དབྱངས་ལ་བརྒྱུས་པའི་བརྩེ་མགུར།
ཁྲ་ཆུང་མིག་ཟུང་ནང་གི །
འཛིན་བྱེད་བརྩེ་བའི་ལྕགས་ཀྱུས། །
གཞོན་པའི་སེམས་ཀྱི་ཉ་ཆུང་། །
ཡང་ནས་ཡང་དུ་འཛིན་སོང་། །
གསེར་གྱི་མཛུབ་དཀྲིས་སྟེང་དུ། །
མུ་ཏིག་ཕྲ་རྒྱན་བཏབ་ཡོད། །
བྱམས་པ་མ་བཟང་བུ་མོས། །
མཛུབ་མོའི་རྒྱན་དུ་བཞེས་རོགས། །
དྲན་གདུང་མུན་པའི་སྨག་གིས། །
སེམས་ཀྱི་རི་གྲོང་བསྒྲིབས་སོང་། །
དཀར་གསལ་བཅོ་ལྔའི་ཞལ་རས། །
ཡུན་དུ་རེ་བས་སྒུག་ཡོད། །
དྲི་ཞིམ་སྐྲ་ཆུན་ལྷས་མ། །
རླུང་བུས་སྒུལ་བ་མ་གནང་། །
བཞིན་བཟང་པད་དཀར་ལང་ཚོ། །
སྤྲིན་གསེབ་ཟླ་བཞིན་མོག་འགྲོ །
རབ་དཀར་སྤྲིན་གྱི་རླབས་ཕྲེང་། །
གཡུ་མདོག་ནམ་མཁར་རྒྱུ་དུས། །
མུ་ཏིག་བསྟར་ལ་བརྒྱུས་འདྲའི། །
བྱམས་པའི་སོ་དཀར་དྲན་བྱུང་། །
ན་ཚོད་དར་ལ་སྨིན་ཡང་། །
མཇལ་འཕྲད་སྐུད་པ་ཕྲ་སོང་། །
འཇིག་རྟེན་ཆེ་བས་མ་རེད་། །
ལས་འཕྲོ་མེད་པས་ལན་སོང་། །
ཉི་ཟླའི་འཆར་ནུབ་བར་ནས། །
མི་ཚེའི་དར་ལྕོག་ཟད་དུས། །
རྨི་ལམ་རྐུ་མཁན་ཆུང་གྲོགས། །
གཞས་ཀྱི་དབྱངས་རྟར་འཚོས་ཡོད། །
ཟིལ་པ་ཁུར་བའི་མེ་ཏོག །
སྙིང་ལ་ཟམ་ཟིམ་བབས་ཀྱང་། །
འཐོག་པའི་སྙིང་རུས་མེད་པས། །
ཕྱི་མིག་ཁྲོད་དུ་ལུས་སོང་། །
དྲན་གདུང་བརླན་གྱིས་བཟུང་བའི། །
སེམས་ཤོར་མེ་ཏོག་ལྡུམ་རར། །
བརྩེ་བ་རུམ་གང་ཁུར་ཏེ། །
གོམ་ཁ་སྒྱུར་བར་ཐལ་སོང་། །
ལྔ་གསུམ་ཟླ་བའི་ལང་ཚོར། །
འཁྲེང་སེམས་སྐར་མས་བསྐོར་བའི། །
མཁུར་ཚོས་དམར་བའི་བུ་མོ། །
ན་ཚོད་ཡལ་རྒྱུ་མེད་འདྲ། །
མཚོ་མཐའི་བྱེ་མའི་འགྲམ་ངོགས། །
དུང་བརྗོད་ཚིག་གི་རི་མོ། །
སོར་མོའི་གར་དང་འགྲོགས་ནས། །
བུ་མོའི་སྤྱན་དུ་བསྟར་ཡོད། །
རིང་ནས་འཛུམ་པ་མ་གནང་། །
ཞེན་ཆགས་གཙང་པོ་སྒུལ་འགྲོ །
དུང་ཞེན་བསུ་ཆང་བཏེགས་ན། །
གནམ་སའི་བར་ཐག་མི་འདུག །
མདངས་དཀར་མུ་ཏིག་ཕྲེང་བ། །
མགྲིན་པའི་རྒྱན་དུ་དབང་ན། །
ནོམ་ཆེན་ཤེལ་དཀར་ཕྲེང་མཛེས། །
ཁྱེད་ལ་འབུལ་དགོས་ལས་རེད། །
དུང་ཞེན་རི་མོ་བཀྲ་བའི། །
སེམས་ཀྱི་དངུལ་དཀར་མེ་ལོང་། །
ན་ནིང་བརྩེ་འདང་ཆེ་རུང་། །
ད་ལོར་གས་ཆག་ཤོར་སོང་། །
རྒྱ་ལྕང་ལྷགས་པས་གདུང་ན། །
ལོ་མར་སེར་ཀ་ཐེབས་ཡོང་། །
ཡིད་ཀྱི་ལོ་མ་ལྗང་གུ །
ནམ་ཡང་སེམས་སུ་ཉར་འདོད། །
དཔྱིད་གསུམ་ཀོང་པོའི་ཡུལ་དུ། །
ཕ་ཡུལ་དྲན་པ་མེད་ཀྱང་། །
ཆུང་གྲོགས་རྩེད་རོགས་དགོད་རོགས། །
སྙིང་ནས་བརྗེད་པ་མི་འདུག །
ཆུང་དུས་རྩེད་ར་གྲུ་བཞི། །
འདང་བརྩེ་གཡུང་དྲུང་རི་མོ། །
ཚིག་གིས་སྟོན་ཐབས་མེད་རུང་། །
སོ་སོའི་སེམས་སུ་གསལ་ཡོད། །
སྐར་མ་ཁྲ་ཆིལ་དགུ་ཆིལ། །
དགུང་སྔོན་དབྱིངས་སུ་ཤར་དུས། །
ཡིད་མཁར་འཚེར་བའི་སྨིན་དྲུག །
སྙིང་ནས་ཡང་ཡང་དྲན་བྱུང་། །
ལུས་ཀྱི་ཤ་བ་ཕོ་རྐྱང་། །
དབེན་པའི་རི་ལ་བྲོས་སོང་། །
ཞེན་ཆགས་སུག་རྗེས་རི་མོ། །
རྔོན་པའི་མིག་ནང་ལུས་འདུག །
བུང་བ་མེ་ཏོག་ཆགས་པ། །
མེ་ཏོག་བུང་བར་སྒུག་པ། །
བསམས་ན་སེམས་པ་སྨྲེང་ཞིང་། །
མཐོང་ན་སྙིང་དུ་སྡུག་པ། །
ལང་ཚོ་སྨིན་ཐག་ཆོད་པའི། །
དྲི་ཞིམ་བསྣམས་པའི་མེ་ཏོག །
བདག་པའི་སྐུ་བསོད་མེད་རུང་། །
སེམས་ནས་བརྗེད་ཐབས་མི་འདུག །
ཆུ་མོ་དྭངས་གཙང་ཞིག་ལ། །
མིག་གི་ཀོ་གྲུ་བཏང་ཡོད། །
འཛུམ་དཀར་རླབས་རིས་ཤིག་ཤིག །
བསུ་ཆང་ཚུར་ལ་དྲངས་བྱུང་། །
འདབ་དྲུག་ཁ་བའི་ཞབས་རྗེས། །
ཕྱི་ནང་གང་སར་འཇོག་དུས། །
དུང་སེམས་འོ་མ་འདྲ་བའི། །
སེམས་མཐུན་མི་དག་དྲན་བྱུང་། །
ཕོ་བརྒྱའི་མིག་གི་ཟླ་བ། །
སྨན་ཤར་དབུས་ཀྱི་ཡང་ཏིག །
སྐྱེ་འབྲས་མཚར་བའི་མི་དེ། །
ཨོ་ལོའི་ཡིད་ཀྱི་དྲན་ཤིང་། །
ཁྲ་ཆིལ་མེ་ཏོག་འབུས་པའི། །
ཡིད་འོང་ཁམ་བུའི་སྡོང་པོར། །
སྔ་དགོང་མཚམས་སྤྲིན་རྒྱུ་དུས། །
དྲན་པའི་བྱ་ཁྱུ་འཕྱན་འགྲོ །
འབྲེལ་ཡོད་གསར་འགྱུར།