བརྒྱད་གཉིས་ལང་ཚོའི་མཛེས་སྡུག་ཁྱོད་ལ་མངའ་ཞིང་། །གཤིས་བཟང་ཞི་བའི་ཉམས་ཀྱི་ཡིད་འོང་ལྷ་མོ། །མཛེས་མའི་སྒེག་པའི་ཉམས་ཀུན་ཁྱོད་ལ་མངའ་བས། །འདོད་ལྡན་ཡིད་ཀྱི་དྲན་ཤིང་ཁྱོད་ལས་མ་རྙེད། ། སྙིང་ནས་བརྩེ་བའི་གྲོགས་དང་ཡིད་ཀྱི་བརྟེན་ས། །ན་གཞོན་ཕོ་མོའི་སེམས་ཀྱི་དུང་བྲིས་རི་མོ། །རང་དགར་རླུང་ལ་སྤུར་བའི་འདུན་པ་མེད་པས། །ཕོ་སྐྱེས་རྒོད་པོའི་སེམས་པའི་ཕྱེད་ཀ་ལོས་ཡིན། །ཕར་ལ་མཛའ་བའི་ཡིད་ཀྱི་མེ་ཏོག་ཕུལ་བར། ། ཚུར་ལ་བརྩེ་བའི་ཕྱག་ཟུང་དལ་གྱིས་བསྲིངས་ཤིང་། །གཅིག་སེམས་གཅིག་ལ་གཏད་མཁན་ཀུན་བཟང་ལྷ་མོ། །བུ་ལ་ལས་ཀྱིས་བསྩལ་བའི་ཚེ་གྲོགས་ཡིན་འདུག ། མཛེས་མའི་ཡོན་ཏན་ཀུན་འཛོམས་བརྒྱ་སྟོང་འཚོགས་ཀྱང་། །ཡིད་འཕྲོག་ལྷ་མོ་ཁྱོད་ལས་གཞན་ཞིག་མ་རྙེད། །མཛངས་མའི་ཡོན་ཏན་གང་ཡོད་སུ་ལ་འཛོམས་ཀྱང་། །ཡིད་སེམས་འཁྲེང་སའི་ན་ཆུང་ཁྱོད་ལས་མ་རྙེད། །མི་ཚེ་གཏན་གྱི་རི་མོ་གང་ལ་མ་བྲིས། །རང་གི་མདུན་ལམ་དཀར་པོར་ནག་ནོག་མ་བྲིས། །ལན་གཅིག་འཕྲད་པའི་སྐལ་བ་ཐོབ་རྒྱུ་བྱུང་ན། །

དགའ་བ་འབུམ་གྱིས་མྱོས་པར་ཐེ་ཚོམ་མི་འདུག །གནམ་གྱི་ཕྱེད་དང་ས་ཡི་གསུམ་ཆ་ཐོབ་ཀྱང་། །འདོད་པས་མ་ཚིམ་ཧམ་པས་ཟད་ཀྱང་རུང་མོད། །སྙིང་ནས་བརྩེ་བའི་དགའ་མ་ཁྱོད་ཉིད་ཁོ་ན། །ང་ཡི་སྤོབས་པ་ཡིན་པ་སུ་ཡིས་ཤེས་ཨང་། །