བརྩེ་མཐུན་རོགས་ལོ།
བརྩེ་བ་སེམས་ཀྱིས་བསྐྱངས་ན། །
ལུས་སེམས་སྐྱིད་ལ་འཁོད་ཡོང་། །
མེ་ཏོག་ཆུ་ཡིས་གཉོར་ན། །
འདབ་ལོར་མཛེས་སྡུག་བཀྲ་ཡོང་། །
མཚན་གྱི་སྒེའུ་ཁུང་འཁྲིས་སུ། །
དཀར་གསལ་ཟླ་བ་འཕྲོ་དུས། །
ཞེ་འདྲིས་སྙིང་གི་བྱམས་པ། །
མཇལ་བའི་སྣང་བ་རྩེན་བྱུང་། །
བྱམས་པ་བྱམས་པ་ཟེར་ན། །
ཚེ་ཡི་གྲོགས་ཤིག་ཡིན་དུས། །
མི་ཚེ་མ་རྫོགས་བར་དུ། །
བྱམས་པ་ཁྱོད་དང་རོལ་ཡོད། །
བྱམས་པའི་ལས་འཕྲོ་དམར་པོ། །
ང་ཡི་སྙིང་ཁར་ཟུག་བྱུང་། །
མི་ཚེ་རིང་ཐུང་འགྲོགས་ཏེ། །
དགའ་སྐྱོ་མཉམ་དུ་རོལ་འགྲོ །
ཚེས་ཆེན་བཅོ་ལྔའི་ཟླ་བ། །
དེ་འདྲའི་དཀར་གསལ་དོད་པ། །
སྙིང་ནས་འདྲིས་པའི་བྱམས་པ། །
ཡིད་ཁར་ཡང་ཡང་འཁོར་བྱུང་། །
སྟོན་རླུང་བསིལ་བསིལ་ལྡང་བྱུང་། །
སེར་ཆེན་འདབ་མ་འཐོར་སོང་། །
ང་དང་བྱམས་པའི་བརྩེ་བ། །
རྡོ་རྗེ་བྲག་ལས་བརྟན་པ། །
འབྲེལ་ཡོད་གསར་འགྱུར།