ཞལ་རས་ཆུ་སྐྱེས་ཀྱི་དཔལ་ཡོན། །

མི་ཚོགས་གར་སྟེགས་ནས་ངོམས་སོང་། །

མགྲིན་བཟང་ཁུ་བྱུག་གི་དབྱངས་རྟ། །

མི་ཚོའི་རྣ་དབང་དེ་གསོས་འདུག །

ཡིད་འོང་འཛུམ་ཞལ་དེ་མཚར་ཞིང་། །

དམའ་བའི་གཤིས་ཀ་རེ་སྟོན་བཞིན། །

ཁྲོམ་ཆེན་གར་སྟེགས་ཀྱི་དབུས་ནས། །

གླུ་ཡི་མཆོད་པ་ཞིག་བཤམས་སོང་། །

གླུ་གར་རྒྱ་མཚོ་ཡི་ཀློང་ནས། །

མཛེས་མའི་རྣམ་པ་རེ་མཐོང་ལ། །

སྙན་པའི་གྲེ་འགྱུར་གྱི་ངག་གིས། །

མི་ཚོགས་ཡིད་དབང་ནི་བཀུག་འདུག །

གསར་སྐྱེས་གླུ་མ་ཞིག་ཡིན་ཡང་། །

གླུ་དབྱངས་ལེན་པ་ལ་མཁས་ཤིང་། །

ཞལ་རས་པད་མ་ཡི་རང་མདངས། །

མཐོ་སྒང་གཞས་མ་ཁོང་མཚར་བ། །

ཞལ་སྒོ་མཛེས་པ་ཡི་ལང་ཚོས། །

ཕོ་བརྒྱའི་ཡིད་དབང་ནི་བཀུག་ཅིང་། །

རྣ་བར་འཇེབས་པ་ཡི་གྲེ་འགྱུར། །

འཇོལ་མོའི་གསུང་དང་ནི་འགྲན་ནུས། །