ཐོ་རེངས་སྐར་མ་འོད་ཆེན། །

དེ་འདྲའི་ཧམ་པ་ཚ་ལ། །

སྐར་མ་ཡིན་ན་ཆེ་སོང་། །

ཟླ་བ་ཡིན་ན་ཆུང་སོང་། །

ཁྱོད་རང་ལོ་རྟགས་སྟག་རེད། །

ལྟ་བ་མཐོན་པོ་མ་གནང་། །

ང་རང་ལོ་རྟགས་བྱ་རེད། །

བྱ་བ་འཕྱུགས་ཀྱི་མ་རེད། །

ཁྱོད་ནི་གསེར་གྱི་སྐུ་རེད། །

ང་ནི་འདམ་བག་ལྷ་རེད། །

ལྷ་ཁང་གཅིག་གི་ནང་ལ། །

མཉམ་དུ་གང་ནས་ཡོང་ང་། །

གནམ་ལ་སྐས་འཛེག་བཙུཊ་ནས། །

སྨིན་དྲུག་ལེན་རྒྱུ་བྱུང་ན། །

ཆུ་ལ་ཤེལ་སྒོ་བཙུགས་ནས། །

ཉ་མོ་འཛིན་དགོས་ལས་རེད། །

ར་ལ་རྟ་སྒ་བརྒྱབ་ནས། །

ཤིག་ལ་མནའ་མ་བླངས་སོང་། །

ཁྱི་ཤིག་ཚིག་པ་ཟ་ནས། །

ཐོག་སོ་དགུ་ནས་མཆོངས་སོང་། །

སྒོ་དེ་ཤར་སྒོ་ནུབ་སྒོ །

ཨ་ཤིང་མེད་པའི་རྟགས་རེད། །

བུ་མོ་ལྡེམ་ལྡེམ་འཁྱུག་འཁྱུག །

བདག་པོ་མེད་པའི་རྟགས་རེད། །

བྱམས་པ་ཨ་གསར་ཅན་གྱིས། །

ཤོག་བུའི་འོག་འཇུག་གཡོཊ་བྱུང་། །

སྐེ་རགས་བཅིངས་པར་ཕྱིན་པས། །

ཡ་ལིང་མ་ལིང་བྲལ་སོང་། །

མགོ་དེ་མར་ཀོག་མགོ་ལ། །

སྐྲ་ལོའི་རེ་བ་མ་བྱེད། །

གདོང་དེ་ཞི་མིའི་གདོང་ལ། །

མནའ་མའི་རེ་བ་མ་བྱེད། །

སེམས་པ་དཀར་དང་མི་དཀར། །

དཀར་ཡོལ་ནང་གི་འོ་མ། །

ལུས་པོ་བཙན་དང་མི་བཙན། །

སྒོ་ལྕགས་གསར་པའི་ལྡེ་མིག །