“ཨ་ལད་པད་གོག་དེར་གཡོགས་པ་ནི་བོད་ཀྱི་སྲོལ་རྒྱུན་གྱོན་ཆས་རེད་དམ”ཞེས་ཨ་ཟེར་བྷེ་ཇན་གྱི་W& E FORWARDཚོགས་པའི་རྒྱལ་སྤྱིའི་རྣམ་གྲངས་ཀྱི་སྤྱི་ཁྱབ་ལྟ་ཞིབ་པ་Gulnara Zamanovaཡིས་གླེང་སྟེགས་ཀྱི་ཁྱད་ལྡན་ཐོན་ལས་འགྲེམས་སྟེགས་ནས་དགའ་སྤྲོའི་ངང་བོད་བཟོའི་ཨ་ལད་པད་གོག་ཅིག་བླངས་ནས་དེ་ལྟར་དྲིས།

“འདིའི་མིང་ལ‘སྲས་མོ་ཅི་ནཱ’ཟེར་གྱི་ཡོད། དེ་ནི་བོད་ཀྱི་བུད་མེད་ལ་དཔེ་བལྟས་ནས་ཇུས་འགོད་བྱས་པ་ཞིག་རེད། ཁྱེད་ཀྱི་ལག་ཏུ་འཁྱེར་བ་དེ་ནི་ང་ཚོས་ད་ལོ་གསར་དུ་བཏོན་པའི་བཟོ་ལྟ་ཆུང་ཤོས་ཀྱི་ཨ་ལད་པད་གོག་དེ་རེད། དེར་གཡོགས་པ་ནི་ལྷ་སའི་སྲོལ་རྒྱུན་གྱོན་ཆས་ཡིན་པ་དང་མཐའ་ཆགས་ཀྱི་རི་མོ་ཚང་མ་ལག་འཚེམ་བརྒྱབ་པ་ཞིག་རེད”ཅེས་ལྷ་ས་ཁྲེང་ཏུའོ་ཏུའོ་རིག་གནས་བསམ་བཀོད་ཚད་ཡོད་ཀུང་སིའི་ཅིང་ལི་ཁྲེང་ཅོན་གྱིས་འཛུམ་དམུལ་དམུལ་ངང་བཤད་ཅིང་། ཁོང་གིས“ཨ་ལད་པད་གོག་དེའི་མཐོ་ཚད་ལ་ལི་སྨི་15ལས་མེད་པས་ཁུག་མའི་ཐོག་བཏགས་ན་ཧ་ཅང་འཚམ་པོ་འདུག”ཅེས་བཤད།

“ད་བྱས་ན་ངར་གཅིག་འཚོང་རོགས” Gulnara Zamanovaཡིས་དངུལ་སྤྲད་རྗེས་ཨ་ལད་པད་གོག་དེར་ཡང་ཡང་ལྟ་བཞིན་དུ“ད་ཐེངས་ངས་ཉིང་ཁྲི་གྲོང་ཁྱེར་སྨན་རྩིས་ཁང་དུ་ལུམས་བཅོས་ཉམས་ལེན་བྱས་པ་ཡིན། དེ་རིང་ཡང་མི་རིགས་ཀྱི་ལག་ཤེས་ཐོན་རྫས་སྙིང་རྗེ་མོ་ཞིག་ཉོ་རྒྱུ་རག་བྱུང་། བོད་ཀྱི་རིག་གནས་ཀྱིས་ངའི་ཡིད་དབང་འཕྲོག་སོང་། གོ་སྐབས་བྱུང་ཚེ་སླར་ཡང་བོད་དུ་ཡོང་ངེས་ཡིན”ཞེས་བཤད།

ཉེ་བའི་ལོ་ཤས་རིང་། བོད་རང་སྐྱོང་ལྗོངས་ཀྱི“མངོན་མིན་རིག་གནས་ཤུལ་བཞག”གི་ཐོན་རྫས་སྣ་ཚོགས་ཕྱིའི་རྒྱལ་ཁབ་ཁག་ཏུ་འགྲེམས་སྟོན་ནང་ཞུགས་ནས་སྤེལ་རེས་བྱས་པ་དང་། Gulnara Zamanovaདང་འདྲ་བར་བོད་ཀྱི་རིག་གནས་ལ་དགའ་པོ་བྱེད་མཁན་ཕྱི་རྒྱལ་གྱི་གྲོགས་པོ་མང་དུ་སོང་ཡོད། ཤུགས་རྐྱེན་དེ་འདྲ་ཐེབས་དོན་ནི་བོད་ཀྱི་མངོན་མིན་རིག་གནས་ཤུལ་བཞག་གི་ཉིན་རེ་བཞིན་མངོན་གསལ་དོད་དུ་འགྲོ་བའི“ཐོན་སྐྱེད་ནུས་ཤུགས”ལས་བྱུང་བ་ཞིག་རེད།

ད་ཆ་མངོན་མིན་རིག་གནས་ཤུལ་བཞག་ནི་རིག་གནས་མཚོན་རྟགས་ཙམ་མིན་པར་འཛམ་གླིང་གིས་བོད་ཤེས་རྟོགས་བྱེད་པའི“སྐར་ཁུང་དང་མིང་བྱང”དང་ས་གནས་དེ་གའི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་སྐུལ་འདེད་གཏོང་བའི་སྒུལ་ཤུགས་ཤིག་ཀྱང་ཡིན་པ་སྟེ། ལྷ་རིས་པའི་མངགས་ཐོའི་ཡོང་འབབ་མང་དུ་ཕྱིན་པ་དང་། སྲོལ་རྒྱུན་གྱི་སྣམ་བུར་བརྟེན་ནས་བྲིན་ཁ་རྒྱུག་པའི་རིག་གནས་བསམ་བཀོད་ཐོན་རྫས་བཟོས་པ། “སྲས་མོ་ཅི་ནཱ”དེ་ཨ་ལད་པད་གོག་ཅིག་ནས་རིག་གནས་ཀྱི་IPལ་འཕེལ་རྒྱས་བཏང་བ་ལ་སོགས་པའི“རིག་གནས་རྒྱུན་འཛིན་དང་ཐོན་ལས་ཀྱིས་མཐུན་རྐྱེན་སྦྱོར་བ་ཟུང་དུ་འབྲེལ་བའི”ཐབས་ལམ་བརྒྱུད་མངོན་མིན་རིག་གནས་ཤུལ་བཞག་གི་ལག་ཤེས་དེ་ལས་ཞུགས་ལ་སྐུལ་ཁྲིད་དང་དམངས་འཚོར་ཕན་པའི་ཁ་ཡོད་ལག་ཡོད་ཀྱི་རྒྱུ་ནོར་ཞིག་ཏུ་འགྱུར་བ་བྱས་ནས་དངོས་དངོས་རྗེན་རྗེན་གྱི་དཔལ་འབྱོར་གྱི་རིན་ཐང་མངོན་པར་བྱས་ཡོད།

ས་གནས་དེ་གའི་ཁེ་ལས་པ་བསྟན་འཛིན་ནོར་བུས“ཚན་རྩལ་གྱི་སྒུལ་ཤུགས”སྐོར་ལ་ལན་གསལ་པོ་བཏབ་ཅིང་། ཁོང་གིས“གྲངས་འཛིན་ཅན་གྱི་འཕེལ་རྒྱས་ལས་ཐང་གའི་སྐྱ་རིས་གྲངས་འཛིན་ལམ་ནས་བསྐྱར་འབྲི་ཐུབ་པ་དང་། གཞས་མ་གཏམ་གྱི་སྒྲ་བརྙན་ཡུན་རིང་ཉར་ཚགས་ཐུབ་པ། གཞོན་ནུ་ཚོས་དྲ་ཐོག་ནས་མངོན་མིན་རིག་གནས་ཤུལ་བཞག་ལག་ཤེས་སློབ་སྦྱོང་ཐུབ་པ་སོགས་གྲངས་འཛིན་ལག་རྩལ་གྱིས‘རྒྱུན་འཛིན་པ་ན་རྒས་ཅན་དུ་འགྱུར་བ་དང་ལག་ཤེས་རྒྱུན་འཛིན་པ་ཁ་ཐང་བའི་དཀའ་གནད་བསལ་ཏེ། མངོན་མིན་རིག་གནས་ཤུལ་བཞག་ལ‘ལག་ཤེས་རྙིང་པ་དང་རྣམ་པ་གསར་པའི’གདིང་ཤུགས་བསྣན་ཡོད”ཅེས་བཤད།

མངོན་མིན་རིག་གནས་ཤུལ་བཞག་མུ་མཐུད་དར་སྤེལ་གཏོང་བཞིན་ཡོད་པས་བོད་ཀྱི་མངོན་མིན་རིག་གནས་ཤུལ་བཞག་གི་ལམ་བུ་ཡང་ཇི་ཙམ་སྐྱོད་པ་དེ་ཙམ་གྱིས་ཡངས་སུ་འགྲོ་ངེས་རེད། བོད་ཀྱི་མངོན་མིན་རིག་གནས་ཤུལ་བཞག་ནི་སྔ་ས་ནས་རྟེན་མཛོད་ཁང་གི་འགུལ་མེད་རྣམ་པའི་འགྲེམས་རྫས་ཤིག་མིན་པར་ཤུགས་རྐྱེན་ཐེབས་ཤུགས་དང་། ཐོན་སྐྱེད་ནུས་ཤུགས། གསར་གཏོད་སྒུལ་ཤུགས་བཅས་ལྡན་པའི་གསོན་ཉམས་གཞི་རྒྱུ་ཞིག་རེད། གླེང་སྟེགས་ཐོག་སྐུ་མགྲོན་ཚོས་གྲོས་བསྡུར་བྱས་པ་ལྟར“མངོན་མིན་རིག་གནས་ཤུལ་བཞག་སྐད་གྲགས་ཆོད་པར་བྱེད་པ་ནི་བྱ་ཐབས་ཤིག་ཡིན་པ་དང‘རྒྱུན་འཛིན་ཐུབ་པ’དང‘རྒྱུན་འཛིན་ཡག་པོ་བྱེད་པ’ནི་དམིགས་ཡུལ་གཙོ་བོ་རེད” རིག་གནས་ཀྱི་ཡིད་དབང་འཕྲོག་ཤུགས་དང་། ཐོན་ལས་ཀྱི་གསོན་ཤུགས། ཚན་རྩལ་གྱི་སྒུལ་ཤུགས་བཅས་མཉམ་འདྲེས་བྱེད་བཞིན་དུ་བོད་ཀྱི་མངོན་མིན་རིག་གནས་ཤུལ་བཞག་གིས་རང་ཉིད་ལ་དབང་བའི་སྤུས་ཚད་མཐོ་བའི་འཕེལ་རྒྱས་ཀྱི་ལེའུ་རྩོམ་བཞིན་ཡོད།