ཡིད་ཀྱི་མཛངས་མ།
བློ་ཡིས་བསླངས་པའི་སྤང་ལྗོངས་ཤིག་ཏུ། །
མཛའ་གཞས་སྙན་མོའི་གཏམ་རྒྱུད་དཔར་ན། །
རང་སེམས་སོང་བའི་མཛངས་མ་ཞིག་གིས། །
འཚོ་བ་གསར་པའི་གུར་ཁང་ཨེ་ཕུབ། །
ཡིད་ཀྱིས་བསྐྲུན་པའི་ཁང་བཟང་ཞིག་ཏུ། །
རེ་བའི་མིག་གིས་ཁྱེད་རང་འཚོས་ཡོད། །
ཡིད་སེམས་སོང་བའི་མཛངས་མ་ཞིག་གིས། །
ཁེར་རྐྱང་བུ་ལོར་སེམས་གསོ་ཨེ་གནང་། །
དུངས་སེམས་རི་མོ་སྙིང་ཁར་བྲིས་ཤིང་། །
བརྩེ་སེམས་དཀར་པོ་དུང་ལ་བསྲེས་ཡོད། །
ཡིད་སེམས་སོང་བའི་མཛངས་མ་ཞིག་གིས། །
སྦྲང་ཆར་ཟིལ་མའི་དངོས་གྲུབ་ཨེ་གནང་། །
ཡིད་སེམས་སོང་བའི་མཛངས་མ་ཞིག་ལ། །
སེམས་ཀྱི་འཕྲིན་པ་བསྟུད་མར་སྤྲིངས་ཡོད། །
ཡིད་ཀྱི་ཞིང་ས་མ་གས་གོང་ལ། །
སྙིང་གཏམ་དྲོན་མོའི་ཆར་རྒྱུན་ཕབ་རོགས། །
ཡིད་སེམས་སོང་བའི་མཛངས་མ་ཞིག་ལ། །
སེམས་ཀྱི་ཕྱི་ནང་མ་ལུས་བསྟན་ཡོད། །
བུ་མོ་ཁྲེལ་གཞུང་བག་ཡོད་ཅན་གྱིས། །
ནང་སེམས་གསོ་བའི་བདུད་རྩི་གནང་རོགས། །
སྐྱིད་སྡུག་འདྲེས་མའི་འཇིག་རྟེན་ཡུལ་འདིར། །
ཡིད་ངོར་འཆར་བ་ཁྱེད་ཞལ་དཀྱིལ་འཁོར།
ཡིད་སེམས་སོང་བའི་མཛངས་མ་ཁྱེད་ཀྱིས། །
བརྩེ་བ་དྲོན་མོ་རླུང་ལ་མ་སྐུར། །
འབྲེལ་ཡོད་གསར་འགྱུར།