པཎ་ཆེན་ཨེར་ཏེ་ནི་ཆོས་ཀྱི་རྒྱལ་པོས་ཆབ་མདོར་སྤྱི་ཚོགས་ཀྱི་བརྟག་ཞིབ་གནང་བ་དང་ཆོས་ཕྱོགས་ཀྱི་མཛད་སྒོ་སྤེལ་བ།
ཉིན་ཤས་རིང་། རྒྱལ་ཡོངས་སྲིད་གྲོས་ཀྱི་རྒྱུན་ཨུ་དང་། ཀྲུང་གོ་ནང་བསྟན་མཐུན་ཚོགས་ཀྱི་ཚོགས་གཙོ་གཞོན་པ། ཀྲུང་གོ་ནང་བསྟན་མཐུན་ཚོགས་བོད་ཡན་ལག་མཐུན་ཚོགས་ཀྱི་ཚོགས་གཙོ་བཅས་ཡིན་པའི་པཎ་ཆེན་ཨེར་ཏེ་ནི་ཆོས་ཀྱི་རྒྱལ་པོས་ཆབ་མདོ་གྲོང་ཁྱེར་མཛོ་སྒང་རྫོང་དང་། དཔའ་ཤོད་རྫོང་། ཁ་རུབ་ཆུས། ལྷོ་རོང་རྫོང་། དཔལ་འབར་རྫོང་སོགས་སུ་སྤྱི་ཚོགས་ཀྱི་བརྟག་ཞིབ་གནང་བ་དང་འབྲེལ་ཆོས་ཕྱོགས་ཀྱི་མཛད་སྒོ་སྤེལ་ནས། བོད་བརྒྱུད་ནང་བསྟན་སྤྱི་ཚོགས་རིང་ལུགས་སྤྱི་ཚོགས་དང་འཚམ་མཐུན་ཡོང་བར་སྐུལ་འདེད་བཏང་གནང་བ་རེད།
ཆབ་མདོ་གྲོང་ཁྱེར་དཔལ་འབྱོར་ལག་རྩལ་གསར་སྤེལ་ཁུལ་གྱི་བོད་ལྗོངས་ལྷ་ཡི་བདུད་རྩི་བོད་སྨན་ཚད་ཡོད་ཀུང་སི་དང་ལྷོ་རོང་རྫོང་སྨན་རྩིས་ཁང་དུ་པཎ་ཆེན་རིན་པོ་ཆེས་གནས་ཚུལ་ངོ་སྤྲོད་ནན་ཏན་གསན་པ་མ་ཟད། བོད་ལུགས་གསོ་རིག་འཕེལ་རྒྱས་ཀྱི་ལོ་རྒྱུས་དང་། ཕྱིར་འཚོང་གཞི་ཁྱོན། ལག་རྩལ་གསར་གཏོད་སོགས་ཀྱི་གནས་ཚུལ་མཁྱེན་རྟོགས་ཞིབ་ཕྲ་གནང་བ་རེད།
ལྷོ་རོང་རྫོང་ཤོ་པ་མདོ་གྲོང་རྡལ་ནི་ཇ་རྟའི་གནའ་ལམ་གྱི་ས་ཚུགས་དང་བོད་སྐྱོད་གྲོང་རྡལ་གལ་ཆེན་ཞིག་ཡིན་ཞིང་། གནའ་སྔ་མོ་ནས་བཟུང་། མི་རིགས་ཁག་གི་དཔལ་འབྱོར་དང་རིག་གནས་སྤེལ་རེས་ཀྱི་བར་ཁྱམས་ཡིན་པས། མི་རིགས་མཐུན་སྒྲིལ་གྱི་གཏམ་རྒྱུད་ལ་ལོ་རྒྱུས་ཡུན་རིང་ལྡན་ཡོད། པཎ་ཆེན་རིན་པོ་ཆེ་ལྷོ་རོང་རྫོང་ཤོ་པ་མདོ་གྲོང་རྡལ་རིག་གནས་སྒྲིག་གཤོམ་ཁང་དུ་ཕེབས་ནས་ལྷོ་རོང་རྫོང་གི་ལོ་རྒྱུས་དང་། ཇ་རྟའི་གནའ་ལམ་རིག་གནས། མི་རིགས་མཐུན་སྒྲིལ་དང་གསར་བརྗེའི་རིག་གནས་བཅས་ཀྱི་མི་སེམས་འགུལ་བའི་གཏམ་རྒྱུད་མཁྱེན་རྟོགས་ཞིབ་ཕྲ་གནང་ཞིང་། ཚང་མར་སྲོལ་རྒྱུན་བཟང་པོ་དར་སྤེལ་བཏང་ནས་མི་རིགས་མཐུན་སྒྲིལ་ལ་རང་རྟོགས་ངང་ཤུགས་སྣོན་རྒྱག་པ་དང་། དུས་རབས་གསར་པའི་མི་རིགས་མཐུན་སྒྲིལ་གྱི་གཏམ་རྒྱུད་མུ་མཐུད་རྩོམ་པ། མི་རིགས་མཐུན་སྒྲིལ་གྱི་གཏམ་བཟང་མི་རབས་ནས་མི་རབས་བར་དར་བ་བཅས་བྱས་ཏེ། ཀྲུང་ཧྭ་མི་རིགས་བསྐྱར་དར་རླབས་པོ་ཆེ་མངོན་འགྱུར་ཡོང་བར་སྟོབས་ཤུགས་ལེགས་སྐྱེས་འབུལ་དགོས་པའི་སྐུལ་ལྕག་གནང་བ་རེད།
ཆབ་མདོར་བཞུགས་རིང་། པཎ་ཆེན་རིན་པོ་ཆེ་མཛོ་སྒང་རྫོང་གི་མཛོ་སྒང་དགོན་དང་ཐེམ་དགོན་དང་། དཔའ་ཤོད་རྫོང་གི་ཚ་སྟོད་གནས་རབ་དགོན་དང་དཔའ་ཤོད་དགོན། ཁ་རུབ་ཆུས་ཀྱི་ཀརྨ་དགོན། ལྷོ་རོང་རྫོང་གི་གཞི་བཀྲམ་དགོན་དང་། རྫི་ཐོ་དགོན། ཤོ་པ་མདོ་དགོན། དཔལ་འབར་རྫོང་གི་ལྷ་རྩེ་དགོན་དང་། ལྕགས་རྭ་དགོན། དཔལ་འབར་དགོན། རྒྱ་མཚོ་གླིང་དགོན་བཅས་སུ་ཕེབས་ནས་ཆོས་ཕྱོགས་ཀྱི་མཛད་སྒོ་སྤེལ་གནང་བ་རེད། དགོན་པ་ཁག་གིས་ཆོས་ལུགས་ཀྱི་གུས་སྲོལ་རྒྱས་ཤོས་ཐོག་ནས་པཎ་ཆེན་རིན་པོ་ཆེར་ཕེབས་བསུ་ཞུས་ཤིང་། པཎ་ཆེན་རིན་པོ་ཆེས་གྲྭ་དམངས་ལ་ཞལ་འདོན་དབུ་སྐུལ་གནང་བ་དང་ཆར་ཆུ་དུས་སུ་འབབ་པ་དང་རྒྱལ་དམངས་བདེ་ལ་འཁོད་པའི་གསོལ་བ་སྨོན་ལམ་བཏབ་གནང་བ་རེད།
འབྲེལ་ཡོད་གསར་འགྱུར།