཆང་ས་བརྒྱབ་ཚར་ཞུས་པས། །

མཆི་མས་གཡས་སྐོར་བརྒྱབ་སོང་། །

རྐང་ལྷམ་འཇའ་རིས་ཤིག་ཤིག །

མཉམ་འགྲོ་མཉམ་འདུག་རེད་ཤག །

དགའ་རོགས་ཚེ་རོགས་གཉིས་པོ། །

རྐང་ལྷམ་ཡིན་ན་དགའ་བ། །

གླིང་བུ་གཏོང་གིན་གཏོང་གིན། །

རྩམ་པ་མ་འགམས་གསུང་གིས། །

རྩམ་པ་གླིང་བུ་གཉིས་པོ། །

འགམ་རེས་གཏོང་རེས་བྱས་ཆོག །

སྐྱིད་པོའི་དར་ཆེན་གཞུང་ནས། །

ག་ལེར་བཞུགས་ཨང་ཞུས་པས། །

ཁོམ་དུས་ཁ་པར་ནང་ནས། །

དུས་ཆད་བཏབ་ཆོག་གསུངས་བྱུང་། །