ང་ནི་ཁོང་ལ་དགའ།
གཞོན་ནུའི་ལང་ཚོའི་ལྗོན་ཤིང་ལ། །
ལས་སློབ་གཉིས་ཀྱི་ཡལ་ག་རྒྱས། །
ལས་འཕྲོས་དེད་པའི་མེ་ཏོག་བཞད། །
དགའ་གྲོགས་གསེར་སྦྲང་གཞོན་ནུ་ལྡིང་། །
ང་ནི་ཕོ་གསར་ཁོང་ལ་དགའ། །
ཁོང་ནི་སྲོག་སྐྱོབ་སྨན་པ་རེད། །
ཕྱི་ཡི་ལྷ་གོས་དར་ལས་དཀར། །
ནང་གི་ཐུགས་སེམས་བལ་ལས་འཇམ། །
ང་ནི་ཕོ་གསར་ཁོང་ལ་དགའ། །
ཁོང་ནི་དགེ་བའི་བཤེས་གཉེན་རེད། །
ཤེས་བྱ་གསེར་གྱི་སྒྲོན་མེ་ཡིས། །
རྨོངས་པའི་མུན་པ་ཁོང་གིས་སེལ། །
ང་ནི་ཕོ་གསར་ཁོང་ལ་དགའ། །
ཁོང་ནི་དེད་དཔོན་ཆེན་མོ་རེད། །
བརྒྱ་ལོར་པུ་ཏི་བཞིན་དུ་བརྩིགས། །
གཞན་ཕན་བྱ་བ་རླབས་ཆེན་སྒྲུབ། །
ང་ནི་ཕོ་གསར་ཁོང་ལ་དགའ། །
ཁོང་ནི་སྒྱུ་རྩལ་མཁན་པོ་རེད། །
སྐུ་གཟུགས་ལྡེམ་ཞིང་ཞལ་རས་དཀར། །
སྐྱེ་འབྲས་གེ་སར་རྒྱལ་པོ་འདྲ། །
ང་ནི་ཕོ་གསར་ཁོང་ལ་དགའ། །
ཁོང་ནི་ང་ཡི་སྙིང་གྲོགས་ཡིན། །
སེམས་པ་རེ་ལ་བློ་འདོད་རེ། །
བློ་འདོད་རེ་ལ་སྙིང་གྲོགས་རེ། །
འབྲེལ་ཡོད་གསར་འགྱུར།