པེ་ཅིང་མཁར་གྱི་རྩེ་ནས། །

གསེར་མདོག་ཉི་མ་ཤར་བྱུང་། །

གངས་ལྗོངས་ས་མཐོའི་ཡུལ་ལ། །

དཔྱིད་ཀྱི་དཔལ་ཡོན་བཞད་སོང་། །

བགྲང་བྱ་དྲུག་ཅུའི་འཕོ་འགྱུར། །

བཤད་ནས་རྫོགས་རྒྱུ་མི་འདུག །

འཚོ་བ་གསར་པའི་ལོངས་སྤྱོད། །

སུམ་རྩེན་གནས་ལས་སྐྱིད་པ། །

སློབ་གསོ་འཕྲོད་བསྟེན་ཚན་རྩལ། །

ཡར་ངོའི་ཟླ་ལ་འགྲན་པ། །

དམངས་ཕན་ཞབས་ཞུའི་སྲིད་ཇུས། །

དུས་ཐོག་སྦྲང་ཆར་འདྲ་བྱུང་། །

འགྲིམ་འགྲུལ་གློག་ཤུགས་འཐུང་ཆུར། །

འགྱུར་ལྡོག་རླུང་གཤོག་རྒྱུག་རྩལ། །

འཚོ་བ་གསར་པའི་བསྟོད་གླུ། །

རླབས་ཆེན་ཏང་ལ་འབུལ་ལོ། །

གནམ་ལ་ལྕགས་བྱ་འཕུར་སོང་། །

ས་ལ་གཡུ་འབྲུག་འཁྱུག་སོང་། །

བོད་ནས་པེ་ཅིང་བར་ལ། །

གསེར་གྱི་ཟམ་པ་བཙུགས་ཡོད། །

སྨན་བཅོས་འགན་སྲུང་ལམ་ལུགས། །

བདེ་ཐང་འཚོ་བའི་ཉིན་བྱེད། །

སློབ་གསོའི་སྦྲང་ཆར་ཟིལ་མས། །

ཕུགས་བསམ་མེ་ཏོག་བཞད་སོང་། །

ཨ་མ་འཛོམས་པ་ལྷ་མོས། །

སྙན་པའི་གླུ་དབྱངས་བླངས་སོང་། །

ཨ་ཕ་སྐལ་བཟང་བག་གྲོས། །

དངུལ་ཕོར་ཞབས་དག་བརྒྱབ་སོང་། །

གངས་ལྗོངས་རི་ཀླུང་ཀུན་ལ། །

འབྱོར་ཕྱུག་མེ་ཏོག་བཞད་སོང་། །

འཚོ་བ་གསར་པའི་གཏམ་བཟང་། །

དྲི་བཞོན་བཞིན་དུ་ཁྱབ་སོང་། །

རླབས་ཆེན་ཏང་གི་བཀའ་དྲིན། །

ཡར་ཀླུང་གཙང་པོའི་རྒྱུན་རེད། །

དམངས་སེམས་ཞིང་ས་གཤིན་པོར། །

བདེ་སྐྱིད་མྱུ་གུ་འབུས་སོང་། །

ཁ་བཏགས་ཨ་ཤེ་ཁྱེར་ནས། །

དགའ་བའི་བྲོ་གར་འཁྲབ་ཡོད། །

བགྲང་བྱ་དྲུག་ཅུ་འཁོར་བར། །

བཀྲ་ཤིས་རྟེན་འབྲེལ་ཞུས་ཡོད། །