ཆུ་ཁར་རླབས་ཀྱི་གཉེར་རིས་དལ་གྱིས་གཡོ། །

སྐབས་སྐབས་ཉ་མོའི་གཞུག་ལྕག་ཐག་སྒྲ་སྒྲོག །

ཆུ་བྱ་སྐེ་རིང་རེ་ཡང་མགྲོན་དུ་བྱོན། །

ད་ནི་ལྷིང་འཇཊ་དེ་འདྲ་གང་ནས་འཚོལ། །

རྫ་རི་གཡའ་སྤང་གང་སར་གནས་མལ་བཅས། །

རི་ཆུ་ས་རྡོ་ཀུན་ལ་བློ་གཏད་བཅོལ། །

ལུག་ཁྱི་དོམ་ནག་སྙིང་དཀར་གྲོཊ་སུ་བསྟེན། །

དྲན་པ་དེ་ཚོ་བརྗེད་ན་ཕངས་པ་ལ། །

ཉི་མ་ནུབ་རིའི་ཕག་ཏུ་བྱོན་ལ་ཁད། །

གྲིབ་སོ་སྒོ་རའི་ཐང་དུ་ལྷུང་ལ་ཁད། །

འགྲུལ་པ་ཡར་འགྲོ་བརྒྱ་དང་མར་འགྲོ་སྟོང་། །

མུ་མཐུད་ཨ་མར་སྒུག་པའི་ཉིན་མོ་གཅིག །

ནོར་ལུག་མང་ཡང་མི་མང་བརྒྱ་ཚོ་ཙམ། །

ཞིང་ཐང་ཆེ་ཡང་མི་ཆེ་བཅུ་ཚོ་ལྷག །

དབུལ་ཡང་མི་དབུལ་ཕྱུག་ཀྱང་མི་ཕྱུག་པའི། །

ས་མ་འབྲོག་གི་ས་དེ་ལྷག་པར་དྲན། །

ཕོ་ལོ་བཞི་བཅུའི་ཐེམ་སྐས་ཡུད་ཀྱིས་བརྒལ། །

འདི་སྣང་འཚོ་བའི་སྐྱིད་སྡུག་རེས་སུ་འཁོར། །

ས་ཐག་རྒྱང་བའི་ཕ་ཡུལ་ལུང་ཁུག་གང་། །

ཡང་ཡང་ཡིད་ལ་དྲན་དེ་སྐྱིད་ཅིག་རེད། །