རྣམ་དཔྱོད་རིག་པའི་རྣོ་དབལ་ལྡན་པ་གང་། །

ཀུན་གྱིས་བཀུར་ཞིང་གཞན་ལ་ཕན་པར་གཞོལ། །

རྨོངས་པའི་བློ་རིག་ལྡོངས་པའི་གང་ཟག་ཉིད། །

གཞན་གྱིས་སྤངས་ཤིང་རང་དོན་གཙིཊ་སུ་འཛིན། །

ཤེས་རབ་འཛོམས་པ་ཐོས་བསམ་ནམ་མཁའི་མཐའ། །

བློ་གྲོས་གཤོག་ཟུང་བསྟེན་ལ་མི་ངལ་ཞིང་། །

རྨོངས་པའི་གཏི་མུག་ཅན་དེ་ལེ་ལོའི་དབང་། །

ཉོན་མོངས་དགྲ་དང་བདེ་མོའི་མལ་ལ་ཆགས། །

ཤེས་རབ་ལྡན་ན་ཆོས་ཀུན་བློ་མིག་གསལ། །

སྤངས་བླངས་འཇུག་ལྡོག་རྒྱ་མཚོའི་ཕ་མཐའ་དཔོག །

རྨོངས་པའི་དྲི་ཅན་མ་རིག་མུན་ཁམས་སུ། །

འཁོར་བའི་སྡུག་གི་ས་མཚམས་གཞལ་ཡོད་མིན། །

ཤེས་རབ་ལྡན་ན་རྒུད་པའི་སར་ལྷུངས་ཀྱང་། །

གཞན་གྱི་ཡོན་ཏན་ཆུང་ངུ་ལེན་པར་བྱེད། །

རྨོངས་པའི་སྐྱེ་བོ་ཕུན་ཚོགས་ཟང་ཟིང་གིས། །

ཅུང་ཟད་དར་ཚེ་ང་རྒྱལ་ཁེངས་པས་ཚིམས། །

དམ་པས་རྒྱ་མཚོ་ནོར་བུའི་གླིང་མཆོག་ཏུ། །

རིག་པའི་དེད་དཔོན་འཚོལ་ལ་ཉེར་ལེན་བགྱིད། །

བླུན་པོས་སྣང་བ་རྨོངས་པའི་སྟོང་དབྱིངས་ལ། །

འབྲས་མེད་སྐས་འཛེག་འཛུགས་པའི་ལས་ལ་སྤྲོ། །

ཤེས་རབ་ལྡན་ན་འཇིག་རྟེན་མི་བུ་ཀུན། །

མ་བསྡུས་པར་ཡང་ངང་གིས་འཁོར་ལ་རིངས། །

རྨོངས་པའི་སེམས་ཅན་ལ་ནི་སྐྱེ་འགྲོ་ཡིས། །

རྒྱང་ནས་སྨོད་ཅིང་མཐུན་པར་མི་འགྱུར་རོ། །

ཤེས་རབ་རྨོངས་པའི་རྣམ་གཞག་ཉུང་བསྡུས་འདི། །

རང་བློ་ཚད་མས་བརྗོད་པར་མི་ནུས་མོད། །

རང་དང་མཉམ་པའི་བློ་ལྡན་བུང་བ་ལ། །

ཉན་སྐུལ་གྲོས་སུ་འཕྲལ་མར་ཕུལ་བ་དགེ །