སྣ་གླུ་ལེན་བཞིན་མིག་འཛུམ་ངོམ། །

རྒྱུ་མཚན་མེད་པར་ཀི་འབོད་བྱེད། །

རི་ལྡེབས་ཉུལ་ནས་རི་དྭགས་འདེད། །

ཐང་ལ་ཉལ་ནས་རྩེད་འཇོར་རོལ། །

སྲོད་ལ་འདུས་ཏེ་མཚར་གཏམ་མོལ། །

ཟླ་འོད་འོག་ནས་གླུ་དབྱངས་ལེན། །

སྐར་མའི་མཛེས་སྡུག་མིག་གིས་ལྟ། །

སྤྲིན་གྱི་རང་མདངས་ཡིད་དུ་སྦྲུམ། །

དགུན་ཟླ་ཚེས་ཀྱང་གཅེར་བུར་རྒྱུག །

ཁ་བའི་ཁྲོད་ནས་བྱེའུ་ཆུང་འཛིན། །

སེམས་ལ་ཆགས་སྡང་གྲིབ་མ་མེད། །

གུ་ཡངས་རྡོག་པས་རི་ལུང་བརྒལ། །

སྣང་བའི་འཇིག་རྟེན་ཉམས་སུ་མྱོང་། །

འོད་ཀྱི་གཤོག་པར་ལག་འཇུ་གནང་། །

མཚར་སྡུག་རི་མོ་སྙིང་ཁར་དཔར། །

ལང་ཚོའི་ལོ་ཟླ་དགའ་སྤྲོས་བསྐྱལ། །

དཀར་གཙང་མི་ཚེ་སྐྱིད་ལ་གཞོལ། །