དབྱར་གྱི་མཛེས་ལྗོངས་ཨེ་མ་མཚར།
སྤྲིན་དཀར་མཁའ་ལ་དལ་གྱིས་རྒྱུ་བ་ན། །
ཕུན་ཚོགས་རྫོགས་ལྡན་དུས་ཀྱི་དཔལ་ནི་མཚར། །
ཀུན་གསལ་སྤྲིན་པའི་རྒྱན་གྱིས་སྤུད་པ་འདིས། །
སྣ་བརྒྱའི་མེ་ཏོག་འཛུམ་པའི་མདངས་ནི་ལྷོད། །
གཙང་ཆུ་རྒྱས་པའི་རླབས་ལ་ཆུ་བྱ་རྩེན། །
རླབས་ཀྱི་གར་ཡང་ཆུ་བྱའི་དབྱངས་དང་བསྟུན། །
ཆུ་ཡི་ཟེགས་མ་གཤོག་རླབས་ཀློང་དུ་ཟིམ། །
སིམ་པའི་བདེ་བས་དུང་ཟླའི་བསིལ་བ་བསྙིལ། །
ཀློང་ཡངས་མཁའ་རུ་ཆུ་འཛིན་མངོན་པར་རྒྱུ། །
དོག་མོའི་ས་གཞིར་སྨུག་སྤྲིན་ལང་ལོང་གཡོ། །
སྤང་ལྗོངས་གཡུ་ཡི་མཎྜལ་བཀོད་པའི་དབུས། །
སེམས་ཀྱི་གཞིས་ཁྱིམ་སུམ་རྩེན་གྲོང་ལས་རྨད། །
སྤྲིན་པའི་བཅུད་ཀྱིས་རི་ཀླུང་གཙང་ཞིང་གཙང་། །
འཇའ་ཚོན་སྣ་ལྔས་གནམ་ས་མཛེས་ཤིང་མཛེས། །
རང་བྱུང་ཁམས་ཀྱི་ཟས་རིགས་སྣ་མང་ལ། །
འཚོ་བཅུད་བཟང་ཞིང་རོ་བརྒྱའི་བྲོ་བ་མངའ། །
འདབ་ཆགས་དགའ་བའི་དབྱངས་རྟ་སྣ་ཚོགས་འཐེན། །
ཕྱུགས་རིགས་སྐྱིད་པས་གནམ་མཆོང་ས་རྒྱུག་བྱེད། །
གཞན་ཡང་རྐང་གཉིས་རྣམས་ཀྱི་སྣང་བའི་གཞིར། །
དབྱར་གྱི་ཕུན་ཚོགས་བརྗོད་པའི་ཡུལ་ལས་འདས། །
འབྲེལ་ཡོད་གསར་འགྱུར།