ཁྱིམ་མདའ་གྲོང་ཚོར་གསེར་གྱི་ཟམ་པ་ཡོད།
བཙའ་ཡིས་ཟས་པའི་ལྕགས་ཐག་སེར་འཛར་འཛར། །
ཟམ་ཤིང་རུལ་བའི་བམ་དྲི་སྐྱུར་འཚུབ་འཚུབ། །
ཁྱིམ་མདའ་གྲོང་ཚོའི་ལྕགས་ཟམ་རྙིང་རོ་དེས། །
དམར་དམག་མྱུར་པོར་བགྲོད་ཚུལ་ལོ་རྒྱུས་དྲན། །
བཀྲེས་སྐོམ་བཟོད་ཐབས་མ་རྙེད་འབྲི་གཡག་ཁྱུ། །
དཔྱིད་ཀྱི་རྩྭ་ས་མཆོར་སྒེག་ན་ཆུང་མའི། །
ལང་ཚོར་འཕྲུལ་བཞིན་ཆུ་བོའི་ཕ་མཐའ་རུ། །
དགའ་མགུར་སྤྱོད་པའི་འདུན་པ་དྲག་ཏུ་འཕྱུར། །
གངས་ཆུ་བཞུར་བཞིན་ཆུ་བོ་རྒྱས་དང་གཅིག །
མཁའ་རླུང་དྲོས་ཏེ་རྦ་རླབས་འཕྱུར་དང་གཉིས། །
ཟམ་པ་བརྒལ་བའི་རེ་ཐག་ཆད་དང་གསུམ། །
འབྲི་གཡག་ཆུ་བོའི་གད་ཁར་ཀེ་རེར་ལུས། །
འབྲོག་པ་བཀྲ་ཤིས་ཚང་ལ་བསྐྱོད་ཚེ་ན། །
རྐང་ལག་ཞ་བོར་གྱུར་པའི་གཡག་གུ་ཞིག །
ཟུག་རྔུས་མནར་ཏེ་འཁུན་སྒྲ་སྦྱིན་པ་མཐོང་། །
ཀྱེ་ཧུད་དེ་འདྲའི་ཐབས་ཟད་འུ་ཐུག་ཨང་། །
ཉམ་ཐག་དེ་འདྲ་ལྟ་བས་མི་བཟོད་པས། །
འབྲི་གཡག་ཙམ་མིན་རླངས་འཁོར་ཤར་བགྲོད་ཀྱི། །
གསེར་གྱི་ཟམ་པ་བསྐྲུན་པའི་ཇུས་ཆེན་ཞིག །
བོད་སྐྱོར་ལས་བྱེད་ཐུགས་ལ་དེ་མུར་འཁྲུངས། །
གཉེན་སྟོན་མཛད་སྒོའི་ཇུས་ཆ་འདོན་པ་བཞིན། །
ཀྲུང་གོའི་ཁྱད་ཆོས་ལྡན་པའི་རྣམ་གྲངས་དེར། །
ངར་ལྕགས་གདུང་མ་མཐུག་པོའི་ཨར་འདམ་བཅས། །
སྤྱོད་པར་རིགས་སོ་བཞེད་མཐུན་ཐུགས་གྲ་འགྲིག །
ཀ་དག་སྲིད་པའི་ཆུ་ཆེན་གཉའ་ཐོག་ལ། །
ཁ་ཐུག་འདྲོངས་པའི་དེང་རབས་ཟམ་ཆེན་བསྐྲུན། །
ག་དུས་འགྲོ་འོང་བྱས་ཀྱང་འགོག་མེད་ཀྱིས། །
ང་འོ་སྙམ་པའི་སྤོབས་སེམས་མཆི་མ་འཁྱིལ། །
བྱང་ཐང་འབྲོག་པར་དྲོ་སྐྱིད་འོད་སྣང་བསྩལ། །
པེ་ཅིང་གསེར་གྱི་རི་བོའི་དྲོད་ཁོལ་ཚོར། །
དེ་ཡི་བྱེད་པོ་བོད་སྐྱོར་ལས་བྱེད་པར། །
ལྷ་རེག་དཀར་གཙང་བསྒྲོན་ཏེ་དྲིན་ཚོར་སྒོམ། །
བདེ་མོ་བདེ་མོའི་ཡུལ་ལ་འགྲོ་འདོད་ཀྱིས། །
དྲག་པོ་དྲག་པོའི་ཆུ་བོར་ཟམ་ཆེན་བསྐྲུན། །
འཛོམས་པོ་འཛོམས་པོའི་ཚོང་ཟོག་ཆ་འཕྲིན་སོགས། །
དེ་མ་དེ་མུར་ལུང་ཁུག་འབྲོག་སར་འབྱོར། །
སྐལ་བཟང་མེ་ཏོག་བསུང་ངད་གང་སར་མཆེད། །
འབྲོག་མོའི་གདོང་ལས་དགའ་བའི་འཛུམ་མདངས་འཕྱུར། །
དུས་རབས་གསར་པའི་དྲིན་ཚོར་མཚོན་སླད་དུ། །
གསེར་གྱི་ཟམ་པའི་སྙན་གྲགས་འཕེལ་གྱུར་ཅིག །
འབྲེལ་ཡོད་གསར་འགྱུར།