ཁྱེད་རང་། མཚར་སྡུག་གིས་སྤུད་པའི་མེ་ཏོག་ཅིག

ལང་ཚོའི་སྡུ་གུ་བཀྲ་བའི་མེ་ཏོག་ཅིག

བདག་ཡིད་ཀྱི་དབྱར་གཞུང་དུ་བརྗིད་ཀྱིས་བཞད།

ཁྱེད་རང་། ཕྱི་ཐག་གི་བཞུར་རྒྱུན་རིང་བའི་གཙང་པོ་ཞིག

ཁྲེལ་གཞུང་གི་རླབས་རིས་བརྟན་པའི་གཙང་པོ་ཞིག

བདག་སེམས་ཀྱི་ས་གཞི་རུ་ལྷོད་ཀྱིས་འབབ།

ཁྱེད་རང་མེད་ན།

བདག་གི་དུང་ཞེན་གྱི་མེ་ལྕེ་གང་ནས་མཆེད།

བདག་གི་དཀའ་སྡུག་གི་མིག་ཆུ་སུ་ཡིས་འབྱིད།

བདག་གི་སྙན་ངག་གི་བརྗོད་བྱ་སུ་ཡིས་བྱེད།

ཁྱེད་རང་ཡོད་པས།

བདག་གི་མི་ཚེ་ལ་སྙིང་པོ་ཡོད།

བདག་གི་འཚོ་བ་ལ་ཁ་དོག་ཡོད།

བདག་གི་ནང་སེམས་ལ་དྲོད་ཁོལ་འཁྱིལ།

དེ་བས། མཛེས་འཛུམ་གྱིས་ཕྱུག་པའི་ཁྱེད་རང་།

གཡོ་ལྷད་དང་བྲལ་བའི་ཁྱེད་རང་།

བདག་གི་འཇིག་རྟེན་ཁམས་སུ་རྟག་ཏུ་བཞུགས་རོགས།