ས་མཛེས་ཤིང་སྡུག་པའི་ཕ་ཡུལ་ན། །

གུར་ཆེ་ཆུང་གཉིས་ཀ་ཁྲ་ལམ་ལམ། །

སྐྱིད་ཁང་གསར་སྒེའུ་ཁུང་འོད་འཚེར་འཚེར། །

རྩྭ་ལྗང་ལོའི་མགོ་ལྕོག་ལོས་ལྡེམ་ལྡེམ། །

ཤིང་ཤུག་པའི་དྲི་ཞིམ་ཐུ་ལུ་ལུ། །

གནས་ཕ་ཡུལ་གཡུ་ཡི་ལུང་པ་ན། །

ཆུ་གཙང་པོའི་བཞུར་རྒྱུན་དྭངས་ཁྲུམ་ཁྲུམ། །

ལུག་གཡང་དཀར་འབའ་སྒྲ་སྙན་ལྷང་ལྷང་། །

འབྲི་ཐུལ་མའི་ངུར་སྐད་ངུར་རུ་རུ། །

དེ་འཚོ་བའི་རྫི་བོ་འཛུམ་དམུལ་དམུལ། །

སྐྱིད་ཕུན་སུམ་ཚོགས་པའི་ཕ་ཡུལ་ན། །

དབྱར་དགའ་སྟོན་འདུ་འཛོམས་འུར་ཐིང་ཐིང་། །

སྡེ་ཁྲོམ་ཆེན་དགོད་སྒྲ་དི་རི་རི། །

སེམས་རང་མཐུན་སྙིང་གྲོཊ་དལ་ལྷོད་ལྷོད། །

སྐྱེས་ཕོ་གཞོན་མོ་གཞོན་སྐྱིད་ལྷང་ལྷང་། །

གཡང་མཚོ་མོ་འཁྱིལ་འདྲའི་ཕ་ཡུལ་ན། །

དཀར་འོ་མ་སྣོད་ན་ལྟེམ་ཤག་ཤག །

བཅུད་ཆེ་བའི་འབྲི་མར་སེར་ཁྲིག་ཁྲིག །

བྲོ་ཞིམ་པའི་འབྲི་ཞོ་དཀར་ཤག་ཤག །

ཟས་མཆོག་གྱུར་ཤ་ཚིལ་སྣུམ་ཚིལ་ཚིལ།

ཡུལ་ཁྱད་འཕགས་ཅན་གྱི་ཕ་ཡུལ་ན། །

ནོར་ལོངས་སྤྱོད་གཅིག་ལས་གཅིག་རྒྱས་རྒྱས། །

དྲང་ལྷད་མེད་མི་གཤིས་མདའ་འདྲོང་འདྲོང་། །

ལུཊ་ཚུལ་མཐུན་སྲོལ་བཟང་རབ་དར་དར། །

དགེ་གཞན་ཕན་ལྷག་བསམ་ཡོད་ཤག་ཤག །